އިސްލާމީ ކަންތައްތަކާއި އައުޤާފާ ބެހޭ ވުޒާރާއިން ކޮންމެ އަހަރަކު ބާއްވަމުން ގެންދާ "މަޢުރިފާ" ފޮތް މައުރަޒު އަންނަ އޮކްޓޯބަރ މަހު ބޭއްވުމަށް ނިންމައިފިއެވެ.

އެ ވުޒާރާ އިން ބުނީ މި މައުރަޒު ބޭއްވުމަށް ނިންމާފައިވަނީ އޮކްޓޯބަރު 1 އިން 3 އަށް (ބުރާސްފަތި, ހުކުރު އަދި ހޮނިހިރު) އިސްލާމީ މަރުކަޒުގެ ޖަލްސާކުރާ މާލަމުގައި ކަމަށެވެ. އަދި ކޮންމެ ދުވަހެއްގެ ހަވީރު 16:00 އިން 18:00 އަށް އަދި ރޭގަނޑު 20:00 އިން 22:00 އަށް ކުރިއަށް ގެންދާނެ ކަމަށެވެ.

މި ފޮތް މައުރަޒުގައި ޖުމްލަ 22 ފަރާތަކުން ބައިވެރިވުމަށް ވަނީ ހަމަޖެހިފައިވާ ކަމަށާއި މީގެތެރޭގައި ރާއްޖޭގެ ބޮޑެތި ބުކްޝޮޕްތަކުގެ އިތުރުން ޖަމްޢިއްޔާ ޖަމާޢަތްތަކާއި، މުވައްސަސާތަކާއި އަދި އަމިއްލަ ފޮތް ލިޔުންތެރިން ހިމެނޭ ކަމަށް އެ ވުޒާރާ އިން ބުނެއެވެ. މި މައުރަޒުން ކުޑަކުދިންނަށް ޚާއްޞަ ވާހަކަފޮތްތަކާއި، ދިރާސާކުރާ ފަރާތްތަކަށް ބޭނުންވާ ފޮތްތަކާއި، ދިވެހިބަހަށް ޚާއްޞަ ޢިލްމީ ފޮތްތަކުގެ އިތުރުން ވެސް ގިނަ ކެޓަގަރީތަކެއްގެ ފޮތްތައް ގަންނަން ލިބޭނެކަން ވަނީ ހާމަކޮށްފައެވެ.

މިއަހަރު މުޅިން އަލަށް ކުރިއަށްގެންދާ ޚާއްޞަ ކަމެއްގެ ގޮތުން، ލިޔުންތެރިންގެ ތަޖުރިބާ ޙިއްޞާކުރުމަށް ޚާއްޞަ "ކޯނާއެއް" ބެހެއްޓުމަށް ވަނީ ހަމަޖެހިފައެވެ. މި ކޯނާ ޤާއިމުކުރުމުގެ މަޤްޞަދަކީ ލިޔުންތެރިން، އެބޭފުޅުންގެ ފޮތްތަކާބެހޭގޮތުން ތަޖުރިބާ ޙިއްޞާކުރުމާއެކު، ޒުވާން ޖީލު ލިޔުންތެރިކަމާއި ފޮތް ކިޔުމަށް ލޯބިޖެއްސުމެވެ. އަދި ޑޮކްޓަރ އާމާލް ޢަލީގެ ފޮތް ހުށަހެޅުއްވުން ވެސް މި ކޯނާގައި ކުރިއަށްދާނެއެވެ.

މީގެއިތުރުން، މިއަހަރު މައުރަޒަށް ޒިޔާރަތްކުރ ފަރާތްތަކުގެ ތެރެއިން ގުރުއަތުން ހޮވޭ ނަސީބުވެރި ފަރާތަކަށް ކޮންމެ ދުވަހަކު 1,000 (އެއްހާސް) ރުފިޔާގެ ފައިސާގެ އިނާމެއް ލިބޭގޮތަށް ވަނީ ހަމަޖެހިފައެވެ. ގުރުއަތުލުން އޮންނާނީ ކޮންމެ ރެއެއްގެ 22:00 ގައެވެ.