ހިޔާގެ ގިނަ ޓަވަރުތަކުން ފެނުގެ ހިދުމަތް ކެނޑިއްޖެ

ހުޅުމާލޭ ފޭސް 2 ގެ ހިޔާ ޓަވަރުތަކަކުން ފެނުގެ ހިދުމަތް ކެނޑިއްޖެ އެވެ.

އެޗްޑީސިން މިއަދު ބުނީ ދިމާވި މައްސަލައަކާއި ގުޅިގެން ހިޔާ 1 - 8 ވަނަ ޓަވަރުތަކުން ފެނުގެ ހިދުމަތް ވަނީ މެދުކެނޑިފައިކަމަށެވެ. އެގޮތުން ފެނުގެ ހިދުމަތް މެދުކެނޑުނީ ފެނުގެ ހިދުމަތް ދިނުމަށް ބޭނުންކުރާ ބޫސްޓަރ ޕަމްޕަށް ދިމާވި މައްސަލައަކާއި ގުޅިގެން ކަމަށް އެޗްޑީސީން ހިޔާ 7000 ކޮމިއުނިޓީ ގްރޫޕަށް ފޮނުވި މެސެޖެއްގައި ވަނީ ބުނެފައި އެވެ.

އެޗްޑީސީން ބުނީ މި މައްސަލަ ވީ އެންމެ އަވަހަކަށް ހައްލުކުރުމަށް އެކޯޕަރޭޝަނުން އެމް.ޑަބްލިއު.އެސް.ސީ އާއެކު މަސައްކަތް ކުރަމުން ދާކަމަށެވެ.

އަދި މިކަަމުގެ ސަބަބުން ރައްޔިތުންނަށް ދިމާވެދާނެ ދަތިތަކަށް އެޗްޑީސީން ވަނީ މާފަށް އެދިފައި އެވެ.

ހިޔާ ފްލެޓުތަކުގައި ދިރިއުޅޭ ބައެއް ފަރާތްތަކުން ބުނީ ފެނުގެ ހިދުމަތް ކެނޑުނީ މިއަދު 3:15 ހާއިރު ކަމަށެވެ.