ދިވެހިރާއްޖޭގައި ވިއްކާ ނުރައްކާތެރި ކެމިކަލް ވިއްކާފަރާތްތަކުން އެ ކެމިކަލްތައް ވިއްކުމަށްޓަކައި "ކެމިކަލް ވިއްކުމުގެ ހުއްދަ" އަށް އެދުމުގެ ފުރުސަތު 1 މަސް ދުވަހަށް އިތުރުކޮށްފި އެވެ.

ދިފާއީ އަދި ވަތަނީ ހިދުމަތާ ބެހޭ ވުޒާރާއިން ބުނީ "ކެމިކަލް ވިއްކުމުގެ ހުއްދަ" ނެގުމަށާއި އަދި ނުރައްކާތެރި ކެމިކަލް ވިއްކުމަށްޓަކައި އެ ކެމިކަލްތައް ސްޓޯ ކުރާ ނުވަތަ ބަހައްޓާ ތަންތަން މަކުޑި ޕޯޓަލްގައި ރެޖިސްޓާ ކުރުމަށް ދެވިފައިވާ މުއްދަތު ހަމަވެފައިވާ ކަމަށެވެ.

ނަމަވެސް މި މުއްދަތުގެ ތެރޭގައި ކެމިކަލް ވިއްކާ ފިހާރަތައް ރަޖިސްޓްރީކުރުމާއެކު ހުއްދަ ހޯދުމަށް އެދިފައިވާ ފަރާތްތަކުގެ އަދަދު ނިސްބަތުން މަދު ކަމަށް ވުޒާރާއިން ފާހަގަކުރި އެވެ. އެހެންކަމުން ރާއްޖޭގައި ނުރައްކާތެރި ކެމިކަލް ވިއްކާ ފަރާތްތަކުން "ކެމިކަލް ވިއްކުމުގެ ހުއްދަ" ނެގުމަށް ދީފައިވާ މުއްދަތު މިއަދުން ފެށިގެން 1 މަސް ދުވަހަށް އިތުރުކޮށްފައިވާކަމަށް ވުޒާރާއިން ބުންޏެވެ.

ވުޒާރާއިން ބުނީ މި މުއްދަތުގެ ތެރޭގައި ރަޖިސްޓްރީ ނުކޮށް ކެމިކަލް ވިއްކަމުންގެންދާ ފަރާތްތަކާއިމެދު ނުރައްކާތެރި ކެމިކަލްއާއިބެހޭ ގަވައިދު 2019 ގެ ދަށުން ފިޔަވަޅު އަޅައި އެ ފަރާތްތަކަށް ނުރައްކާތެރި ކެމިކަލް ރާއްޖެ އެތެރެކުރުމުގެ ހުއްދަ އިތުރަށް ނުދޭނެކަމަށެވެ.

ނުރައްކާތެރި ކެމިކަލް ސްޓޯ ކޮށްގެން ވިއްކާ ފަރާތްތައް މިހާރަކަށް އައިސް ގިނަވެފައިވާއިރު، މިކަމުގެ ސަބަބުން އެކި ފަހަރުތަކުގައި ނުރައްކާތެރި ހާދިސާތައް ހިނގާފައިވެ އެވެ.