








އާސެނަލް އާއި ނިއުކާސަލް ވާދަކުރި މެޗުގެ ތެރެއިން...
އިނގިރޭސި ޕްރެމިއާ ލީގުގައި ރޭ ރަށުން ބޭރުގައި ނިއުކާސަލް ޔުނައިޓެޑާއި ދެކޮޅަށް ކުޅުނު މެޗު 2-2 ގެ ނަތީޖާއަކުން އެއްވަރުވެ، ލީޑު ފުޅާކުރުމަށް ލިބުނު ފުރުސަތު އާސެނަލް އިން ނަގާލައިފިއެވެ.
ލީގުގައި އާސެނަލް އެންމެ ފަހުން ކުޅުނު މެޗުގައި ހަލް ސިޓީ އަތުން 1-0 ގެ ނަތީޖާއަކުން މޮޅުވެފައިވާއިރު، ލީގުގައި ނިއުކާސަލް އެންމެ ފަހުން ކުޅުނު މެޗުގައި ފްލަމް އާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ.
ނިއުކާސަލްގެ ޖޭމްސް ޕާކުގައި ކުޅުނު މިމެޗުގެ ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ އާސެނަލް އިންނެވެ. މިލަނޑު ފުރަތަމަ ހާފުގެ 33 ވަނަ މިނެޓުގައި ކާމިޔާބުކޮށްދިނީ އިނގިރޭސި މިޑްފިލްޑަރު އެބެރެޗީ އެޒޭ އެވެ.
ނިއުކާސަލް އިން ނަތީޖާ އެއްވަރުކުރި ލަނޑު ދެވަނަ ހާފު ފެށިގެން ހަތަރުވަނަ މިނެޓުގައި އިނގިރޭސި ފޯވާޑް ހާވީ ބާންސް ކާމިޔާބުކުރިއިރު، މެޗުގެ 62 ވަނަ މިނެޓުގައި އެޓީމުގެ ޖަރުމަނު ޑިފެންޑަރު މާލިކް ތިއޯ ވަނީ އިތުރު ލަނޑެއް ކާމިޔާބުކޮށް މިމެޗުގައި ފުރަތަމަ ފަހަރަށް ނިއުކާސަލް ޔުނައިޓެޑަށް ލީޑު ހޯދައިދީފައެވެ.
އާސެނަލް އިން ނަތީޖާ އެއްވަރުކުރި ލަނޑު ދެވަނަ ހާފުގެ 78 ވަނަ މިނެޓުގައި ކެޕްޓަން މާޓިން އޮޑެގާޑް ތަނަވަސްކޮށްދިން ފުރުސަތެއްގައި އެޓީމަށް ކާމިޔާބުކޮށްދިނީ ފޯވާޑް ނޯނީ މަޑުއެކޭއެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.
މިނަތީޖާއެކު ލީގުގައި ކުޅުނު 11 މެޗުން އާސެނަލްއަށް 28 ޕޮއިންޓް ލިބިފައިވާއިރު، ދެވަނައިގައި ބްރައިޓަން އޮތީ 10 މެޗުން ހޯދި 22 ޕޮއިންޓާއެކުއެވެ. އަދި މިރޭ ހަލް ސިޓީ އާއި ދެކޮޅަށް ރަށުން ބޭރުގައި ކުޅޭ މެޗުން މޮޅުވެ މިފަރަގު ތިން ޕޮއިންޓަށް ކުޑަކުރުމުގެ ފުރުސަތު ބްރައިޓަންއަށް އެބައޮތެވެ.
މީގެ އިތުރުން މިމެޗުން ހޯދި އެއްޕޮއިންޓާއެކު ލީގުގައި ކުޅުނު 11 މެޗުން ނިއުކާސަލް ޔުނައިޓެޑަށް 13 ޕޮއިންޓް ލިބިފައިވާއިރު އެޓީމު މިވަގުތު އޮތީ ތާވަލުގެ 12 ވަނައިގައެވެ.








