އުޞޫލީ ގޮތުން ރާއްޖޭގައި ރެސިޑެންސީ ޕްރޮގްރާމެއް ހިންގުމަކީ ރަނގަޅު ކަމެއް ނަމަވެސް، އަބޫދާބީގެ އީގަލް ހިލްސްއާއެކު ވެފައިވާ އެއްބަސްވުން ސިއްރުކޮށްފައި އޮތުމާމެދު ކަންބޮޑުވުން ފާޅުކުރައްވައި، އެ އެއްބަސްވުން ވީ އެންމެ އަވަހަކަށް ރައްޔިތުންގެ މަޖިލީހަށް ފޮނުވުމަށް ކުރީގެ ރައީސް އަދި އިދިކޮޅު މައި ޕާޓީ، އެމްޑީޕީގެ ޗެއަރޕާސަން މުޙައްމަދު ނަޝީދު ގޮވާލައްވައިފިއެވެ.

ރައީސް ނަޝީދު "އެކްސް" ގައި ކުރެއްވި ޕޯސްޓެއްގައި ވިދާޅުވީ، އީގަލް ހިލްސްގެ ކޮންޓްރެކްޓް އަދިވެސް ފެންނަން ނެތް ކަމަށާއި އެ ހާމަކޮށްފައި ނުވާ ކަމަށެވެ. އަދި މިހާތަނަށް އިވިފައިވާ މަޢުލޫމާތުތަކަށް ބަލާއިރު އެމަނިކުފާނުގެ މައިގަނޑު ދެ ކަންބޮޑުވުމެއް އެބައޮތް ކަމަށާއި، އެއީ މަޝްރޫޢުން ދައުލަތަށް އެޑްވާންސް ފައިސާ ނުލިބުމާއި، މި މަޝްރޫޢު މާލެ ސަރަޙައްދުގައި ހިންގަން ނިންމާފައި އޮތުން ކަމަށް ވިދާޅުވިއެވެ.

ރައީސް ނަޝީދު ވިދާޅުވި ގޮތުގައި ސަރުކާރަށް މިވަގުތު އެންމެ ރަނގަޅު ގޮތަކަށް ވާނީ މި އެއްބަސްވުން އަވަހަށް ރައްޔިތުންގެ މަޖިލީހަށް ފޮނުވައި، ސަރުކާރުގެ އަޣުލަބިއްޔަތު އޮތް މަޖިލީހުގެ ތެރެއިން މި މަޝްރޫޢަށް ބޭނުންވާ ޤާނޫނީ އޮނިގަނޑު ފާސްކުރުމެވެ.

ރަސްމާލެ ތަރައްޤީކުރުމަށް ސަރުކާރުން އީގަލް ހިލްސް ކުންފުންޏާއެކު ސޮއިކުރި 20 ބިލިއަން ޑޮލަރުގެ މި ބޮޑު މަޝްރޫޢަކީ މިހާރު ރާއްޖޭގެ ސިޔާސީ އަދި އިޖުތިމާޢީ މަސްރަޙުގައި އެންމެ ބޮޑެތި ފާޑުކިޔުންތަކެއް އަމާޒުވެފައިވާ އެއް މައްސަލައެވެ. އެގޮތުން ރަސްމާލެއިން ހިއްކާފައިވާ 500 ހެކްޓަރަށްވުރެ ބޮޑު ބިން، އެއްވެސް އިކުއިޒިޝަން ކޮސްޓެއް ނުވަތަ ކުއްޔެއް ނުނަގައި 99 އަހަރުގެ ދިގު މުއްދަތަކަށް ބޭރު ކުންފުންޏަކަށް ދީފައިވާ ކަމަށް ބުނެ އިދިކޮޅު ފަރާތްތަކުން އަންނަނީ ބޮޑެތި ކަންބޮޑުވުންތައް ފާޅުކުރަމުންނެވެ.

އަދި މި ބިމުގައި ތަރައްޤީކުރާ ތަންތަނަށް ތިންވަނަ ފަރާތްތަކަށް ދާއިމީކޮށް އާވަމުންދާ (ރޯލިންގ) ލީސް ދިނުމުގެ ބާރު އީގަލް ހިލްސްއަށް ދީފައިވާތީ، މިއީ ރާއްޖޭގެ ބިމުގެ މައްޗަށް ބޭރު މީހުންނަށް ދާއިމީ މިލްކުވެރިކަން ލިބިގެންދާނެ ކަމެއް ކަމަށް ބުނެ އިދިކޮޅުން ދަނީ އަޑުއުފުލަމުންނެވެ.

މި އެއްބަސްވުމުގެ ސިއްރުވެރިކަމާއި، ޤާނޫނުއަސާސީގެ 250 އަދި 251 ވަނަ މާއްދާއާ ޚިލާފު ކަންތައްތަކެއް ހުރި ކަމަށް ބުނެ، މި އެއްބަސްވުން ބާޠިލުކުރުމަށާއި އަމަލުކުރުން ވަގުތީގޮތުން ފަސްކުރުމުގެ އަމުރަކަށް އެދި ދިވެހިރާއްޖޭގެ ސުޕްރީމް ކޯޓަށް ދުސްތޫރީ މައްސަލައެއްވެސް މިހާރު ވަނީ ހުށަހަޅާފައެވެ.

ސަރުކާރުން މި އެއްބަސްވުމުގެ ފުރިހަމަ ތަފްޞީލު އަދިވެސް ހާމަކޮށްފައި ނުވި ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރަސްމާލެއިން ބޭރުގެ އިންވެސްޓަރުންނަށް ބިން ދޫކުރާނީ ހަމައެކަނި ކުއްޔަށް ކަމަށް ވިދާޅުވެފައެވެ.