އިއްޔެ އެކަނިވެސް ޔަހޫދީންގެ ހަމަލާތަކުގައި ލުބުނާނުގެ 62 މީހަކު ޝަހީދުވި!

ބުރާސްފަތި ދުވަހު އިޒްރޭލުން ލުބުނާނުގެ ސަރަހައްދުތަކަށް ދިން ވަރުގަދަ ހަމަލާތަކުގައި 60 އަށް ވުރެ ގިނަ މީހުން ޝަހީދުވެއްޖެ އެވެ.

ލުބުނާނުގެ ސިއްހީ ވުޒާރާއިން މިއަދު ބުނީ އިއްޔެ އެގައުމުގެ ގިނަ ސަރަހައްދުތަކަށް އިޒްރޭލުން ދިން ވަރުގަދަ ހަމަލާތަކުގައި ޝަހީދުވި މީހުންގެ އަދަދު 62 އަށް އެރި ކަމަށެވެ. އަދި އިއްޔެ އެކަނިވެސް 111 މީހުން ޒަހަމްވެފައިވާ ކަމަށްވެސް ވަނީ ބުނެފައި އެވެ.

އިޒްރޭލުން އިއްޔެ ވަނީ ލުބުނާނުގެ ރެސިޑެންޝިއަލް 6 އިމާރާތަކަށް އަމާޒުކޮށް ހަމަލާދީ ބިމާއި ހަމަކޮށްލާފައި އެވެ. އެހަމަލާގައި ޝަހީދުވި މީހުންގެ އަދަދު އަދިވެސް އިތުރުވާނެ ކަމަށް ބެލެވެއެވެ. ސަބަބަކީ ހަމަލާތައް ހުއްޓާލާފައިނުވުމާއި ކައިރި ސަރަހައްދުތަކަށް އަދިވެސް ހަމަލާތައް ދެމުން ދިޔުމާއި އެކު ކަމާބެހޭ ފަރާތްތަކަށް ބިމާއި ހަމަވެފައިވާ އިމާރާތްތަކުގެ ދަށުން އަދިވެސް ގިނަ ބަޔަކު ސަލާމާތް ކުރެވިފައި ނުވުމެވެ.

މިދިޔަ އަހަރުގެ އޮކްޓޯބަރު މަހުގެ 7 ވަނަ ދުވަހު މެދުއިރުމަތީގައި ފެށި ހަނގުރާމައިގެ ތެރެއިން މިއަދާއި ހަމައަށް ލުބުނާނުން ޝަހީދުވި މީހުންގެ އަދަދު ވަނީ 3,645 އަށް އަރާފައި އެވެ. އަދި ޒަހަމްވި މީހުންގެ އަދަދު އުޅެނި 15,355 ގައި އެވެ.