"މަޢުރިފާ" ފޮތް މައުރަޒު މިއަދު ހުޅުވައިފިއެވެ.

މި މައުރަޒު ކުރިއަށްދަނީ މިއަދުން ފެށިގެން 3 ދުވަހުގެ މުއްދަތަށް އިސްލާމީ މަތުކަޒުގެ ޖަލްސާކުރާ މާލަމުގައެވެ.

އިސްލާމިކް މިނިސްޓްރީން ބާއްވާ މި މައުރަޒު ކޮންމެ ދުވަހަކު ހަވީރު 4:00 އިން ފެށިގެން 06:00 އަދި ރޭގަނޑު 8:00 އިން ފެށިގެން 10:00 އާ ހަމައަށް ކުރިއަށްދާނެއެވެ.

މި މައުރަޒުގެ މަގްސަދަކީ ދީނީ އަދި އިލްމީ ފޮތްތަކަށް އާންމުން އަހުލުވެރިކުރުވުން ކަމަށެވެ. އަދި ފޮތް އުފައްދާ ފަރާތްތަކާއި ފޮތްވިއްކާ ފަރާތްތަކަށް އެ ފަރާތްތަކުގެ ފޮތްތައް ވިއްކުމުގެ ފުރުސަތު ހޯދައިދިނުމާއި ފޮތް ގަންނަން ބޭނުންވާ ފަރާތްތަކަށް އަގުހެޔޮކޮށް ފޮތް ގަތުމުގެ ފުރުސަތު ހޯދައިދިނުމަކީވެސް މި މައުރަޒުގެ މަގްސަދެއްކަމަށް އިސްލާމިކް މިނިސްޓްރީން ބުންޏެވެ.

މީގެއިތުރުން، މި މައުރަޒަށް ޒިޔާރަތްކުރާ ފަރާތްތަކުގެ މެދުގައި ކޮންމެ ދުވަހަކު ގުރުއަތުލުމެއް ބޭއްވުމަށް ވެސް ވަނީ ހަމަޖެހިފައެވެ. އެގޮތުން ގުރުއަތުން ހޮވޭ ނަސީބުވެރި ފަރާތަކަށް ކޮންމެ ދުވަހަކު 1,000 (އެއްހާސް) ރުފިޔާގެ ފައިސާގެ އިނާމެއް ލިބޭނެއެވެ. މި ގުރުއަތުލުން ކުރިއަށްދާނީ ކޮންމެ ރެއެއްގެ 10:00 ގައެވެ.