ގދ. އަތޮޅުގެ ރައްޔިތުން ޑިޖިޓަލް ދުނިޔެއަށް ހޭލުންތެރިކުރުވުމަށާއި، އިންޓަނެޓް މެދުވެރިކޮށް ހިންގާ އެކި ބާވަތުގެ ކުށްތަކުން ރައްކާތެރިވުމަށް މަޢުލޫމާތު ދިނުމުގެ ޚާއްޞަ ސެޝަންތަކެއް އެ އަތޮޅުގެ ހުރިހާ ރަށެއްގައި ކުރިއަށް ގެންގޮސްފިއެވެ.

މި މަހުގެ 18 އިން 26 ގެ ނިޔަލަށް މި ސެޝަންތައް ކުރިއަށް ގެންގޮސްފައިވަނީ ސައިބަރ ކްރައިމް ސެންޓަރާއި ގދ. އަތޮޅު ފުލުހުން ގުޅިގެންނެވެ. ގދ. އަތޮޅުގެ މީހުން ދިރިއުޅޭ ހުރިހާ ރަށެއް ހިމެނޭހެން ބޭއްވި މި ސެޝަންތަކުގައި ޖުމްލަ 377 މީހަކަށް ވަނީ މަޢުލޫމާތު ފޯރުކޮށްދީފައެވެ.

މި ސެޝަންތަކުގައި މައިގަނޑު ގޮތެއްގައި މަޢުލޫމާތު ދީފައިވަނީ:

• އޮންލައިން ފުރައްސާރައާއި ބިރުދެއްކުން ހުއްޓުވުމާއި އެކަމުން ރައްކާތެރިވާނެ ގޮތްތައް.
• ވަރުގަދަ ޕާސްވޯޑު ހެދުމާއި ޓޫ-ފެކްޓަރ އޮތެންޓިކޭޝަން (2FA) ބޭނުންކުރުމުގެ މުހިންމުކަން.
• ޝައްކުކުރެވޭ ލިންކުތަކަށް ނުވަނުމަށާއި، އަމިއްލަ ޒާތީ މަޢުލޫމާތާއި ޑޭޓާ ރައްކާތެރިކޮށް ބެލެހެއްޓުން.
• ޢާންމުކޮށް ބޭނުންކުރާ ސޯޝަލް މީޑިއާ މަންސަތަކުގައި ޕްރައިވެސީ އަދި ސެކިއުރިޓީ ސެޓިންގްސް ބެލެހެއްޓުން.
• އިންޓަނެޓްގެ ކުރީގެ ދުނިޔެއާއި މިހާރު ފެންމަތިވަމުން އަންނަ އައު ކުށްތަކުގެ ތަފާތުތައް ދެނެގަތުން.

މީގެ އިތުރުން، އާއިލާގައި އުޅޭ ކުޑަކުދިންނާއި އިސްރަށްވެހިން ސައިބަރ ކުށްތަކުން ރައްކާތެރިކުރުމަށްޓަކައި ބެލެނިވެރިއެއްގެ ހައިސިއްޔަތުން އަދާކުރަންޖެހޭ ޒިންމާތަކާއި، އަޅަންޖެހޭ ރައްކާތެރިކަމުގެ ފިޔަވަޅުތަކާ ގުޅޭގޮތުންވެސް ބައިވެރިންނަށް ވަނީ މަޢުލޫމާތު ދީފައެވެ.