މޭކް އަ ވިޝް އޮސްޓްރޭލިއާގެ ފަރާތުން ކިޑްނީ ޓްރާންސްޕްލާންޓެއް ހެދި އުމުރުން 12 އަހަރުގެ އަންހެން ކުއްޖެއްގެ އެންމެ ބޮޑު ހުވަފެން ހަގީގަތަކަށް ހަދާދީފިއެވެ.

ޓްރީޝާ ނަމަކަށް ކިޔާ އެ ކުއްޖާގެ އެންމެ ބޮޑު އެއް އުންމީދަކީ ބޮޑުވެގެން ފްލައިޓް އެޓެންޑެންޓަކަށް ވުމެވެ.

އެހެންކަމުން މޭކް އަ ވިޝް އޮސްޓްރޭލިއާގެ ފަރާތުން ޓްރީޝާގެ މި ހުވަފެން ހަގީގަތަކަށް ހަދާދީ އެއް ދުވަހަށް ފްލައިޓް އެޓެންޑެންޓަކަށް ވުމުގެ ފުރުސަތު ވަނީ ދީފައިއެވެ.

މި ހާއްސަ ދުވަހު އޭނާ ވަނީ ފްލައިޓް އެޓެންޑެންޓުންލާ ރަސްމީ ޔުނީފޯމު ލައިގެން، ބޯޓަށް އެރި ފަސިންޖަރުންނަށް މަރުހަބާ ކިޔުމުގައާއި ކްރޫންނަށް އެހީތެރިވުމުގައި ހަރަކާތްތެރިވެފައެވެ.

މިއީ ގިނަ ދުވަސްތަކެއް ވަންދެން ބަލި އެނދުގައި ހޭދަކުރުމަށްފަހު، އޭނާގެ ހިތްވަރުގަދަކަން ފާހަގަކޮށް، އާ ދިރިއުޅުމަކަށް މަރުހަބާ ކިޔުމުގެ ގޮތުން ކުރިއަށްގެންދިޔަ ވަރަށް އަސަރުގަދަ ހަރަކާތެކެވެ.

މަންޒަރު ދުށް ފަރާތްތަކުން ބުނާގޮތުގައި، އެ ކުއްޖާގެ މޫނުމަތިން ފެންނަން ހުރީ އިންތިހާ ދަރަޖައިގެ އުފާވެރިކަމެވެ.