ދިވެހިރާއްޖޭގެ ޒަމާނީ ތާރީޚު ދުށް އެންމެ ހިތާމަވެރި، އަދި އެހާމެ ބިރުވެރި އެއް ހާދިސާއަކީ އުނގޫފާރު ދާއިރާގެ ކުރީގެ ޢިއްޒަތްތެރި މެންބަރު، އަދި ދީނީ ޢިލްމުވެރިޔާ ޑރ. އަފްރާޝީމް ޢަލީ އަނިޔާވެރި ގޮތަކަށް ޝަހީދުކޮށްލެވުނު ހާދިސާއެވެ. 2 އޮކްޓޫބަރު 2012 ވީ އަންގާރަ ދުވަހުގެ ރޭ ދަންވަރުގެ ވަގުތެއްގައި އެމަނިކުފާނު ދިރިއުޅުއްވި ގެކޮޅުގެ ސިޑިގޮޅި ކައިރީގައި ދިން މި ރަހުމުކުޑަ ހަމަލާއަށް މިއަދު މިވަނީ 14 އަހަރު ފުރިފައެވެ.

2 އޮކްޓޫބަރު 2012 އިން 2 އޮކްޓޫބަރު 2026 އަށް މި ފާއިތުވެދިޔަ ދިގު މުއްދަތުގެ ތެރޭގައި ވެސް އެ މަރުގެ ހިތާމައާއި އުދާސް ދިވެހި ރައްޔިތުންގެ ހިތްތަކުން ފިލައިގެން ނުދެއެވެ. މަރްޙޫމް ޑރ. އަފްރާޝީމް ޢަލީއަކީ އިސްލާމީ ޢިލްމުގެ ދާއިރާއިން ޕީއެޗް.ޑީ ހާސިލުކުރައްވައިގެން ހުންނެވި މަޑުމައިތިރި، ޚުލްޤުހެޔޮ ބޭފުޅެކެވެ.   ފާސް ނެންގެވީ މެލޭޝިޔާގެ އިންޓަރނޭޝަނަލް އިސްލަމިކް ޔުނިވަރސީޓީ މެލޭޝިޔާގައި، 2007 ވަނަ އަހަރުއެވެ. އިސްލަމިކް ރިވީލްޑް ނޮލެޖް އެންޑް ހެރިޓޭޖް (ފިޤްހު އެންޑް އުޞޫލުލްފިޤްހު)ގެ ރޮނގުން ޑޮކްޓަރ އޮފް ފިލޯސޮފީ  ހާސިލުކުރެއްވިއެވެ.

އެމަނިކުފާނުގެ ދީނީ ދަރުސްތަކާއި، ޓީވީ ޕްރޮގްރާމްތަކުގެ ޒަރީއާއިން ދީނީ ކަންކަމުގައި އުފެދޭ އެކި ސުވާލުތަކަށް ސާދާ އަދި ވިސްނޭނެ ފަދަ ޢިލްމީ ޖަވާބުތައް ދެއްވުމުގައި ފާހަގަކޮށްލެވުނު މުރުޝިދެކެވެ. މީގެއިތުރުން ރައްޔިތުންގެ މަޖިލީހުގައި ރައްޔިތުންގެ ޙައްޤުތައް ހިމާޔަތްކުރުމަށާއި، ޤައުމުގެ ޤާނޫނީ އޮނިގަނޑު ހަރުދަނާކުރުމަށް އެމަނިކުފާނު އަދާކުރެއްވި ދައުރަކީ އަގުނުކުރެވޭނެ ފަދަ މަތިވެރި ޚިދުމަތްތަކެކެވެ.

އިސްލާމްދީނަށް ހޭލުންތެރިކަން އިތުރުކުރުމާއި، ޚިދުމަތް ކުރުމާއި، ދީނީ ޢިލްމު އުނގަންނައިދިނުމުގެ ދާއިރާއިން ޝަރަފުވެރިކަމުގެ ޤައުމީ އިނާމު 2019ވަނަ އަހަރު ދައުލަތުން ވަނީ އެމަނިކުފާނުގެ ހަނދާނަށް އަރުވާފައެވެ. ޑޮކްޓަރ އަފްރާޝީމް ޢަލީއަކީ ރީތިކޮށް ޤުރްއާން ކިޔަވައިވިދާޅުވައި، ރީތިކޮށް ޢަރަބި ތާނަ ލިޔުއްވި ބޭފުޅެއްވެސްމެއެވެ.

މީހުން އަޑުއަހާހިތްވާގޮތަށް ވާހަކަފުޅު ދައްކަވާ މޮޅު ވާހަކަދެއްކުންތެރިއެކެވެ. ދަރިވަރުންގެ ލޯތްބާއި އިޙްތިރާމް ހޯއްދެވި ހުނަރުވެރި އުސްތާޛެކެވެ. ދީން އުނގަންނައިދެއްވަމުން ގެންދެވީ ދީނުގެ ސަމާޙަތާއި މެދުމިންކަން އިސްކުރައްވައިގެންނެވެ. އެމަނިކުފާނަކީ ކުޅަދާނަ ލިޔުއްވުންތެރިއެކެވެ. ހަރުދަނާ ސިޔާސީ މުޙައްނިކެކެވެ. އެމަނިކުފާނާ ޚިޔާލުތަފާތުވާ މީހުންނާވެސް ވަރަށް ގާތް ގުޅުމެއް ބެހެއްޓެވި ބޭފުޅެކެވެ. ވަރަށް ހިތްޕުޅުހެޔޮ މަޖާ މިޒާޖެއްގެ ބޭފުޅެއްވެސްމެއެވެ. ސިޔާސީ ވިސްނުންފުޅު ބިނާކުރެއްވީ، މާތްވެގެންވާ އިސްލާމްދީނުގެ އުޞޫލުތަކާއި، ޑިމޮކްރަސީގެ ހަރުދަނާ އުކުޅުތަކުގެ މައްޗަށެވެ.

ޕީ.އެޗް.ޑީ ހާސިލު ކުރެއްވުމަށްފަހު އެނބުރި ރާއްޖެ ވަޑައިގެން ޑޮކްޓަރ އަފްރާޝީމް ފުރަތަމަ އަދާކުރެއްވީ، އިސްލާމީ މަރުކަޒުގެ އިސް އިމާމުކަމުގެ ވަޒީފާއެވެ. އެއަށްފަހު، މިނިސްޓްރީ އޮފް ހޯމްއެފެއާޒްގެ ޑިރެކްޓަރ ޖެނެރަލް ކަމުގެ މަގާމު ފުރުއްވިއެވެ. މާލޭގައި ހުކުރު ނަމާދާއި ޢީދު ނަމާދުވެސް އިމާމުވެވަޑައިގެން ކުރެއްވިއެވެ. މީގެއިތުރުން، މަޢުހަދުއްދިރާސާތިލް އިސްލާމިއްޔާގެ ޤުރްއާން މުދައްރިސް ކަމުގެ މަޤާމާއި، މިނިސްޓްރީ އޮފް ހޯމްއެފެއާޒްގެ މިނިސްޓަރުގެ އެޑްވައިޒަރު ކަމުގެ މަގާމުވެސް ފުރުއްވިއެވެ.

ޑޮކްޓަރ އަފްރާޝީމް ޢަލީގެ ސިޔާސީ ޚިދުމަތަށް ބަލާއިރު، 2009 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިޚާބުގައި، އުނގޫފާރު ދާއިރާގެ މެންބަރު ކަމުގެ ގޮނޑި ކާމިޔާބު ކުރައްވައި، ރައްޔިތުންގެ މަޖިލީހަށް ވެދެވަޑައިގަތެވެ. އަދި ޖުޑީޝަލް ސަރވިސް ކޮމިޝަންގެ މެންބަރުކަމާއި، އެ ކޮމިޝަންގެ ނައިބު ރައީސްކަމާއި، ދިވެހި ރައްޔިތުންގެ ޕާޓީ (ޑީ.އާރު.ޕީ.)ގެ ދީނީ، އިޖުތިމާޢީ ގޮފީގެ ރައީސްކަމާއި، ފަހުން ޕްރޮގްރެސިވް ޕާޓީ އޮފް މޯލްޑިވްސް (ޕީ.ޕީ.އެމް)ގެ ކައުންސިލް މެންބަރުކަންވެސް ކުރެއްވިއެވެ.

ދިވެހިރާއްޖޭގެ އަޑާއި ޓެލެވިޜަން މޯލްޑިވްސްގެ ޕްރޮގްރާމްތަކުންނާއި، އަދި ރާއްޖޭގައި ޚަބަރުފަތުރާ އެހެން ސްޓޭޝަންތަކުން ޑޮކްޓަރ އަފްރާޝީމްގެ އަޑު ނީވޭ ދުވަހެއް އޭރު މަދެވެ. ވީ.ޓީ.ވީ.ގެ ދީނީ އަދި އިޖުތިމާޢީ ޕްރޮގްރާމުތަކުގައި މެދުނުކެނޑި ތިން އަހަރެއްހާ ދުވަހު ބައިވެރިވެވަޑައިގެންނެވިއެވެ. އެ ޕްރޮގްރާމުތަކުގެ ތެރޭގައި [ސީދާ ރާސްތާ] [އިޖުތިމާޢީ ދަރުބާރު] [ރަންހާރު] އަދި [ކުޑަކުދިންގެ ބަގީޗާ] ހިމެނެއެވެ. މީގެއިތުރުން، ދި ޓީ.ވީ. އިން ފޮނުވި ދީނީ ޕްރޮގްރާމެއް ކަމަށްވާ [ވިސްނާލާއިރު] މި ޕްރޮގްރާމުގައިވެސް ބައިވެރިވެވަޑައިގެންނެވިއެވެ. އެންމެފަހުން އެމަނިކުފާނު ބައިވެރިވެވަޑައިގެންނެވި ޕްރޮގްރާމަކީ މިނިސްޓްރީ އޮފް އިސްލާމިކް އެފެއާޒާއި، ޓީ.ވީ މޯލްޑިވްސް ގުޅިގެން ގެނެސްދެއްވި [ސާފު ޢަޤީދާއެއްގެ ބޭނުންތެރިކަން] މި މައުޟޫޢަށް ކުރިއަށް ގެންދެވުނު [އިސްލާމީ ދިރިއުޅުން] މި ޕްރޮގްރާމެވެ. އެމަނިކުފާނަކީ ދީނީ ރޮނގުން މީހުން ހޭލުންތެރިކުރެއްވުމަށް ގިނަގުނަ ލިޔުންތައް ލިޔުއްވި ޢިލްމުވެރިއެކެވެ.

ރައްޔިތުންގެ މަޖިލީހުގައި ޚިދުމަތް ކުރައްވަމުން ގެންދެވިއިރުވެސް ކުއްލިއްޔަތުއް ދިރާސާތިލް އިސްލާމިއްޔާގެ ދަރިވަރުންނަށް އުޞޫލުލް ފިޤްހު އަދި ގަވާއިދުލް ފިޤްހު ކިޔަވައިދެއްވިއެވެ. އަދި ރައްޔިތުންގެ މަޖިލީހުގެ ބައްދަލުވުންތައް ނިމުމުން ލިބިވަޑައިގެންނެވި ހުސް ވަގުތުތަކުގައި ވިލާ ކޮލެޖުގައިވެސް މާސްޓަރ އޮފް ޝަރީޢާ ކޯހުގެ ދަރިވަރުންނަށްވެސް ކިޔަވައިދެއްވިއެވެ.

ޑޮކްޓަރ އަފްރާޝީމް ޢަލީ، އެމަނިކުފާނުގެ ޙަޔާތްޕުޅުގެ އެންމެފަހު ދުވަސްވެސް ހޭދަކުރެއްވީ ވަރަށް އަވަދިނެތިއެވެ. އެ ދުވަހު ހެނދުނު ކުއްލިއްޔަތުއްދިރާސާތިލް އިސްލާމިއްޔާއަށް ކިޔަވައިދެއްވުމަށް ވަޑައިގެންނެވިއެވެ. އެއަށްފަހު، ރައްޔިތުންގެ މަޖިލީހުގެ އެ ދުވަހުގެ ޖަލްސާގައި ބައިވެރިވެވަޑައިގަތުމަށްފަހު، މެންދުރުފަހު ވީ.ޓީ.ވީ އަށް ވަޑައިގެން ދީނީ ޕްރޮގްރާމެއް ރެކޯޑުކޮށްދެއްވިއެވެ. އެރޭގެ އިރާކޮޅު ކިޔަވައިދެއްވުމަށް ވިލާ ކޮލެޖަށް ވަޑައިގެންނެވިއެވެ. އަދި އޭގެފަހުން އެރޭ ޓީ.ވީ މޯލްޑިވްސް އިން 10:00 އިން 11:00 އަށް ލައިވްކޮށް ކުރިއަށް ގެންދިޔަ [އިސްލާމީ ދިރިއުޅުން] މި ޕްރޮގްރާމުގައި [ސާފު ޢަޤީދާއެއްގެ ބޭނުންތެރިކަން] މި މައުޟޫޢަށް ވަރަށް ފުރިހަމައަށް އިންޞާފުކޮށްދެއްވިއެވެ.

ޑޮކްޓަރ އަފްރާޝީމް ޢަލީ އަވަހާރަކޮށްލެވުނީ، މިދެންނެވި ޕްރޮގްރާމުގައި ބައިވެރިވެވަޑައިގަތުމަށްފަހު އެނބުރި ގެޔަށް ވަޑައިގެންނެވި ވަގުތުގައެވެ.

އެމަނިކުފާނު ވަކިވެދިޔުމަކީ ދިވެހި މުޅި އުންމަތަށް ލިބުނު ފޫނުބެއްދޭނެ ވަރުގެ ބޮޑު ގެއްލުމެކެވެ. ދީނީ ގޮތުންނާއި ފިކުރީ ގޮތުން މެދުމިނުގެ ސިޔާސަތުތަކަށް ވަކާލާތު ކުރެއްވި މިފަދަ ޢިލްމުވެރިއެއްގެ ވަކިވުމަކީ ޤައުމުގެ ޢިލްމީ ޖައްވަށް ލިބުނު ބޮޑު އުނިކަމެކެވެ. 14 އަހަރު ފާއިތުވެގެން ދިޔައިރުވެސް އެމަނިކުފާނުގެ ޚިދުމަތްތަކާއި، ދެއްކެވި ހެޔޮ ނަމޫނާ މިއަދުވެސް ދިވެހިން ދަނީ ހަނދާންކުރަމުންނެވެ.

މިފަދަ ހިތާމަވެރި ހަނދާންތައް އާކުރާ ކޮންމެ ހިނދެއްގައި އެންމެހައި ދިވެހިންގެ އެދުމަކީ، އެ މާތް ޚިދުމަތްތެރިޔާއަށް ސުވަރުގޭގެ ދާއިމީ ނިޢުމަތް މިންވަރުކުރެއްވުމެވެ.

މާތް ﷲ، މަރުޙޫމް ޑރ. އަފްރާޝީމް ޢަލީގެ ފުރާނަފުޅަށް ހެޔޮ ރަޙްމަތް ލައްވައި، މަތިވެރިވެގެންވާ ޖަންނަތުލް ފިރުދައުސް މިންވަރު ކުރައްވާށި! އާމީން.