މޯލްޑިވިއަންގެ އައު ސީޕްލޭން ޓާމިނަލް ރަސްމީކޮށް ހުޅުވައިފިއެވެ.

ފަތުރުވެރިންނަށް ރާއްޖޭގެ ގުދުރަތީ ރީތިކަމާއި ސަގާފަތް ދައްކުވައިދޭ ތީމަކަށް ފަރުމާކޮށްފައިވާ މި ޓާމިނަލްގެ ޚާއްޞަ ޚިދުމަތްތަކެއް ދިނުމަށް ވެސް ވަނީ ހަމަޖެހިފައެވެ.

އެގޮތުން ތެރޭގައި "ހުވަނދުމާ" ލައުންޖާއި މަތީ ފަންގިފިލާގައި ހިމެނޭ 2 ޕްރައިވެޓް ލައުންޖާއި، ކުޑަކުދިން ކުޅޭ ސަރަޙައްދަކާއި، މޯލްޑިވިއަންގެ އަމިއްލަ ބްރޭންޑްގެ ސުވެނިއަރ އަދި ކާބޯތަކެތި ލިބޭނެ ކިއޮސްކެއް ވަނީ ހިމަނާފައެވެ. އަދި މި ޓާމިނަލްގެ އެތެރޭގައި އެއްފަހަރާ 90 މީހުންނަށް އަދި ބޭރުގައި 40 މީހުންނަށް ޚިދުމަތް ދިނުމުގެ ޖާގަ ވެސް ވަނީ ތަނަވަސްކޮށްފައެވެ.

މި ޓާމިނަލްގެ އެންމެ ޚާއްޞަ އެއް ކަމެއްގެ ގޮތުގައި ފާހަގަކުރެވެނީ ގާޑަން އޭރިއާއަކާއި، ސީޕްލޭން ދަތުރުކުރާ ވޯޓަރވޭ ފެންނަ ގޮތަށް ހަދާފައިވާ ވިއުއިންގ ޑެކެވެ. އަދި ތިމާވެށި ރައްކާތެރިކުރުމަށް މި މަޝްރޫޢުގެ ދަށުން ބޮޑު އިސްކަމެއް ދީފައިވާއިރު، ޕްލާސްޓިކް ފުޅި ކަނޑަށް އެޅުނަ ނުދިނުމަށްޓަކައި ވޭސްޓް ބޮޓްލް ރީސައިކަލް ކުރެވޭނެ ނިޒާމު ވަނީ ގާއިމުކޮށްފައެވެ.

ދަތުރުވެރިން އުފުލުމަށް ބޭނުންކުރާ ވެހިކަލްތަކުގެ ތެރޭގައި ބީވައިޑީގެ ބެޓެރި ވެހިކަލްތައް ބޭނުންކުރުމަށް ނިންމާފައިވާއިރު، މުވައްޒަފުންގެ ޚިދުމަތުގެ ފެންވަރު ރަނގަޅުކުރުމަށް އައު ތަމްރީނު ގައިޑްލައިންތަކާއި ސްޓާފް ކެންޓީނުގެ ޚިދުމަތް ވެސް މިހާރުވަނީ ފަށާފައެވެ.

މޯލްޑިވިއަންގެ ފްލީޓުގައި މިވަގުތުވެސް 11 ސީޕްލޭން ބޭނުންކުރެއެވެ. އަދި އިތުރު 2 ސީޕްލޭން ގެނައުމަށް ދަނީ މަސައްކަތްކުރަމުންނެވެ.