ސާޖަރީއެއް ނޫން: އަމީތާބް އިޝާރާތްކުރީ އާޖެންޓީނާގެ ނާކާމިޔާބީއަށް!

ބޮލީވުޑްގެ މެގާސްޓާރު އަމީތާބް ބައްޗަން ހޮސްޕިޓަލުގައި އެނދުމަތިކޮށް، ސާޖަރީއެއް ކުރުމަށްފަހު އައިސީޔޫގައި އޮތް ކަމަށް ބުނެ އުފެދުނު ބޮޑު ކަންބޮޑުވުންތަކަށް އޭނާ ނިމުމެއް ގެނެސްދީފިއެވެ.

އަމީތާބް ހާމަކުރި ގޮތުގައި، އޭނާގެ ހާލު މުޅިން ރަނގަޅެވެ. އަދި ކުރީގެ ބްލޮގް މެސެޖަކީ އޭނާގެ އަމިއްލަ ސިއްހީ ހާލަތާ ގުޅޭގޮތުން ލިޔުނު އެއްޗެއް ނޫން ކަމަށާއި، އެއީ ފީފާ ވޯލްޑް ކަޕް ފައިނަލުގައި އާޖެންޓީނާ ބަލިވުމުން މެސީއާއި އެ ޓީމަށް އިޝާރާތްކޮށް ލިޔުނު މިސާލެއް ކަމަށް އޭނާ ވަނީ ބުނެފައެވެ.

އިންޑިއާގެ ނޫހަކަށް މައުލޫމާތު ދެމުން އަމީތާބް ބުނީ، "އަހަރެންގެ ހާލު ރަނގަޅު. އަހަރެން ސާޖަރީއެއް ނުކުރަން. އެއީ މީހުންނަށް ނުބައިކޮށް މާނަކުރެވުނު ލިޔުމެއް. އަހަރެން ދިނީ މިސާލެއް—ސާޖަރީއަކަށް ނުވަތަ އައިސީޔޫއަށްފަހު ގެއަށް އަންނަ މަރުހަލާއަކީ ޖިސްމާނީ ގޮތުން އެންމެ އުނދަގޫ މުއްދަތު. އެއީ ޗެމްޕިއަނަކު ބަލިވުމަށްފަހު، އަމިއްލަ ނަފްސާ ކުރިމަތިލާންޖެހޭ އުނދަގޫ މަރުހަލާއާ އެއްފަދަ ކަމެއް."

އޭނާ އިތުރަށް ކަށަވަރުކޮށްދެމުން ބުނީ، "އަހަރެން އިޝާރާތްކުރީ އާޖެންޓީނާ ބަލިވުމަށާއި، ބަލިވި ޗެމްޕިއަނެއްގެ ގޮތުގައި މެސީއަށް. ނަމަވެސް މީހުން ހީކުރީ އެއީ އަހަރެންގެ އަމިއްލަ ވާހަކައެއް ކަމަށް."

މި ކަންބޮޑުވުންތައް އުފެދުނީ އަމީތާބްގެ ބްލޮގްގައި "ހޮސްޕިޓަލުގައި، ސާޖަރީއެއްގައި އަދި އައިސީޔޫގައި.. ގެއަށް އައުމުގެ މަރުހަލާ" ފަދަ އިބާރާތްތަކެއް ބޭނުންކުރުމުންނެވެ. ނަމަވެސް އޭނާގެ ސިއްހަތު މުޅިން ރަނގަޅުކަން ކަށަވަރުވުމާއެކު ފޭނުންނަށް ވަނީ ބޮޑު ހަމަޖެހުމެއް ލިބިގެންގޮސްފައެވެ.

އަމީތާބް އަދިވެސް އަންނަނީ އޭނާގެ ފިލްމީ މަސައްކަތްތައް ބާރަށް ކުރިއަށްދަމުންނެވެ.

އެގޮތުން 'ކޯން ބަނޭގާ ކްރޯޅްޕަތީ' ގެ 18 ވަނަ ސީޒަން ހޯސްޓްކުރުމަށް ތައްޔާރުވަމުންދާއިރު، 'ކަލްކީ 2898 އޭޑީ' ގެ ދެވަނަ ބައިގެ ޝޫޓިންގެ މަސައްކަތްވެސް ދަނީ ކުރިއަށެވެ.