ޝީޝާ ޔުނިޓީ ފުޓްސަލް ޗެލެންޖް 2025 ގެ ގުރުލުން ބާއްވައިފި

ޔުނިޓީ ފައުންޑޭޝަންގެ ފަރާތުން އިންތިޒާމުކޮށް އައްޑޫ ސިޓީގައި ބާއްވާ ޝީޝާ ޔުނިޓީ ފުޓްސަލް ޗެލެންޖް 2025 ގުރުލުން މިރޭ ބާއްވައިފިއެވެ.

18 މާރިޗު 2025 އިން 30 މާރިޗު 2025 ގެ ނިޔަލަށް އައްޑޫ ސިޓީގައި ކުރިއަށް ގެންދާ މިމުބާރާތުގައި މިއަހަރު ޖުމްލަ އަށް ޓީމަކުން ބައިވެރިވެފައިވާއިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރި އަށް ޓީމު ދެގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީފައިނަލަށް ހޮވޭގޮތަށެވެ.

މުބާރާތުގެ ޗެންޕިއަން ޓީމަށް 50،000 އަދި ރަނަރަޕް ޓީމަށް 20،000 ރުފިޔާގެ ފައިސާގެ އިނާމް ހުށަހަޅާފައިވާއިރު، އެހެނިހެން އިނާމުތަކާއެކު މުބާރާތުގެ ޖުމްލަ އިނާމު ފައިސާގެ އަދަދު 1،00،000 ރުފިޔާއަށްވުރެ ގިނައެވެ.

މީގެ އިތުރުން މި މުބާރާތުގެ ޓައިޓްލް ސްޕޮންސާ އަކަށް ހަމަޖައްސާފައި ވަނީ ރާއްޖޭގައި އެންމެ މަޤްބޫލް ސައިކަލް ބްރޭންޑް ކަމުގައިވާ ޖަޕާނުގެ މަޝްހޫރު ހޮންޑާ ކުންފުނީގެ އޮތޮރައިޒްޑް ޑިސްްޓްރިބިއުޓާރ ޝީޝާ އެވެ.

މުބާރާތުގައި ބައިވެރިވި ޓީމުތަކާއި ގުރޫޕް ބެހިފައިވާގޮތް:

ގުރޫޕް އޭ

1. ޔުނިޓެޑް މައިލޯ
2. ސްޓަރސް
3. އެސްކޭޕީ ޔުނައިޓެޑް
4. ބޭރުމަތި ސްޕޯރޓްސް ކްލަބް

ގުރޫޕް ބީ

1. ހިތަދޫ ޕޮލިސް ރިކްރިއޭޝަން ކްލަބް
2. އެމްއެފް ޔުނައިޓެޑް (މަރަދޫ ފޭދޫ ޔުނައިޓެޑް)
3. ޒެލޯން
4. ކްލަބް ރަސްގެދަރަ