ވަޓްސްއެޕް މެދުވެރިކޮށް ވާހަކަދައްކައި، މަކަރާއި ޙީލަތުން 32،000 ރުފިޔާ އަތުލި ކަމަށް ތުހުމަތުކުރެވޭ ސްކޭމް މައްސަލައަކާ ގުޅިގެން ތިން މީހަކު ހައްޔަރުކޮށްފިއެވެ.

ފުލުހުން މަޢުލޫމާތު ދެއްވި ގޮތުގައި، މި މައްސަލައަކީ ވަޓްސްއެޕް މެދުވެރިކޮށް މަކަރާއި ޙީލަތުން ފައިސާ އަތުލާފައިވާ ކަމަށް ބުނެ 2026 އޮކްޓޫބަރު 13 ވަނަ ދުވަހު ފުލުހުންނަށް ރިޕޯޓުކޮށްފައިވާ މައްސަލައެކެވެ. މި މައްސަލައާ ގުޅިގެން ހައްޔަރުކޮށްފައިވަނީ:

• ހ. ވެލަސްފަރުގެ / މާލެ، ޙުސައިން ސާމިރު (40އ)
• މާލެ ރަޖިސްޓްރީ ދަފްތަރު. ނަންބަރު ރސ 6007، މުޙައްމަދު ރީޙާން (33އ)
• ޖޯޖެޑްވިލާ / މާލެ، އަޙްމަދު ޝުޖާއު (46އ)

މި މައްސަލައާ ގުޅިގެން ހައްޔަރުކުރި މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ކޯޓުން ވަނީ ޙުސައިން ސާމިރާއި އަޙްމަދު ޝުޖާއު 15 ދުވަހަށް އަދި މުޙައްމަދު ރީޙާން 7 ދުވަހަށް ބަންދުކުރުމަށް އަމުރުކޮށްފައެވެ. މި މައްސަލަ ފުލުހުން ދަނީ އިތުރަށް ތަޙުޤީޤުކުރަމުންނެވެ.

މިފަދަ ސްކޭމްގެ މައްސަލަތަކުން ރައްކާތެރިވުމަށްޓަކައި، އޮންލައިން މެދުވެރިކޮށް ފޮނުވާ ގޮތް ނޭނގޭ ލިންކުތަކަށް ނުވަނުމަށާއި، އޯޓީޕީ ކޯޑު އެއްވެސް ފަރާތަކާ ޙިއްޞާނުކުރުމަށް ފުލުހުން ވަނީ އިލްތިމާސްކޮށްފައެވެ. އަދި އޮންލައިންކޮށް ވިޔަފާރިކުރުމާއި ފައިސާގެ މުޢާމަލާތްތައް ހިންގުމުގައި އެ މުޢާމަލާތްކުރެވޭ ފަރާތުގެ ޞައްޙަކަން ކަށަވަރުކުރުމަށާއި، ޒާތީ މަޢުލޫމާތާއި ބޭންކިންގ ތަފުޞީލުތައް އެހެން ފަރާތްތަކާ ޙިއްޞާނުކުރުމަށްވެސް އިލްތިމާސްކުރެއެވެ.

މަކަރާއި ޙީލަތުގެ އެއްވެސް ޢަމަލެއް ފާހަގަކުރެވިއްޖެނަމަ، ލަސްނުކޮށް ފުލުހުންގެ ހޮޓްލައިން 3322111 އަށް ނުވަތަ ފުލުހުންގެ އެންޓި-ސްކޭމް ސެންޓަރަށް ރިޕޯޓުކުރުމަށް ފުލުހުންގެ ޚިދުމަތުން ވަނީ އެދިފައެވެ.