ދައުލަތުގެ ޕޭ ފްރޭމް ވަރކއަށް ހިޖުރަކޮށްފައިވާ ސިއްހީ ދާއިރާގެ މަސައްކަތްތެރިންނަށް އިތުރުގަޑީގެ އެލަވަންސް ދިނުމުގައި އޮތް 10%ގެ ލިމިޓު ސަރުކާރު ބަންދު ދުވަސްތަކުގައި ކުރާ މަސައްކަތަށް އުވާލި ނަމަވެސް، ރަސްމީ ދުވަސްތަކުގައި އިތުރުގަޑީގެ ފައިސާ ނުދީ، ސިއްހީ މަސައްކަތްތެރިން ލައްވާ މަޖުބޫރުން މަސައްކަތްކުރުވާ ކުރުވުމަށް ހައްލެއް ނާންނަކަމަށް މޯލްޑިވްސް ހެލްތު ޕްރޮފެޝަނަލަސް ޔޫނިއަން (އެމް.އެޗް.ޕީ.ޔޫ.)ގެ ރައީސް ހާޝިމް އަބޫބަކުރު ވިދާޅުވެއްޖެއެވެ.

އިތުރުގަޑީގެ ފައިސާ ނުދީ ޞިއްޙީ ޚިދުމަތްތެރީން ލައްވާ މަސައްކަތްކުރުވުން ހުއްޓާލުމަށް ގޮވާލާ އެމް.އެޗް.ޕީ.ޔޫ.އިން ފަށާފައިވާ ކެންޕޭނާ ގުޅިގެން ސަރުކާރުން ވަނީ، ބަންދު ދުވަސްތަކުގައި ސިއްހީ ދާއިރާގެ މުވައްޒަފުން މަސައްކަތަށް ނުކުންނަ ދުވަސްތަކަށް ހާޒިރީ އިނާޔަތް ދިނުމަށާއި ދިވެހިރާއްޖޭގެ ރަސްމީ ކަލަންޑަރުގައި ކަނޑައަޅާފައިވާ ބަންދު ދުވަސްތަކުގެ އިތުރުން  ރައީސުލްޖުމްހޫރިއްޔާގެ އޮފީހުގެ ދެންނެވުމަކުން ބަންދުކުރާ ކޮންމެ ދުވަހެއް ވެސް ހިމެނޭގޮތަށް ހުރިހާ ބަންދު ދުވަސްތަކެއްގައި ސިއްހީ ދާއިރާގެ މުވައްޒަފުން އިތުރުގަޑީގައި ކުރާ މަސައްކަތަށް %10 ގެ ލިމިޓްގެ ތެރޭގައި ނުހިމަނާ އިތުރުގަޑީގެ އިނާޔަތް އެއްކޮށް ދޭންޖެހޭ ގޮތަށް ދައުލަތުގެ ޕޭ ފްރޭމް ވަރކްއަށް އިސްލާހުތަކެއް ގެނެސްފައިއެވެ.

 "މިއީ ޞިއްޙީ މަސައްކަތްތެރިންގެ ޝަކުވާތައް ޤަބޫލުކޮށް ސަރުކާރުން އެޅި ހެޔޮ ފިޔަވަޅެއް. އެކަމަކު އަދިވެސް ރަސްމީ ދުވަސްތަކުގައި އިތުރުގަޑީގެ ފައިސާ ނުދީ ޞިއްޙީ ޚިދުމަތްތެރިން ލައްވާ މަޖުބޫރުން މަސައްކަތްކުރުވާ ކުރުވުމަކަށް ހައްލެއް ނާދޭ!" – ހާޝިމް އަބޫބަކުރު އެކްސްގައި ކުރެއްވި ޕޯސްޓެއްގައި ވިދާޅުވިއެވެ.

 ސަރުކާރުން ޕޭ ފްރޭމް ވަރކަށް ގެނައި ބަދަލާ ގުޅިގެން ސޯޝަލް މީޑިއާގައި ކުރެއްވި ޕޯސްޓުގައި އިތުރުގަޑީގައި ސިއްހީ ޚިދުމަތްތެރިން ލައްވާ މަސައްކަތްކުރުވަން ޖެހޭނަމަ، އެ ކުރުވާ މަސައްކަތަށް ފުރިހަމައަށް އުޖޫރަދިނުމަށް ހާޝިމް ވަނީ ސަރުކާރަށް ގޮވާލައްވާފައެވެ.

 މި ބަދަލާ ގުޅިގެން އެމް.އެޗް.ޕީ.ޔޫ.އިން ސޯޝަލް މީޑިއާގައި ބުނެފައިވާ ގޮތުގައި މިއީ 2023 ވަނަ އަހަރުން ފެށިގެން އެ ޔޫނިއަންގެ މެންބަރުން އެކުގައި ކުރި މަސައްކަތުން ސިއްހީ މަސައްކަތްތެރިންގެ ހައްގުތައް ކަށަވަރުކުރުމުގައި ލިބުނު ކުރިއެކުމެކެވެ. އަދި ސިއްހީ ދާއިރާގެ މުވައްޒަފުންނަކީ ސިއްހީ ޚިދުމަތް ރައްޔިތުންނަށް ފޯރުކޮށްދިނުމުގައި އެމީހުންގެ އާއިލާތަކާއި އަމިއްލަ ނަފުސުތަކަށް ދޭންޖެހޭ ސަމާލުކަން ނުދެވި، ގިނަ ޤުރުބާނީތަކެއް ވަމުންދާ ފަރާތްތަކެއް ކަމަށާއި ދިވެހިރާއްޖޭގައި މަސައްކަތްކުރަމުންދާ ހުރިހާ ސިއްހީ މަސައްކަތްތެރީންގެ ޙައްޤުތައް ކަށަވަރުކުރުމުގައި އެއްވެސް ފަސްޖެހުމެއް ނެތި އެ ޔޫނިއަންއިން ވަކާލާތުކޮށް މަސައްކަތްކުރުމުގައި ދިމެތިބޭނެކަމުގެ ޔަޤީންކަން އެ ޔޫނިއަންގެ މެންބަރުންނަށް ވަނީ ދީފައެވެ.