ވެރިއެއްގެ ޙަޤީޤީ ޒިންމާއަކީ އިޚްލާޞްތެރިކަމާއެކު ހުރަސްތަކާ ކުރިމަތިލައްވައި ޤައުމު އެކަށީގެންވާ ޙާލަތަކަށް ވާސިލުކޮށްދިނުން ކަމުގައި އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.

'އެކްސް' ގައި ކުރެއްވި ޕޯސްޓެއްގައި ސައީދު ވިދާޅުވީ ރާއްޖޭގެ ވިޔަފާރިއާއި އިޤްތިޞާދީ ތަރައްޤީއަށް ބަލާއިރު، އެންމެ މުހިންމު އެއް މަޝްރޫޢަކީ މާލޭ ވިޔަފާރި ބަނދަރުގެ ޙާލަތު ބަދަލުކޮށް، އެ ބަނދަރު ޒަމާނީ ފެންވަރަކަށް ތަރައްޤީކުރުން ކަމަށެވެ.

ދުނިޔޭގެ އިޤްތިޞާދީ ޙަޤީޤަތްތަކާ އެއްގޮތަށް މާލޭ ބަނދަރު ތަރައްޤީކޮށް، ވިޔަފާރީގެ ކާރުބާރު ހަލުވިކޮށްދިނުމުގެ މަޝްވަރާތައް މީގެ އެތައް އަހަރެއް ކުރިންސުރެ ކަމާބެހޭ އިދާރާތަކުން ކުރަމުންދިޔަކަމަށާއި އެހެންނަމަވެސް، އެތައް ޒަމާނެއް ފާއިތުވެގެން ދިޔައިރުވެސް ރާއްޖޭގެ މައި ބަނދަރަށް ބޮޑު ބަދަލެއް އައިސްފައިނުވާކަމަށް މިނިސްޓަރ ވިދާޅުވިއެވެ. އަދި މިހާތަނަށް ކުރެވިފައިވަނީ ވަރަށް ކުދިކުދި މަސައްކަތްތަކެއް ކަމަށް ވެސް ވިދާޅުވިއެވެ.

މިނިސްޓަރ ސައީދު ވިދާޅުވީ މިކަމަށް ނިމުމެއް ގެނައުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްނަންގަވައި، ބަނދަރު ޒަމާނީކުރުމުގެ ޢަމަލީ މަސައްކަތްޕުޅު ވަނީ ފައްޓަވާފައި ކަމަށެވެ. އަދި ޤައުމުގައި ހުރި މިފަދަ ބޮޑެތި މައްސަލަތައް ޙައްލުކުރެއްވުމުގައި ރައީސް ގެންގުޅުއްވަނީ ޙިކުމަތްތެރި ސިޔާސަތެއް ކަމަށް ވެސް ވަނީ ވިދާޅުވެފައެވެ.

މީގެއިތުރުން ދުނިޔޭގެ މަސްރަޙަށް އަންނަ ބަދަލުތަކާއި އިޤްތިޞާދީ ގޮންޖެހުންތަކުގެ ތެރޭގައި ޤައުމު ދޫކޮށްނުލައްވައި، ރައީސް މުޢިއްޒު ސާބިތުކަމާއެކު މަސައްކަތް ކުރައްވަމުން ދާކަން ފާހަގަކުރައްވާ، މިނިސްޓަރު ސަޢީދު ވިދާޅުވީ ވެރިއެއްގެ ޙަޤީޤީ ޒިންމާއަކީ އިޚްލާޞްތެރިކަމާއެކު ހުރަސްތަކާ ކުރިމަތިލައްވައި ޤައުމު އެކަށީގެންވާ ޙާލަތަކަށް ވާސިލުކޮށްދިނުން ކަމަށެވެ.

މި މަޝްރޫޢު ފުރިހަމަވެގެން ދިއުމާއެކު، ރާއްޖޭގެ އިޤްތިޞާދަށް އިންޤިލާބީ ބޮޑު ބަދަލެއް އަންނާނެ ކަމަށް އިޤްތިޞާދީ މާހިރުން ވެސް ޤަބޫލުކުރެއެވެ. ޚާއްޞަކޮށް މުދާ ބޭލުމާއި ކްލިއަރކުރުމުގެ ދުވެލި އެތައް ގުނައަކަށް އަވަސްވެ، ވިޔަފާރިވެރިންނަށް މުދާ އެތެރެކުރުމުގައި ދިމާވާ ދަތިތަކަށް ދާއިމީ ޙައްލެއް ލިބިގެންދާނެއެވެ.