އިނގިރޭސި ޕްރެމިއާ ލީގުގައި މިރޭ ރަށުން ބޭރުގައި ފުލަމް އާއި ދެކޮޅަށް ކުޅުނު މެޗު ވާދަވެރި ކުޅުމަކަށްފަހު 3-2 ގެ ނަތީޖާއަކުން ޗެލްސީ އިން ކާމިޔާބުކޮށްފިއެވެ.

ފުލަމްގެ ކްރޭވެން ކޮޓޭޖުގައި ކުޅުނު މިމެޗުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މެޗު ފެށިގެން 31 ވަނަ ސިކުންތުގައި ޗެލްސީގެ ބްރެޒިލް ފޯވާޑް ޖޮއާއު ޕެޑްރޯ ވަނީ އެޓީމުގެ އިނގިރޭސި މިޑްފިލްޑަރު ކޯލް ޕާމާ ތަނަވަސްކޮށްދިން ފުރުސަތެއްގައި ލަނޑެއް ކާމިޔާބުކޮށް އެޓީމަށް މެޗުގެ ލީޑު ހޯދައިދީފައެވެ.

ނަމަވެސް އޭގެ 22 މިނެޓު ފަހުން ފުލަމްގެ ޒުވާން މިޑްފިލްޑަރު ޖޯޝުއާ ކިންގް ވަނީ ލަނޑެއް ކާމިޔާބުކޮށް އެޓީމަށް މެޗުގެ ނަތީޖާ އެއްވަރުކޮށްދީފައެވެ. އަދި ޗެލްސީ އިން ދެވަނަ ފަހަރަށް ލީޑުހޯދި ލަނޑު ފުރަތަމަ ހާފުގެ 41 ވަނަ މިނެޓުގައި ކާމިޔާބުކޮށްދިނީ މިސީޒަނު އެޓީމާއި އަލަށް ގުޅުނު އިނގިރޭސި މިޑްފިލްޑަރު މޯގަން ރޮޖާއެވެ.

މީގެ އިތުރުން ވެސް މިހާފުގައި ދެޓީމުން ވެސް ވަނީ ލަނޑުޖަހާނެ ރަނގަޅު ގިނަ ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-1 ގެ ނަތީޖާއަކުން ޗެލްސި ކުރީގައި އޮވެގެންނެވެ.

މެޗުގެ ދެވަނަ ހާފު ޗެލްސީ އިން ވަރުގަދަކޮށް ފެށިއިރު، މެޗުގެ އަށްވަނަ މިނެޓުގައި އެޓީމުގެ ލީޑު ފުޅާކޮށްދިނީ މިމެޗުގައި ތަފާތު މޮޅު ކުޅުމެއް ދެއްކި ޕާމާ އެވެ. ނަމަވެސް އޭގެ ފަސް މިނެޓު ފަހުން މެޗުގެ 54 ވަނަ މިނެޓުގައި ފުލަމްގެ ޒުވާން ފޯވާޑް ގޮންޒާލޯ ގާސިއާ ވަނީ އިތުރު ލަނޑެއް ކާމިޔާބުކޮށް އެޓީމަށް ނަތީޖާގެ ފަރަގު ކުޑަކޮށްދީފައެވެ.

މީގެ އިތުރުން މެޗުގެ ނަތީޖާ ހަމަހަމަކުރަން ދެވަނަ ހާފު ނިމެންދަނިކޮށް ފުލަމްގެ ކިންގް އަދި އެންޓޮނީ ރޮބިންސަންއަށް ވަނީ ވަރަށް ހުސް ދެ ފުރުސަތު ލިބި ބޭނުންކުރެވޭގޮތް ނުވެފައެވެ. އަދި މިއާއެކު މެޗުގެ ކުޅުން ނިމިގެންދިޔައީ 3-2 ގެ ނަތީޖާއަކުން ޗެލްސީ ކުރީގައި އޮވެގެންނެވެ.

މިއީ ޗެލްސީގެ ކޯޗު ޒަބީ އަލޮންސޯ އަދި ފުލަމްގެ ކޯޗު އަލްވާރޯ އާބެލޯއާގެ ވެސް ކޯޗިން ކެރިއަރުގެ، ޕްރެމިއާ ލީގު ފުރަތަމަ ތަޖުރިބާއެވެ. އަދި މިދެ ކޯޗުން ވެސް އެންމެ ފަހުން މަސައްކަތްކޮށްފައިވަނީ ސްޕެއިންގެ ރެއާލް މެޑްރިޑްގެ ހެޑް ކޯޗުކަމުގެ މަގާމުގައެވެ.