ފަސޭހަކަމާއެކު ގަސްދޮށު އެސްސީ ބަލިކޮށް އުތުރުކޮޑާއިން ލީގު ބުރުގެ ދެވަނަ ކަށަވަރުކޮށްފި

މިހާރު ކުރިއަށްދާ ރާއްޖޭގެ އެންމެ އަގުބޮޑު ފުޓްސަލް މުބާރާތް " ގައްދޫ ކައުންސިލް ފުޓްސަލް ޗެލެންޖް 2024" ގެ ފިރިހެން ޑިވިޝަނުގައި މިރޭ އުތުރުކޮޑާއި ގަސްދޮށު ސްޕޯޓްސް ކުލަބު ވާދަކުރި މެޗު ފަސޭހަކަމައެކު 6-0ގެ ތާފާތުބޮޑު ނަތީޖާއަކުން ކާމިޔާބުކޮށް އުތުރުކޮޑާއިން ލީގު ތާވަލުގެ ދެވަނަ ކަށަވަރުކޮށްފި އެވެ.

މިރޭ މެޗަށް ނުކުތް އިރު މުބާރާތުގައި ގަސްދޮށު ކުޅުނު ފަސް މެޗުގެ ތެރެއިން ތިން މެޗުން މޮޅުވެ, ދެ މެޗުން އެއްވަރުވެފައިވާއިރު, އުތުރުކޮޑާ ކުޅުނު ފަސް މެޗުގެ ތެރެއިން ދެމެޗުން މޮޅުވެ, ދެމެޗުން އެއްވަރުވެ އެއްމެޗުން އެޓީމް ވަނީ ބަލިވެފައެވެ.

މިރޭގެ މެޗުގެ ފުރަތަމަ ހާފުގައި މޮޅަށްކުޅެ އުތުރުކޮޑާއިން މެޗު ޑޮމިނޭޓްކުރިއިރު, ފުރަތަމާ ހާފުގެ ކުޅުން ނިމިގެން ދިޔައީ 3-0ގެ ނަތީޖާއަކުން އުތުރުކޮޑާ ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި އެޓީމުން އިތުރު ތިން ލަނޑު ކާމިޔާބުކުރިއިރު މެޗުގެ ކުޅުން ނިމިގެން ދިޔައީ 6-0ގެ ނަތީޖާއަކުން އުތުރުކޮޑާ ކުރީގައި އޮވެގެންނެވެ.

އެގޮތުން މި މެޗުގައި އުތުރުކޮޑާގެ މުހައްމަދު އައްޒާމް އަދި އަލީ ޝިޔާހު, މިއިން ކޮންމެ ކުޅުންތެރިޔަކު ދެ ލަނޑު ކާމިޔާބުކުރި އިރު, އެޓީމުގެ އާލިމް އަބްދުލް އަޒީޒް (ޓޯރޭ) އަދި އަބްދުالله ޝާފިއު މިއިން ކޮންމެ ކުޅުންތެރިޔަކު ވަނީ އެއް ލަނޑު ކާމިޔާބުކޮށްފައެވެ. އަދި މި މެޗުގެ މޮޅު ކުޅުންތެރިޔަކަށް ހޮވިފައިވަނީ އުތުރުކޮޑާގެ އަލީ ޝިޔާހު އެވެ.

މި ނަތީޖާއާއެކު ކުޅުނު ހަ މެޗުން އުތުރުކޮޑާއަށް 13 ޕޮއިންޓް ލިބިފައިވާއިރު, އެޓީމުން ލީގު ބުރުގެ ކުޅުން ނިންމާލީ ލީގު ތާވަލުގެ ދެވަނައިގައެވެ. އަދި މިމެޗުން ބަލިވި ގަސްދޮށުން މުބާރާތުގައި ކުޅުނު ހަމެޗުން ލިބުނު 11 ޕޮއިންޓާއެކު ލަނޑުގެ ތަފާތުން އެޓީމު މިވަގުތު އޮތީ ލީގު ތާވަލުގެ ހަތަރުވަނައިގައެވެ. އަދި މާދަމާ ކުޅޭ ސެމީ ފައިނަލުގެ ފުރަތަމަ މެޗުގައި މައިލޯ ސިޓީއާއި އެންމެ ފަހުގެ ޗެންޕިއަން ބޮއްކުރާ ވާދަކުރާއިރު, ސެމީ ފައިނަލުގެ ދެވަނަ މެޗުގައި ގަސްދޮށުން ނުކުންނާނީ އުތުރުކޮޑާއި ދެކޮޅަށެވެ.

މިއަހަރުގެ މުބާރާތުގެ ސީނިއަރ ފިރިހެން ޑިވިޝަނުގައި ހަތް ޓީމަކުން ވާދަކުރިއިރު، މިޑިވިޝަނުގެ މެޗުތައް ކުރިއަށް ގެންގޮސްފައިވަނީ ލީގުއުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖާއެއް ހޯދާ ހަތަރު ޓީމު ސެމީ ފައިނަލަށް ހޮވޭގޮތަށެވެ. އަދި ސެމީ ފައިނަލުން ބަލިވާ ދެޓީމުގެ މެދުގައި ތިންވަނަ ހޮވާ މެޗެއް ކުޅުމަށް ވަނީ ހަމަޖެހިފައެވެ.

25 އޮކްޓޯބަރު 2024 އިން 03 ނޮވެމްބަރު 2024 ގެ ނިޔަލަށް ކުރިއަށްދާ މިމުބާރާތުގެ ހުރިހާ މެޗެއް އިވެންޓްކާސްޓް މޯލްޑިވްސް އިން ލައިވްކުރާއިރު، މުބާރާތުގެ މީޑިއާ ޕާޓްނަރަކަށް ހަމަޖައްސާފައިވަނީ ގާފު ސްޕޯޓްސް އެވެ.