ރަސްމާލޭގެ މެރީނާ މަޝްރޫޢަށް ފުރިހަމައަށް ތާއީދު ކުރައްވާ ކަމަށާއި ބޭރު މީހުންނަށް ނަފްރަތު ކުރުމަކީ އެމްޑީޕީގެ އަސާސާ ޚިލާފްކަމެއް ކަމުގައި ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ރަސްމާލެ މަޝްރޫޢާ ދެކޮޅަށް މަގުމައްޗަށް ނުކުތުމަށް އެމްޑީޕީން މަޝްވަރާކުރުމަށް ބޭއްވި ޤައުމީ މަޖިލީހުގެ ކުއްލި ބައްދަލުވުމުގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، މަޝްރޫޢާ ދެކޮޅަށް ވާހަކަދެއްކެވި ބައެއް މެންބަރުން އެމަނިކުފާނުގެ ނަންފުޅު ބޭނުންކުރައްވާފައިވާތީ، މި މަޝްރޫޢަށް އެއްވެސް ޝައްކެއްނެތް މިންވަރަށް ފުރިހަމައަށް ތާއީދު އޮތްކަން ސާފުކޮށްދެއްވަން ބޭނުންފުޅުވީ ކަމަށެވެ. އެގޮތުން މި ބޮޑު މަޝްރޫޢަކީ ރާއްޖެއަށް މުހިންމު ފުރުޞަތެއްގެ ގޮތުގައި ރައީސް ނަޝީދު ވަނީ ސިފަކުރައްވާފައެވެ.

ރާއްޖެއިން ބޭރު މީހުންނަށް ފުރުޞަތު ދިނުމުން އެހެން ދީންތަކަށާއި ޒަޔަނިސްޓުންނަށް ޖާގަ ލިބިގެންދާނެ ކަމަށް ބުނެ އެމްޑީޕީގެ ބައެއް މެންބަރުން ދައްކަމުންދާ ވާހަކަތަކަށް އިޝާރާތްކުރައްވާ ވިދާޅުވީ އެއީ އެއްވެސް އަސާސެއް ނެތް ވާހަކަތަކެއް ކަމަށެވެ. މިފަދަ ހަޤީޤަތާ ޚިލާފު ބިރުވެރިކަން އުފައްދަން މަސައްކަތް ކޮށްގެން ނުވާނެ ކަމަށް ވެސް ވިދާޅުވިއެވެ.

މި ބައްދަލުވުމުގައި ދިވެހި ތާރީޚަށް އަލިއަޅުއްވާލައްވަމުން ރައީސް ނަޝީދު ފާހަގަކުރެއްވި ގޮތުގައި، ދިވެހި އާބާދީއަކީ ޒަމާނުއްސުރެ އެކި ޤައުމުތަކުން އައިސް ވަޒަންވެރިވެފައިވާ މީހުންގެ މައްޗަށް ބިނާވެފައިވާ ފަޚުރުވެރި އާބާދީއެކެވެ. އެގޮތުން މީގެ 300 އަހަރު ކުރިން ރާއްޖެއަށް އައި ނައުފަހަރުގެ މިސާލު ދައްކަވަމުން، މިހާރު ތިއްބެވި ގިނަ ބޭފުޅުންނަކީ ވެސް އެގޮތަށް ހިޖުރަކުރި ކާބަފައިންގެ ދަރިފަސްކޮޅު ކަމަށް ވިދާޅުވިއެވެ.

ނިންމުމެއްގެ ގޮތުން ނަޝީދު ވިދާޅުވީ، ބޭރު މީހުންނަށް ނަފްރަތު ކުރުމާއި ހަރުކަށި ޤައުމިއްޔަތުކަމުގެ ވިސްނުން ޕާޓީގެ ތެރޭގައި ފެތުރުމަކީ އެމްޑީޕީ އުފެދިގެން އައި އަސާސްތަކާއި ޑިމޮކްރެޓިކް ހަމަތަކާ މުޅިން ޚިލާފު ކަމެއް ކަމަށެވެ. އަދި މިފަދަ ހަނި ވިސްނުންތަކުން ދުރުހެލިވެ، ތަރައްޤީއަށް ޖާގަ ދިނުމަށް އެމަނިކުފާނު ގޮވާލެއްވިއެވެ.