މެލޭޝިޔާގެ ކުރީގެ ބޮޑުވަޒީރު ޑރ.މަހާތިރު މުހައްމދުގެ އަނބިކަނބަލުން ޑރ. ސިތީ ޙަސްމާ މުހައްމަދު އަލީ އަވަހާރަވުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެ އެވެ.

ޑރ. ސިތީ ޙަސްމާ މުހައްމަދު އަލީ އަކީ އާންމު ސިއްހަތަށް ވަކާލާތު ކުރެއްވުމުގައި އިސް ދައުރެއް އަދާކުރައްވާފައިވާ ފަރާތެއްކަން ރައީސް ފާހަގަކުރެއްވިއިރު، ޑރ. މަހާތިރަށް ފޮނުއްވި ތައުޒިޔާގެ މެސެޖުގައިވަނީ މެލޭޝިޔާގެ ފުރަތަމަ އަންހެން ޑރ. ގެ ތެރޭގައި ހިމެނިވަޑައިގެންނެވި ޑރ. ސިތީ ޙަސްމާ މައިންގެ ސިއްހަތަށާއި އާއިލާ ރޭވުމާއި، މިންތީހެ ހަމަހަމަކަން ކުރިއެރުވުމަށް ކޮށްދެއްވި އަގުހުރި ހިދުމަތްތަކަކީ މުސްތަޤުބަލުގައިވެސް އެޤައުމަށް ފައިދާކުރާނެ ޚިދުމަތްތަކެއްކަން ފާހަގަކުރައްވަައި އެކަމަނާ ވަކިވެދިއުމަކީ ލިބުނު ފުންހިތާމައެއްކަން ފާހަގަަކުރައްވާފަ އެވެ.

މި ދަނޑިވަޅުގެ ހިތާމައިގައި ޑރ. މަހާތިރާއި، އާއިލާއަށް ދިވެހި ސަރުކާރާއި ރައްޔިތުންގެ ނަމުގައި ތައުޒިޔާ ވިދާޅުވެ، އާއިލާއަށް ކެތްތެރިކަންދެއްވުމަށް ރައީސް އެދިވަޑައިގެންނެވި އެވެ.

މީގެއިތުރުން ރައީސް ވަނީ ޑރ. ސިތީ ޙަސްމާގެ އަގުހުރި ހިދުމަތްތަކުގެ ހަނދާންތައް އާއިލާއަށާއި އެގައުމުގެ ރައްޔިތުންނަށް އާވެ، އެކަމުގެ ހިތްހަމަޖެހުން އަބަދުވެސް އާވާނެކަން ފާހަގަކުރައްވާފަ އެވެ. އަދި މަރްހޫމާއަށް ރަހްމަތްލައްވައި ސުވަރުގޭގެ ދާއިމީ ނިއުމަތުގައި ލެއްވުން މާތް ﷲ ގެ ހަސްރަތުގައި ދުއާ ދަންނަވަމުންނެވެ.

ޑރ.ސިތީ ޙަސްމާ މުހައްމަދު އަލީ އަވަހާރަވެފައިވަނީ އުމުރުފުޅުން 100 އަހަރުގަ އެވެ. އަދި ޖާނާޒާ ބޭއްވުމަށްފަހު އެކަމަނާގެ ފަސްދާނުވަޑައިގަންނަވާނީ އެގައުމުގެ އިދާރީ ވެރިރަށް ޕުތުރަޖާޔާގެ ގަބުރުސްތާނެއްގައި ކަމުގައި ޑރ. މަހާތިރުގެ އޮފީހުން ބުންޏެވެ.