ަަސާއިންގެ ހެޓްރިކާއެކު ނޯ ޗޮއިސް ބަލިކޮށް ގުރޫޕްގެ އެއްވަނަ ހަވޮއްޑާ އިން ކަށަވަރުކޮށްފި

މިހާރު ކުރިއަށްދާ "ތިނަދޫ ސިޓީ ކައުންސިލް ފުޓްސަލް މުބާރާތް 2024" ގައި މިރޭ ކުޅެވުނު ދެވަނަ މެޗުގައި ހަވޮއްޑާއި ނޯ ޗޮއިސް ކުޅުނު މެޗު ވާދަވެރި ކުޅުމަކަށްފަހު 4-2 ގެ ނަތީޖާއަކުން ކާމިޔާބުކޮށް ގުރޫޕްގެ އެއްވަނަ ހަވޮއްޑާ އިން ކަށަވަރުކޮށްފިއެވެ.

މުބާރާތުގައި އައުޓްލޯޒް ކުޅުނު ފުރަތަމަ މެޗުގައި ޓީމު 401 އަތުން އަތުން 3-1 ގެ ނަތީޖާއަކުން އެޓީމު މޮޅުވެފައިވާއިރު، ދެވަނަ މެޗުގައި މަޑަވެލި (ރަޓު ޓީމު) އަތުން އެޓީމު މޮޅުވީ 3-0 ގެ ނަތީޖާއަކުންނެވެ. އަދި ފޮކްސެސްގެ ފުރަތަމަ މެޗުގައި މަޑަވެލި (ރަޓު ޓީމު) އަތުން އެޓީމު 1-0 ގެ ންތީޖާއަކުން ބަލިވެފައިވާއިރު ދެވަނަ މެޗުގައި ޓީމު 401 އާއި ވާދަކޮށް 1-1 ގެ ނަތީޖާއަކުން ދެޓީމު ވަނީ އެއްވަރުވެފައެވެ.

ތިނަދޫ ސިޓީ އާރު އަވަށު ފުޓްސަލަ ދަނޑުގައި ކުޅެވުނު މިމެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ ހަވޮއްޑާ އިންނެވެ. މިލަނޑު މެޗު ފެށިގެން ފަސްވަނަ މިނެޓުގައި އެޓީމަށް ކާމިޔާބުކޮށްދިނީ ސާއިން އަސްލަމް އެވެ.

ނޯ ޗޮއިސް އިން ނަތީޖާ އެއްވަރުކުރި ލަނޑު ފުރަތަމަ ހާފުގެ 18 ވަނަ މިނެޓުގައި ކާމިޔާބުކޮށްދިނީ އެޓީމުގެ އަހުމަދު ވިޖުދާން އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ހަވޮއްޑާއިން އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަ ކުރިއިރު، މިހާފުގައި އެޓީމުން ވަނީ އިތުރު ތިން ލަނޑު ކާމިޔާބުކޮށްފައެވެ. އެގޮތުން ދެވަނަ ހާފުގައި އެޓީމުގެ ސާއިން އިތުރު ދެލަނޑު ކާމިޔާބުކޮށް ހެޓްރިކް ހެދިއިރު، އެޓީމުގެ އަނެއް ލަނޑު ކާމިޔާބުކޮށްދިނީ އަހުމަދު މުރޫޖް ޔާސިރު އެވެ.

މީގެ އިތިރުން މެޗުގެ ފަހުވަގުތުކޮޅުގެ ތެރޭގައި ހަވޮއްޑާގެ ސާއިންގެ އިތުރުން ނޯ ޗޮއިސްގެ އަހުމަދު ވަހީދަށް ދެވަނަ ރީނދޫ ކާޑާއެކު ރަތް ކާޑެއް ދައްކައި ދަނޑުން ފޮނުވާލާފައިވާއިރު، މެޗުގެ އެންމެ ފަހު މިނެޓިގައި ނޯ ޗޮއިސްގެ ދެވަނަ ލަނޑު ކާމިޔާބުކޮށްދިނީ އެޓީގެ އަހުމަދު ރިފްޝާން އެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ހަވޮއްޑާގެ އަހުމަދު މުރޫޖް ޔާސިރު އެވެ.

މިނަތީޖާއެކު ކުޅުނު ތިން މެޗުން ހަވޮއްޑާއަށް ހަތް ޕޮއިންޓް ލިބިފައިވާއިރު، އެޓީމު މުބާރާތުގެ ކުއާޓާ ފައިނަލުން ޖާގަހޯދީ ގުރޫޕް ސީގެ އެއްވަނަ ޓީމުގެ ގޮތުގައެވެ. އަދި މިމެޗުން ބަލިވި ނޯ ޗޮއިސްއަށް ކުޅުނު ތިން މެޗުން ހަތަރު ޕޮއިންޓް ލިބިފައިވާއިރު، އެޓީމު ގުރޫޕް ސްޓޭޖުގެ މެޗުތައް ނިންމާލީ ގުރޫޕް ސީގެ ތިންވަނައިގައެވެ. އަދި ތިން ގުރޫޕުން ތިންވަނަ ހޯދި ތިން ޓީމުގެ ތެރެއިން އެންމެ ނަތީޖާ ރަނގަޅު ދެޓީމުގެ ތެރޭގައި ހިމެނި އެޓީމުން ވެސް ވަނީ މުބާރާތުގެ ކުއާޓާ ފައިނަލުން ޖާގައެއް ކަށަވަރުކޮށްފައެވެ.

މިމުބާރާތުގައި މިއަހަރު ޖުމްލަ 12 ޓީމަކުން ވާދަކުރަމުން އަންނައިރު، މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި 12 ޓީމު ތިން ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމުގެ އިތުރުން ތިން ގުރޫޕުން ތިންވަނަ ހޯދާ ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ޖާގަ ލިބިފައެވެ.

ޗެންޕިއަން ޓީމަށް 50،000 އަދި ރަނަރަޕް ޓީމަށް 25،000 ރުފިޔާގެ ފައިސާގެ އިނާމެއް ހުށައެޅިފައިވާ މިމުބާރާތުގެ ޓައިޓަލް ސްޕޮންސާއަކީ ތިނަދޫ ސިޓީ ކައުންސިލް އެވެ. އަދި އެސޯސިއޭޓެޑް ޕާޓްނާއެއްގެ ގޮތުގައި އިވެންޓްކާސް މޯލްޑިވްސް ހަމަޖައްސާފައިވާއިރު، ފޮޓޯ ގްރަފީ ޕާޓްނަރަކީ ފޮޓޯ މޯލްޑިވްސް އެވެ. އަދި ބެވަރޭޖް ޕާޓްނަރަކަށް ހަތްތަރި ކެފޭ ހަމަޖައްސާފައިވާއިރު، މީޑިއާ ޕާޓްނަރަކީ ގާފު ސްޕޯޓްސް އެވެ.