ދުނިޔޭގެ ފުޓްބޯޅައިގެ މައި އިދާރާ (ފީފާ) ހަލަބޮލިކޮށްލާފައިވާ ކޮރަޕްޝަނާއި ހިޔާނާތުގެ މައްސަލަތަކާ ގުޅިގެން، ފީފާގެ ރައީސް ޖިއާނީ އިންފަންޓީނޯ މަގާމުން "ވަކިވާން ޖެހޭ" ކަމަށް ފްރާންސްގެ ފުޓްބޯޅަ ލެޖެންޑް މިޝެލް ޕްލެޓިނީ އާދީއްތަ ދުވަހު ބުނެފިއެވެ.

އުމުރުން 56 އަހަރުގެ އިންފަންޓީނޯއަށް ފާޑުކިޔުންތައް އަމާޒުވާން ފެށީ، ވޯލްޑް ކަޕް ފަދަ ފީފާގެ މުބާރާތްތަކަށް އަމިއްލަ ފަރާތްތަކުގެ އިންވެސްޓްމަންޓްތައް ގެނައުމަށް އޭނާ ރޭވި ނާކާމިޔާބު ޕްލޭނާ ގުޅިގެންނެވެ. މީގެ އިތުރުން، ދާދި ފަހުން އުތުރު އެމެރިކާގައި ނިމިގެން ދިޔަ ވޯލްޑް ކަޕްގެ ތެރޭގައި ހިނގާދިޔަ ގިނަ މައްސަލަތަކަކާ ގުޅިގެން ވެސް އޭނާއަށް ވަރަށް ބޮޑަށް ފާޑުކިޔުން އަމާޒުވިއެވެ.

"އިގްތިސާދީ ކަންކަމަކީ ވަކި ކަމެއް. އެކަމަކު އިންފަންޓީނޯ ފެއިލްވެފައި މިވަނީ އޭނާއަކީ ކުޅިވަރުގެ ގަވާއިދުތަކުގެ ޒިންމާދާރު ބަލަދުވެރިޔާއަށް ވެފައި، އެ ގަވާއިދުތަކަށް އޭނާ އިހުތިރާމް ނުކުރުމުން،" ޔޫއެފާގެ ކުރީގެ ރައީސް ޕްލެޓިނީ 'ކެނަލް+' އަށް ދިން އިންޓަވިއުއެއްގައި ބުންޏެވެ.

ވޯލްޑް ކަޕްގައި 'ހައިޑްރޭޝަން ބްރޭކް' ނުވަތަ ފެންބުއިމުގެ ވަގުތުތަކުގެ ގޮތުގައި ގިނަ ފަހަރަށް ހަތަރު މިނެޓަށް ވުރެ ދިގުދެމިގެން ދިޔަ ވަގުތުތަކަކީ، މުބާރާތް ބްރޯޑްކާސްޓްކުރާ ފަރާތްތަކުން އިޝްތިހާރު ދެއްކުމަށް ބޭނުންކުރި ވަގުތުތަކެއް ކަމަށް ބުނެ ޕްލެޓިނީ ވަނީ އެކަމަށް ވަރަށް ބޮޑަށް ކިޔާފައެވެ.

މީގެ އިތުރުން، ފައިނަލް މެޗުގެ ހާފް-ޓައިމް ޝޯއަށް ކަނޑައެޅިފައިވާ އެންމެ ދިގު ވަގުތު ކަމަށްވާ 15 މިނެޓަށް ވުރެ މާ ބޮޑަށް ވަގުތު އިތުރުވެގެން ދިޔަ ދިއުމަށާއި، އެމެރިކާގެ ރައީސް ޑޮނަލްޑް ޓްރަމްޕް އިންފަންޓީނޯއަށް ގުޅުއްވުމާ ގުޅިގެން އެމެރިކާގެ ފޯވާޑް ފޮލާރިން ބަލޮގުން އަށް ދެއްކި ރަތް ކާޑުގެ ސަސްޕެންޝަން ފީފާއިން އުވާލުމާ ގުޅިގެން އުފެދުނު ހިތްހަމަނުޖެހުންތަކަށް ވެސް އޭނާ އަލިއަޅުއްވާލިއެވެ.

އިޝްތިހާރު ވަގުތުތަކަކީ ގަވާއިދުގައި އޮންނަ ކަމެއް ނޫން ކަމަށާއި ފައިނަލް މެޗުގެ ހާފް-ޓައިމް 30 މިނެޓަށް ދިގުދެމިގެން ދިއުމަކީ ވެސް ގަވާއިދުގައި އޮންނަ ކަމެއް ނޫން ކަމަށް ޕްލެޓީނީ ބުންޏެވެ. އަދި ރަތް ކާޑުގެ މައްސަލައަކީ މިއިން އެންމެ ގޯސް ކަންތައް ކަމުގައި އޭނާ ފާހަގަކުރިއެވެ.

އިންފަންޓީނޯ ނުވަތަ ފީފާއަކީ ގަވާއިދުތަކުގެ ބަލަދުވެރިޔާ ކަމަށާއި އެކަމަކު އެ ގަވާއިދުތަކަށް އިހުތިރާމު ނުކުރާކަމަށް ޕްލެޓިނީ ބުންޏެވެ.

ޕްލެޓިނީ މިހެން ބުނެފައިވާއިރު، ވޯލްޑް ކަޕަށް ފަހު، އަމިއްލަ ފަރާތްތަކުގެ އިންވެސްޓްމަންޓް ގެނައުމަށް އެކުލަވާލި 'ފީފާ ފޯވާޑް އެންޓަޕްރައިސަސް' ޕްލޭން އިންފަންޓީނޯ އުވާލަންދެން، ފީފާގެ މުބާރާތްތައް ބޮއިކޮޓް ކުރާނެ ކަމުގެ އިންޒާރު ޔޫއެފާ އިން ވެސް ވަނީ ދީފައެވެ. އަދި އަމިއްލަ ފަރާތްތަކުން ފައިނޭންސް ހޯދުމުގެ މައްސަލައިގައި އިންފަންޓީނޯގެ މައްޗަށް "ޖިނާއީ ގޮތުން ކަންކަން ގޯސްކޮށް ހިންގުމުގެ" ތުހުމަތު ވެސް ކޮށްފައެވެ.