ހޮލީވުޑްގެ އެންމެ މަޝްހޫރު އަދި ގިނަ ބައެއްގެ ލޯބި ހޯދާފައިވާ ދެމަފިރިން ކަމަށްވާ ބްލޭކް ލައިވްލީ އާއި ރަޔަން ރޭނޮލްޑްސް، އެމީހުންގެ 4 ކުދިންނާއެކު ހޭދަކުރާ ދިރިއުޅުމުގެ ބައެއް ކަންކަން ސަޕޯޓަރުންނާ ހިއްސާކޮށްފިއެވެ.

މި ދެމަފިރިން ވަނީ 4 ކުދިން ގޮވައިގެން އުޅުމަކީ ކިހާ ވަރެއްގެ ކަމެއްކަން ވަރަށް ޝައުގުވެރި ގޮތަކަށް ކިޔައިދީފައެވެ.

އާންމުކޮށް އާއިލީ ދިރިއުޅުން ސިއްރުކޮށްގެން އުޅެން އިސްކަންދޭ މި ދެ ތަރިން ބުނިގޮތުގައި، 4 ކުދިންނާއެކު ގޭތެރޭގެ މާހައުލު އަބަދުވެސް އޮންނަނީ ވަރަށް ހަލަބޮލިކޮށެވެ. ނަމަވެސް އެއީ އެމީހުން އެންމެ އުފާވާ އަދި ހިތްހަމަޖެހޭ ވަގުތުކަން ފާހަގަކޮށް، ރަޔަން އާއި ބްލޭކް ވަނީ މައިންބަފައިންގެ ގޮތުގައި އެމީހުން ކުރާ ތަޖުރިބާތައް އެމީހުންގެ ހުންނަ މަޖާ މިޒާޖާ ގުޅޭގޮތަށް ސިފަކޮށްދީފައެވެ.

ކުދިން ގިނަވުމާއެކު ދިރިއުޅުމަށް ބޮޑެތި ބަދަލުތަކެއް އައި ނަމަވެސް، އެއީ ލިބޭ ވަރަށް ބޮޑު އުފަލެއް ކަމަށް އެމީހުން ބުންޏެވެ.

ބްލޭކް އަދި ރަޔަން ކައިވެނިކުރީ 2012 ވަނަ އަހަރުގައެވެ.

އަދި މި ދެމަފިރިންނަށް މިހާރު 4 ކުދިން ލިބިފައިވާއިރު، އޭގެ ތެރޭގައި ހިމެނެނީ ޖޭމްސް، އިނޭޒް، ބެޓީ އަދި ދާދި ފަހުން ލިބުނު 4 ވަނަ ދަރިފުޅު އޮލިންއެވެ.

ހަތަރު ކުދިންގެ ކަންކަން ބެލެހެއްޓުމުގައި ދެމަފިރިން އެކަކު އަނެކަކަށް އެހީތެރިވެދީ، އާއިލާއަށް ވަގުތު ދިނުމަށް ވަރަށް ބޮޑަށް އިސްކަންދޭކަންވެސް އެމީހުން ވަނީ ފާހަގަކޮށްފައެވެ.