މަދިރީގެ ސަބަބުން ޖެހޭ ނުރައްކާތެރި ބައްޔެއް އޮސްޓްރޭލިއާގައި ފެތުރެން ފަށައިފިއެވެ.

މީޑިއާ ރިޕޯޓުތައް ބުނާ ގޮތުގައި އޮސްޓްރޭލިއާއިން ފެނިފައިވަނީ ޖަޕަނީސް އެންސެޕަލިޓިސް އެވެ. އެ ބަލި އޮސްޓްރޭލިއާއިން ފެނިފައިވާން ހާމަވީ އޫރުތަކެއް ވިހެއި އިރު އޭގެ ދަރިން މަރުވެފައިވާތީ ހެދި ތަހުލީލުތަކުންނެވެ. އެގައުމުގައި އެ ބަލި ފެތުރެން ފަށާފައިވާކަން އެނގުނު އިރު، ބަލި ފެތުރެން ފަށާފައިވާތާ ގިނަ ދުވަސްތަކެއް ވެފައިވާކަމުގެ ބިރު އޮތީ ހީވެފައެވެ.

އޮސްޓްރޭލިއާގެ ނޫސްތަކުން ރިޕޯޓުކޮށްފައިވާ ގޮތުގައި ޖަނަވާރުންނަށް ޖެހޭ އެ ބަލި އެގައުމުގެ އިންސާނުންގެ ގައިންވެސް ވަނީ ފެނިފައެވެ. އެގޮތުން އެ ބަލި ޖެހިފައިވާ 9 މީހަކު ފެނިފައިވާއިރު، ބަލި ޖެހިފައިވާކަމަށް ބެލެވޭ އިތުރު ކޭސްތަކެއްވެސް ގާތުން ދިރާސާ ކުރަމުން ދާ ކަމަށް ވެއެވެ.

ޖަޕަނީސް އެންސެޕަލިޓިސް އަކީ މަދިރީގެ ސަބަބުން ޖެހޭ ނުރައްކާތެރި ބަލިތައް ކަމުގައި ޑެންގީ، ޗިކުންގުންޏާ ރީނދޫ ހުން ފަދަ ބަލިތަކުގެ އާއިލާއަށް ނިސްބަތްވާ ބައްޔެކެވެ. މި ބައްޔަކީ އިންސާނާގެ ފުރާނަ އަށްވެސް ނުރައްކާވާ ބައްޔެކެވެ. އެ ބަލީގައި މިދިޔަ މަހުގެ 28 ވަނަ ދުވަހު އެގައުމުގެ މީހަކު މަރުވެފައިވާ ކަމަށްވެސް ރިޕޯޓުތައް ބުނެއެވެ.

އެމީހާ މަރުވެފައިވަނީ އެ ބަލި ޖެހިގެން ކަން ހާމަވީ، އެމީހާ މަރުވުމުން ހެދި އޮޓޮޕްސީ ރިޕޯޓުންނެވެ.