ޔޫރަޕްގައި މިވަގުތު ހުންނެވި އެންމެ ދުވަސްވީ ރަސްކަލެއް ކަމަށްވާ ނޯވޭގެ ރަސްގެފާނު ހަރަލްޑް 5 ވަނަ، ޢުމުރުފުޅުން 89 އަހަރުގައި އަވަހާރަވެއްޖެއެވެ.

އެމަނިކުފާނު އަވަހާރަވީ ލޭގެ ސީރިއަސް ބައްޔަކަށް ހޮސްޕިޓަލުގައި ފަރުވާ ހޯއްދަވަމުން ގެންދަވަނިކޮށެވެ.

ނޯވޭގެ ޝާހީ ގަނޑުވަރުން ނެރުނު ބަޔާނެއްގައި ހާމަކުރި ގޮތުގައި، ރަސްގެފާނު ހަރަލްޑް އަވަހާރަވެފައިވަނީ އޮސްލޯ ޔުނިވަރސިޓީ ހޮސްޕިޓަލުގައި ހުކުރު ދުވަހުގެ ހެނދުނު 6:35 ގައެވެ.

ރަސްގެފާނު ހަރަލްޑް އަވަހާރަވުމާ ގުޅިގެން، ޤާނޫނު އަސާސީގެ ދަށުން އެމަނިކުފާނުގެ ދަރިކަލުން އަދި ވަލީއަޙްދު ހާކޮން ރަސްކަމާ ހަވާލުވެވަޑައިގަންނަވާނެއެވެ. އަދި އެމަނިކުފާނު ރަސްކަން ކުރައްވާނީ ރަސްގެފާނު ހާކޮން 8 ވަނައިގެ ނަންފުޅުގައެވެ.

ރަސްގެފާނުގެ ހާލުކޮޅު ވަރަށް ބޮޑަށް ދެރަވެފައިވާ ކަމަށް އޮފިޝަލުން ހާމަކުރުމާ ގުޅިގެން، ޝާހީ ޢާއިލާގެ ބޭފުޅުން ބުރާސްފަތި ދުވަހު ހޮސްޕިޓަލަށް ޒިޔާރަތްކުރެއްވިއެވެ. އަދި ނޯވޭގެ ގިނަ އަދަދެއްގެ ރައްޔިތުން ވަނީ ޝާހީ ގަނޑުވަރުގެ ބޭރަށް އެއްވެ، މާބޮނޑިތައް ބަހައްޓައި ހިތާމަ ފާޅުކޮށްފައެވެ. ރަސްގެފާނު ހޮސްޕިޓަލުގައި އެޑްމިޓްކުރެވުނީ އޮގަސްޓް 17 ވަނަ ދުވަހު، ލޭގެ ރަތް ސެލްތައް އާދަޔާ ޚިލާފަށް ހަލާކުވާ ބައްޔެއް ކަމަށްވާ "ހީމޯލިޓިކް އެނީމިއާ" އަށް ފަރުވާ ހޯއްދެވުމަށެވެ.

ނޯވޭގެ ތަޚުތުގައި 35 އަހަރު ހޭދަކުރެއްވި ރަސްގެފާނު ހަރަލްޑް ވަނީ ފަހަކަށް އައިސް ޞިއްޙީ އެކި މައްސަލަތަކާ ކުރިމަތިލައްވާފައެވެ. އެގޮތުން ޕޭސްމޭކަރެއް ހަރުކުރައްވައި ރަސްމީ ބައެއް ހަރަކާތްތައް މަދުކުރެއްވި ނަމަވެސް، ޤައުމުގެ ޕާލިމެންޓް ކުރިމަތީގައި ކުރައްވާފައިވާ އުމުރު ދުވަހުގެ ހުވަޔަށް އިޙްތިރާމް ކުރެއްވުމުގެ ގޮތުން، ރަސްކަމުން އިސްތިއުފާ ދެއްވުމަށް އެމަނިކުފާނު އަބަދުވެސް ދެކޮޅު ހެއްދެވިއެވެ.