ބޮލީވުޑްގެ 'މިސްޓަރ ޕަރފެކްޝަނިސްޓް' ގެ ގޮތުގައި މަޝްހޫރުވެފައިވާ އާމިރް ޚާން، އޭނާގެ ކުރިއަށް އޮތް ފިލްމަށް ތައްޔާރުވުމުގެ ގޮތުން ހަށިގަނޑަށް ބޮޑު ބަދަލެއް ގެނައުމުގެ މަސައްކަތް ފަށައިފިއެވެ.

އެގޮތުން އާމިރް މިހާރު ވަނީ ކުޅަދާނަ ޑައިރެކްޓަރ އާޝުތޯޝް ގޮވާރިކަރ ޑައިރެކްޓްކުރާ އައު ފިލްމު 'ލަލްކާރާ' އަށް ޚާއްޞަކޮށްގެން ބަރުދަން ލުއިކުރުމުގެ ބޮޑު ޓްރާންސްފޯމޭޝަނެއް ފަށާފައެވެ.

އާމިރް ޚާން އާއި ޑައިރެކްޓަރ އާޝުތޯޝް ގޮވާރިކަރ މީގެ ކުރިން ވަނީ ބޮލީވުޑްގެ ތާރީޚުގައި ފާހަގަކޮށްލެވޭ އެންމެ ކާމިޔާބު އެއް ފިލްމު ކަމަށްވާ 2001 ވަނަ އަހަރު ނުކުތް 'ލަގާން' ގައި އެކުގައި މަސައްކަތްކޮށްފައެވެ. އެ ފިލްމަކީ އޮސްކާ އެވޯޑަށްވެސް ނޮމިނޭޓްވި މޮޅު އުފެއްދުމަކަށް ވުމާއެކު، ގިނަ އަހަރުތަކަކަށްފަހު މި ދެމީހުން އަލުން އެކުގައި އައު ފިލްމަކުން ފެނިގެންދާނެކަމުގެ ޚަބަރާއެކު ސަޕޯޓަރުން ތިބީ ވަރަށް ބޮޑަށް އިންތިޒާރުކޮށްގެންނެވެ.

ފިލްމުތަކުގައި އޭނާ ކުޅޭ ރޯލުތަކަށް އެންމެ ފުރިހަމައަށް ތައްޔާރުވުމަކީ އާމިރް ޚާންގެ އެންމެ ބޮޑު އެއް ޚާއްޞަ ސިފައެވެ.

މީގެ ކުރިން 'ދަންގަލް' އަދި 'ގަޖްނީ' ފަދަ ފިލްމުތަކަށްވެސް އޭނާ ވަނީ ހަށިގަނޑާއި ބަރުދަނަށް ވަރަށް ބޮޑެތި ބަދަލުތަކެއް ގެނެސް، ބެލުންތެރިން ހައިރާންކޮށްލާފައެވެ. ރިޕޯޓުތައް ބުނާގޮތުން 'ލަލްކާރާ' ގައި އޭނާ ކުޅޭ ކެރެކްޓަރގެ ސިފައަށް ފިޓްވުމަށްޓަކައި އާމިރް މިހާރު އަންނަނީ ޚާއްޞަ ޑައިޓެއްކޮށް، ވަރަށް ބުރަކޮށް ކަސްރަތު ކުރަމުންނެވެ.

މި ފިލްމުގެ ވާހަކައާއި، ފިލްމުގައި ހިމެނޭ އެހެނިހެން ތަރިންނާ ގުޅޭ އިތުރު ތަފްސީލެއް އަދި ރަސްމީކޮށް ހާމަކޮށްފައެއް ނުވެއެވެ. ނަމަވެސް މިއީ އާމިރް ޚާންގެ ވަރަށް ތަފާތު އެކްޓިންގއެއް ފެނިގެންދާނެ ބޮޑު ޕްރޮޖެކްޓެއް ކަމަށް ބެލެވެއެވެ.