މަޝްހޫރު ގޭމް އަދި ކާޓޫން ސީރީޒް 'ޕޮކިމޯން' އާއި އިންސްޓަންޓް ފޮޓޯގްރަފީގެ ދުނިޔޭގައި މަޝްހޫރު 'ޕޮލަރޮއިޑް' ގުޅިގެން ޚާއްޞަ ކެމެރާތަކަކާއި އެސެސަރީތަކެއް ނެރެން ނިންމައިފިއެވެ.

މި ކޮލެބަރޭޝަނަކީ ޕޮކެމޯން ފްރެންޗައިޒްއަށް 30 އަހަރު ފުރުން ފާހަގަކުރުމުގެ ގޮތުން ނެރޭ ކަލެކްޝަނެކެވެ.

މިއީ ޕޮލަރޮއިޑްގެ ތާރީޚުގައިވެސް އެކުންފުނިން ކުރާ އެންމެ ބޮޑު އެއް ކޮލެބަރޭޝަނެވެ. މި ކަލެކްޝަންގައި މައިގަނޑު ގޮތެއްގައި ހިމެނެނީ ޕޮލަރޮއިޑްގެ ތިން ކެމެރާއެކެވެ:

• ޕޮލަރޮއިޑް ނައު ޖެނެރޭޝަން 3 (ޕޮކޭ ބޯލް އެޑިޝަން): މިއީ ޕޯކޭ ބޯލްގެ ކުލަތައް ކަމަށްވާ ރަތް، ހުދު އަދި ކަޅު ކުލައިން ފަރުމާކޮށްފައިވާ، ސައިޒުން ތަންކޮޅެއް ބޮޑު ކެމެރާއެކެވެ. މި ކެމެރާގެ ފޮޓޯ ނަގަން ފިތާ ބަޓަންވެސް ހަދާފައިވަނީ ޕޯކޭ ބޯލް އާ އެއްގޮތަށެވެ. މީގެ އަގަކީ ގާތްގަނޑަކަށް 140 ޑޮލަރެވެ.
• ޕޮލަރޮއިޑް ގޯ ޖެނެރޭޝަން 3 (ޕީކާޗޫ އެޑިޝަން): ރީނދޫ ކުލައިގެ މި ކުޑަ ކެމެރާގައި ޕީކާޗޫގެ ނިގޫ ސިފަވާ ގޮތަށް ހަދާފައިވާ ޚާއްޞަ ސްޓްރެޕެއް (ވާގަނޑެއް) ހިމެނެއެވެ. އަގަކީ ގާތްގަނޑަކަށް 100 ޑޮލަރެވެ.
• ޕޮލަރޮއިޑް ގޯ ޖެނެރޭޝަން 3 (ސިލްވިއޯން އެޑިޝަން): މިއީ ފިޔާތޮށި އަދި ހުދު ކުލައިން ފަރުމާކޮށްފައިވާ، އަދި ސިލްވިއޯންގެ ރިބަންތަކާ އެއްގޮތަށް ސްޓްރެޕް ހަދާފައިވާ ކެމެރާއެކެވެ.

ކެމެރާގެ އިތުރުން، ފޮޓޯ ޕްރިންޓްވެގެން ނުކުންނައިރު އޭގެ ބޯޑަރުގައި އެކި ޕޯކިމޯންތަކުގެ މަންޒަރު ހިމެނޭ ޚާއްޞަ ފިލްމުތަކަކާއި، ޕޯކޭ ބޯލް ބައްޓަމަށް ހަދާފައިވާ ކެމެރާ ކޭސް އަދި ފޮޓޯ އަލްބަމްވެސް ވިއްކަން ހުންނާނެއެވެ.

މި ތަކެތި ޕްރީ-އޯޑަރ ކުރުމަށް އޮގަސްޓް 25 ވަނަ ދުވަހު ޕޮލަރޮއިޑްގެ ވެބްސައިޓުންނާއި ޕޮކިމޯން ސެންޓަރުން ހުޅުވާލާނެއެވެ.

އަދި ރަސްމީކޮށް އާންމުކޮށް ބާޒާރަށް ނެރޭނީ އޮކްޓޯބަރު 5 ގައެވެ.