ފެނަކަ ކޯޕަރޭޝަނަށް ތަކެއްޗާއި ޚިދުމަތްތައް ހޯދުމަށް ހަދާފައިވާ ޕްރޮކިއުމަންޓްގެ ނިޒާމު ހަރުދަނާކޮށް، އެކުލަވާލާ އައު ޕްރޮކިއުމަންޓް ޕޮލިސީއަށް އަންނަ މަހުގެ ތެރޭގައި އަމަލުކުރަން ފަށާނެ ކަމަށް އެ ކުންފުނީގެ މެނޭޖިންގ ޑިރެކްޓަރ މުޙައްމަދު އަފީފު ޙުސައިން ވިދާޅުވެއްޖެއެވެ.

ޕީއެސްއެމްގެ "ދުވެލި" ޕްރޮގްރާމުގައި ވާހަކަދައްކަވަމުން އަފީފް ވިދާޅުވީ، ޕްރޮކިއުމަންޓްގެ އުސޫލުތައް މުރާޖާކޮށް އިސްލާހުކުރުމަކީ މިވަގުތު ކުންފުނިން އެންމެ ބޮޑު އިސްކަމެއް ދީގެން ކުރަމުން އަންނަ މަސައްކަތް ކަމަށެވެ.

އަދި މާޒީގައި މަސައްކަތްތައް ހަވާލުކުރުމާއި ޚިދުމަތްތައް ހޯދުމުގައި ވަރަށް ބޮޑެތި މައްސަލަތަކެއް ހުރިކަން ފާހަގަކުރައްވައި، އައު ޕޮލިސީއާއެކު މޮނިޓަރިންގ ނިޒާމާއި ޚަރަދުކުރުމުގެ ކަންކަން ބޮޑުތަނުން ހަރުދަނާވެގެންދާނެ ކަމަށް ވިދާޅުވިއެވެ.

ފެނަކައިގެ އޮޑިޓް ރިޕޯޓުން ހާމަވި ގޮތުގައި، 2021 އިން 2023 ގެ ނިޔަލަށް ހަވާލުކުރި 2.23 ބިލިއަން ރުފިޔާގެ 673 އެއްބަސްވުމުގެ ތެރެއިން 438 އެއްބަސްވުމަކީ އާންމު ބީލަމުގެ އުސޫލުން ބޭރުން ހަދާފައިވާ އެއްބަސްވުންތަކެކެވެ. މި މަޝްރޫޢުތަކުގެ އަގު 1.3 ބިލިއަން ރުފިޔާއަށް އަރައެވެ. މި މައްސަލަތަކާ ގުޅިގެން ރައްޔިތުންގެ މަޖިލީހުގެ މާލިއްޔަތު ކޮމިޓީންވެސް ވަނީ ޕްރޮކިއުމަންޓް އުސޫލު އިސްލާހުކުރަން އަންގާފައެވެ.

އަފީފް އިތުރަށް ވިދާޅުވީ، ކުރިން ޕްރޮކިއުމަންޓް ކުރިއަށް ގެންދިޔައިރު ލިޔެކިޔުންތައް ފުރިހަމަނުވުމުގެ ސަބަބުން ކޮން ބައެއްކަން ސާފުނުވާ ކުންފުނިތަކަށާއި، ކުދި ކުންފުނިތަކަށް ބޮޑެތި މުދާ ސަޕްލައިކުރަން ހަވާލުކޮށްފައިވާ ކަމަށެވެ. އަދި އޭގެ ސަބަބުން ރަނގަޅަށް ޚިދުމަތް ދިން ކުންފުނިތަކަށް ފައިސާ ދިނުމުގައިވެސް ދަތިތަކާ ކުރިމަތިވި ކަމަށެވެ. ނަމަވެސް، ކުރިއަށް އޮތް ތަނުގައި ތަކެތި ހޯދާނީ ސީދާ މެނުފެކްޗަރާއިން ނުވަތަ އެ ފަރާތްތަކުން ޚިދުމަތްދޭ އިތުބާރު ހުރި ކުންފުނިތައް މެދުވެރިކޮށް، ފެންވަރު ރަނގަޅު ތަކެތިކަން ކަށަވަރުކޮށްގެން ކަމަށް ވިދާޅުވިއެވެ.

މީގެއިތުރުން، ކުންފުނި ރައިޓް ސައިޒްކުރުމާއި، ކޮންޓްރެކްޓަރުންނަށް ނުދެވި ހުރި ފައިސާ ދައްކައިގެން ދަރަނި ކުޑަކުރުމުގެ މަސައްކަތްވެސް ކުރެވެމުންދާ ކަމަށް އެމްޑީ ވިދާޅުވިއެވެ.