އިންޑިއާއިން ރާއްޖެއަށް އައު ސަފީރަކު ހަމަޖައްސައިފި

އިންޑިއާ ސަރުކާރުން ރާއްޖެއަށް އައު ސަފީރަކު އައްޔަނުކުރަން ނިންމައިފި އެވެ.

އިންޑިއާގެ ނޫސްތަކުން މިއަދު ރިޕޯޓުކޮށްފައިވާގޮތުގައި އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ އައު ސަފީރުކަމަށް ހަމަޖެއްސެވީ 1998 ވަނަ އަހަރު އިންޑިއަން ފޮރިން ސަރވިސްއާއި ގުޅިވަޑައިގެންނެވި ޖީ ބަލަސުބްރަމާނިއަންއެވެ.

އިންޑިއާގެ ފެޑެރަލް ރިޕަބްލިކް އޮފް ނައިޖީރިއާއަށް ކަނޑައަޅުއްވާފައި ހުންނަވާ ހައިކޮމިޝަނަރުގެ މަގާމުގައި މިހާރު ހުންނެވި ބާލަސުބްރަމާނިއަން ވަރަށް އަވަހަށް އާ މަގާމާ ހަވާލުވެވަޑައިގަންނަވާނެ ކަމަށް އިންޑިއާގެ ފޮރިން މިނިސްޓްރީއާއި ހަވާލާދީ އިންޑިއާގެ ނޫސްތަކުން ވަނީ ރިޕޯޓުކޮށްފައެވެ.

އިންޑިއާގެ އެކްސްޓާނަލް އެފެއާޒް މިނިސްޓްރީންވެސް މިއަދު ނެރުނު ބަޔާނެއްގައި ބުނީ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރުގެ މަގާމަށް މިހާރު އިންޑިއާއިން ނައިޖީރިއާއަށް ކަނޑައަޅުއްވާފައި ހުންނަވާ ސަފީރު ޖީ ބަލަސުބްރަމާނިއަން (އައިއެފްއެސް:1998) ހަމަޖައްސަވާފައިވާ ކަމަށެވެ.

އަދި ވަރަށް އަވަހަށް އޭނާ އެ މަގާމާއި ހަވާލުވާނެ ކަމަށް ބެލެވޭ ކަމަށް ވެސް އެ ބަޔާނުގައި ވެ އެވެ.

މިވަގުތު ރާއްޖެއަަށް ކަނޑައަޅުއްވާފައި ހުންނަވާ ސަފީރެއްގެ ގޮތުގައި ހުންނެވީ މުނޫ މަހާވާރު އެވެ އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރުކަމުގެ މަގާމާ މުނޫ މަހާވާރު ހަވާލުވެވަޑައިގެންނެވީ 2021 ވަނަ އަހަރުގެ ނޮވެމްބަރު މަހުގެ 10 ވަނަ ދުވަހުއެވެ.