ރައީސުލްޖުމްހޫރިއްޔާގެ ރިޔާސީ ވަޢުދުފުޅުގެ ތެރޭގައި ހިމެނޭ އަދި އެމަނިކުފާނު ޚާއްޞަ އިސްކަމެއް ދެއްވައިގެން ކުރިއަށްގެންދަވާ، "އިޙްތިރާމް އަދާކުރުމުގެ ޤައުމީ މަޝްރޫޢު" ވިލަރެސްކުރާ ޚާއްޞަ ކޮމިޓީ އެކުލަވާލައި، އެ ކޮމިޓީގެ ފުރަތަމަ ރަސްމީ ބައްދަލުވުން މިއަދު ބާއްވައިފިއެވެ.

ފަންނާއި ސަޤާފަތާއި ތަރިކައާ ބެހޭ ވުޒާރާގައި ކުރިއަށްދިޔަ މި ބައްދަލުވުމަކީ، މި ޤައުމީ ކެމްޕެއިން ފެށުމަށްޓަކައި ވާންޖެހޭ އެންމެ ފަހުގެ ތައްޔާރީތައް ވަމުން އަންނަ ދަނޑިވަޅެއްގައި، ކޮމިޓީގެ އިރުޝާދުގެ ދަށުން ކަންކަން ރޭވުމަށް ބޭއްވުނު މުހިންމު ބައްދަލުވުމެކެވެ.

މި މަޝްރޫޢުގެ ކަންކަން ހިންގުމާއި ވިލަރެސްކުރުން ހަރުދަނާކުރުމަށް އެކުލަވާލާފައިވާ މި ކޮމިޓީގައި ސަރުކާރުގެ ކަމާގުޅުންހުރި ވުޒާރާތަކާއި ޕަބްލިކް ސަރވިސް މީޑިއާ (ޕީއެސްއެމް) ހިމެނޭހެން ޖުމްލަ 9 މެންބަރުން ހިމެނެއެވެ.

އެގޮތުން ކޮމިޓީގައި ތިއްބަވަނީ ފަންނާއި ސަޤާފަތާއި ތަރިކައާ ބެހޭ ވުޒާރާގެ ޑެޕިއުޓީ މިނިސްޓަރ އިބްރާހިމް ޞަބާޙު، ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާ ބެހޭ ވުޒާރާގެ ޑިރެކްޓަރ ނަސްރީނާ އިދްރީސް، ދިފާޢީ އަދި ވަޠަނީ ޚިދުމަތާ ބެހޭ ވުޒާރާގެ ކެޕްޓަން ޢަލީ ފަހުމީ، ތަޢުލީމާއި މަތީ ތަޢުލީމާއި ހުނަރުތައް ތަރައްޤީކުރުމާ ބެހޭ ވުޒާރާގެ އެޑިއުކޭޝަން ސުޕްރިންޓެންޑެންޓް މުޙައްމަދު ނާތީމް، މާލީ ކަންކަމާއި ސަރުކާރު ކުންފުނިތަކާ ބެހޭ ވުޒާރާގެ ޑެޕިއުޓީ މިނިސްޓަރ އަޙްމަދު އައިމަން، ޞިއްޙަތާއި ޢާއިލާއާއި އިޖުތިމާޢީ އެހީއާ ބެހޭ ވުޒާރާގެ ޑެޕިއުޓީ މިނިސްޓަރ މަރްޔަމް ލަހުފާ ޙަލީލް، އިސްލާމީ ކަންތައްތަކާ ބެހޭ ވުޒާރާގެ ވާއިޡު އައްޝައިޚް އަޙްމަދު ފަހުމީ ދީދީ، ޒުވާނުން ބާރުވެރިކުރުވުމާއި ކުޅިވަރާއި ހަށިހެޔޮކަމާ ބެހޭ ވުޒާރާގެ ޑިރެކްޓަރ ޝާދިޔާ އަޙުމަދު އަދި ޕީއެސްއެމްގެ އެގްޒެކެޓިވް ޑިރެކްޓަރ އިބްރާހިމް އިޤްބާލެވެ.

މިއަދުގެ ބައްދަލުވުމުގައި، އިޙްތިރާމް އަދާކުރުމުގެ ޤައުމީ މަޝްރޫޢު ކުރިއަށްގެންދަން ރޭވިފައިވާ އޮނިގަނޑާއި، މި މަޝްރޫޢުގައި ކޮމިޓީން އަދާކުރާނެ މައިގަނޑު ދައުރާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާކޮށްފައެވެ. އަދި މި މަޝްރޫޢު އެންމެ ފުރިހަމަ ގޮތުގައި ޢަމަލީ މައިދާނަށް ގެނައުމަށްޓަކައި އަޅަންޖެހޭ ފިޔަވަޅުތަކާއި، ކަމާގުޅޭ އެންމެހައި މުއައްސަސާތައް ގުޅިގެން މަސައްކަތްތައް އިންތިޒާމުކުރާނެ ގޮތްތަކާ ބެހޭގޮތުންވެސް މެންބަރުންގެ މެދުގައި ވަނީ ޚިޔާލު ބަދަލުކުރައްވާފައެވެ.