ބޮލީވުޑްގެ ކުޅަދާނަ އެކްޓަރ އަޖޭ ދޭވްގަންގެ އެންމެ ކާމިޔާބު އެއް ފްރެންޗައިޒް ކަމަށްވާ 'ދްރިޝްޔަމް' ގެ އެންމެ ފަހު ބައި، 'ދްރިޝްޔަމް: ދަ ކޮންކްލޫޝަން' އޮކްޓޯބަރު 2 ވަނަ ދުވަހު ރިލީޒްކުރުމަށް ހަމަޖެހިފައިވާކަން އިއުލާންކޮށް، ފިލްމުގެ އައު ޕޯސްޓަރެއް އާންމުކޮށްފިއެވެ.

ފިލްމުގެ އުފެއްދުންތެރިން މިހާރު ވަނީ މި ފިލްމު ރިލީޒްކުރުމަށް ރަސްމީކޮށް ކައުންޓްޑައުން ފަށާފައެވެ.

ދްރިޝްޔަމް' ފިލްމުތަކުގައި "އޮކްޓޯބަރު 2" އަކީ ވަރަށް ޚާއްޞަ ތާރީޚެކެވެ. އެއީ ފިލްމުގެ މެއިން ކެރެކްޓަރ ވިޖޭ ސަލްގާއޮންކަރ (އަޖޭ ދޭވްގަން) އޭނާގެ އާއިލާ ސަލާމަތްކުރުމަށްޓަކައި ކުޅޭ އެންމެ މުހިންމު ރޯލު އަދި މުޅި ފިލްމުގެ ވާހަކަ އެ ދުވަހަކާ ގުޅިފައިވާ ތާރީޚަށް ވާތީއެވެ.

އެހެންކަމުން، ސަސްޕެންސުން ފުރިގެންވާ މި ފްރެންޗައިޒްގެ އެންމެ ފަހު ބައި ހަމަ އެ ތާރީޚުގައި ރިލީޒްކުރުމަކީ ފިލްމަށް ލޯބިކުރާ ފަރާތްތަކަށް ލިބިގެންދާނެ ވަރަށް ބޮޑު އުފަލެކެވެ.

އާންމުކޮށްފައިވާ އައު ޕޯސްޓަރާއެކު ސޯޝަލް މީޑިއާގައި ފިލްމަށް އޮތް އިންތިޒާރު ވަނީ ވަރަށް ބޮޑަށް އިތުރުވެފައެވެ.

ފިލްމުގެ ކުރީގެ ދެ ބައިން ވެސް ބެލުންތެރިން ހައިރާންކޮށްލާފަދަ ކަންތައްތަކެއް ފެނިފައިވާއިރު، ގިނަ ބަޔަކު އަންނަނީ ވިޖޭ ސަލްގާއޮންކަރ އާއި އޭނާގެ އާއިލާގެ މި ސިއްރުވެރި ވާހަކަ އެއްކޮށް ނިމިގެންދާނީ ކިހިނެއްތޯ ބަލާލުމަށް ކެތްމަދުވެފައިވާކަން ފާޅުކުރަމުންނެވެ.