މިހާރު ކުރިއަށްދާ ކުޑަހުވަދޫ ކައުންސިލް ވޯލީބޯޅަ މުބާރާތުގެ އަންހެން ޑިވިޝަންގައި ބުދަ ދުވަހުގެ ރޭ ސީދާ ތިން ސެޓުން ޔޫބީއެމްއެލް ބަލިކޮށް ދާލު ބުލޫސް އިން އެޓީމުގެ ފެންވަރު ދައްކާލައިފިއެވެ.

މުޅި މެޗުގައި ވެސް ދާލު ބުލޫސްގެ ފަރާތުން ތަފާތު މޮޅު ކުޅުމެއް ފެމިގެންދިޔައިރު، މެޗުގެ ފުރަތަމަ ސެޓް އެޓީމުން ކާމިޔާބުކުރީ 14 ޕޮއިންޓަގެ ބޮޑު ލީޑަކާއެކު 11-25 ގެ ތަފާތުބޮޑު ނަތީޖާއަކުންނެވެ. އަދި މެޗުގެ ދެވަނަ ސެޓުގައި ޔޫބީއެމްއެލް ކުއީންސް އިން ކޮންމެ ވެސް ވަރެއްގެ ކުރިއެރުމެއް ފެނުނު ނަމަވެސް މިސެޓް ދާލު ބުލޫސް އިން ކާމިޔާބުކުރީ 11 ޕޮއިންޓްގެ ލީޑަކާއެކު 14-25 ގެ ނަތީޖައަކުންނެވެ.

މެޗުގެ ތިންވަނަ ސެޓުގައި ދާލު ބުލޫސްގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، މިސެޓް އެޓީމުން ކާމިޔާބުކުރީ 22 ޕޮއިންޓްގެ ބޮޑު ލީޑަކާއެކު 3-25 ގެ ތަފާތުބޮޑު ނަތީޖާއަކުންނެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ދާލު ބުލޫސްގެ ފާތުމަތު ތޮހޫރާ އެވެ.

11 މެއި 2025 އިން 17 މެއި 2025 ގެ ނިޔަލަށް ކުރުއަށްދާ މިމުބާރާތުގެ އަންހެން ޑިވިޝަނުގައި މިއަހަރު ހަތަރު ޓީމަކުން ވާދަކުރަމުން އަންނައިރު، މިޑިވިޝަނުގެ މެޗުތައް ކުރިއަށްދަނީ ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ދެޓީމު ފައިނަލަށް ހޮވޭގޮތަށެވެ.