މޭރީ ސްޕޯޓްސް ކުލަބު ކަޓުވާލުމަށްފަހު ސެމީގެ ފުރަތަމަ ޖާގަ އޭއެސްއެމްއެޗް-އާރުސީއަށް

މިހާރު ކުރިއަށްދާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގެ ކުއާޓާ ފައިނަލު ފުރަތަމަ މެޗުގައި މިރޭ އަބްދުއްސަމަދު މެމޯރިއަލް ހޮސްޕިޓަލް - ރެކްރިއޭޝަން ކުލަބު (އޭއެސްއެމްއެޗް-އާރުސީ) އާއި ގއ. ވިލިގިލީ (މޭރީ ސްޕޯޓްސް ކުލަބު) ވާދަކުރި މެޗު 5-2 ގެ ނަތީޖާއަކުން ކާމިޔާބުކޮށް އޭއެސްއެމްއެޗް-އާރުސީ އިން މުބާރާތުގެ ސެމީ ފައިނަލުން ޖާގަ ހޯދައިފިއެވެ.

އޭއެސްއެމްއެޗް-އާރުސީ މުބާރާތުގެ ކުއާޓާ ފައިނަލުން ޖާގަހޯދީ ކުއާޓާ ގުރޫޕް ސްޓޭޖުގައި ކުޅުން ތިން މެޗުން ވެސް މޮޅުވެ، ނުވަ ޕޮއިންޓާއެކު ގުރޫޕް އޭގެ އެއްވަނަ ޓީމުގެ ގޮތުގައެވެ. އަދި މޭރީ ސްޕޯޓްސް ކުލަބު ކުއާޓާ ފައިނަލުން ޖާގަހޯދީ ގުރޫޕް ސްޓޭޖުގައި ކުޅުނު ތިން މެޗުގެ ތެރެއިން އެއް މެޗުން މޮޅުވެ އަނެއް ދެމެޗުން އެއްވަރުވެ ލިބުނު ފަސް ޕޮއިންޓާއެކު ގުރޫޕް ސީގެ ދެވަނަ ޓީމުގެ ގޮތުގައެވެ.

ތިނަދޫ ސިޓީ އާރު އަވަށުގެ ފުޓްސަލް ދަނޑުގައި ކުޅުނު މިމެޗުގެ ފުރަތަމަ ހާފުގައި މޮޅަށް ކުޅެ އޭއެސްއެމްއެޗް-އާރުސީ އިން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ 5-0 ގެ ތަފާތުބޮޑު ނަތީޖާއަކުން އޭއެސްއެމްއެޗް-އާރުސީ ކުރީގައި އޮވެގެންނެވެ.

ނަމަވެސް މެޗުގެ ދެވަނަ ހާފުގައި ވިލިގިލީ ޓީމުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުން ދެލަނޑު ކާމިޔާބުކުރިއިރު އޭއެސްއެމްއެޗް-އާރުސީއަށް އިތުރު ލަނޑެއް ކާމިޔާބުކުރެވިފައެއް ނުވެއެވެ.

އެގޮތުން މިމެޗުގައި އޭއެސްއެމްއެޗް-އާރުސީ އަލީ ހާފިޒް (ހާއްޕެ) ދެލަނޑު ކާމިޔާބުކުރިއިރު، އެޓީމުގެ ކެޕްޓަން ނަވާޒު އަހުމަދު، އިބްރާހިމް އަހުމަދު އަދި އަހުނަފް ރަޝީދު މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވިފައިވަނީ އޭއެސްއެމްއެޗް-އާރުސީ އަލީ ހާފިޒް (ހާއްޕެ) އެވެ. އަދި މިރޭގެ މެޗުގައި ކާމިޔާބުކުރި ދެލަނޑާއެކު ހާއްޕެ މިމުބާރާތުގައި ކާމިޔާބުކުރި ލަނޑުގެ އަދަދަކީ ހަތެކެވެ.

މުބާރާތުގެ ސެމީ ފައިނަލުގައި އޭއެސްއެމްއެޗް-އާރުސީ ވާދަކުރަން ޖެހޭނީ މިރޭ ކުޅެވޭ ކުއާޓާ ފައިނަލުގެ ދެވަނަ މެޗުގައި އައުޓްލޯޒް އާއި ރެމްޕޭޖް ވާދަކުރާ މެޗުން މޮޅުވާ ޓީމަކާއި ދެކޮޅަށެވެ.

މިމުބާރާތުގައި މިއަހަރު ޖުމްލަ 12 ޓީމަކުން ވާދަކުރަމުން އަންނައިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިން ގުރޫޕުން ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ފުރުސަތު ލިބިފައެވެ.

ޗެންޕިއަން ޓީމަށް 50،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށައެޅިފައިވާ މިމުބާރާތުގެ ޓައިޓަލް ސްޕޮންސާއަކީ ތިނަދޫ ސިޓީ ކައުންސިލް އެވެ. އަދި އެސޯސިއޭޓެޑް ޕާޓްނާއެއްގެ ގޮތުގައި އިވެންޓްކާސް މޯލްޑިވްސް ހަމަޖައްސާފައިވާއިރު، ފޮޓޯ ގްރަފީ ޕާޓްނަރަކީ ފޮޓޯ މޯލްޑިވްސް އެވެ. އަދި ބެވަރޭޖް ޕާޓްނަރަކަށް ހަތްތަރި ކެފޭ ހަމަޖައްސާފައިވާއިރު، މީޑިއާ ޕާޓްނަރަކީ ގާފު ސްޕޯޓްސް އެވެ.