ޓޫރިޒަމް ވިޔަފާރިތަކުން ބޭންކަށް ޑޮލަރު މާރުކުރުން ލާޒިމްކޮށްފި

ޓޫރިޒަމް ދާއިރާ އަށް ބޭރު ފައިސާ އިން ލިބޭ އާމްދަނީގެ ބައެއް ރާއްޖޭގެ ބޭންކުތަކަށް މާރުކުރަން މޯލްޑިވްސް މަނިޓަރީ އޮތޯރިޓީ (އެމްއެމްއެ) އިން ލާޒިމްކޮށްފި އެވެ.

އެމްއެމްއޭއިން އިއްޔެ ގެޒެޓުކުރި ގަވާއިދުގައި ބުނެފައިވާ ގޮތުން މީރާގައި ރަޖިސްޓްރީވެފައިވާ ޓޫރިޒަމް ވިޔަފާރިތަކުން މި ގަވާއިދާ އަމަލުކުރަން ފަށާތާ 30 ދުވަހުގެ ތެރޭގައި ރަޖިސްޓްރީކުރަންޖެހޭނެ އެވެ. އަދި ރަޖިސްޓްރީކުރުމަށްފަހު ޖެހިގެން އަންނަ މަހުގެ 28 ވަނަ ދުވަހުގެ ކުރިން އެ ވިޔަފާރިއަކުން ފޯރުކޮށްދޭ ޓޫރިޒަމް ދާއިރާގެ ހިދުމަތްތަކާއި ވިއްކާ މުދަލުގެ ތަފުސީލު އެމްއެމްއޭއާ ހިއްސާކުރަން ޖެހެއެވެ.

ޓޫރިޒަމް ދާއިރާގެ ވިޔަފާރިތަކަށް ބޭރު ފައިސާއިން ލިބޭ އާމްދަނީ އެ މަހަށްފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ރާއްޖޭގެ ބޭންކެއްގައި ހުންނަ އެ ކުންފުންޏެއްގެ އެކައުންޓަށް ޖަމާކުރަންވާނެ ކަމަށްވެސް މިގަވާއިދުގައި ބުނެފައިވެއެވެ.

ބޭރު ފައިސާ ލިބޭ އާމްދަނީގެ ވަކި މިންވަރެއް، ވަކި މުއްދަތެއްގެ ތެރޭގައި ބޭންކުތަކަށް މާރުކުރަން ޖެހެއެވެ. ޓޫރިސްޓް ރިޒޯޓުތަކާއި، އިންޓަގްރޭޓަޑް ޓޫރިސްޓް ރިޒޯޓުތަކާއި، ރިޒޯޓް ހޮޓާތަކުން ކޮންމެ ޓޫރިސްޓަކަށް 500 ޑޮލަރުގެ ރޭޓުން ބެންކުން މާރުކުރަންޖެހޭނެއެވެ. އަދި ޓޫރިސްޓް ގެސްޓްހައުސްތަކާއި މީހުން ދިރިއުޅޭ ރަށްރަށުގައި ހިންގާ ކުދި ހޮޓާތަކުން ކޮންމެ ޓޫރިސްޓަކަށް 25 ޑޮލަރުގެ ރޭޓުން މާރުކުރަންޖެހޭނެއެވެ.

ޓޫރިޒަމް ދާއިރާގައި ބޭރު ފައިސާއިން މުޢާމަލާތް ކުރުމަށް ޚާއްޞަ އިސްތިސްނާތަކެއް ދެވިފައިވެއެވެ. މީގެ ތެރޭގައި ޓޫރިސްޓުންނަށް ވިއްކާ މުދަލާއި ޚިދުމަތުގެ އަގު، އަދި އެކްސްޕޯޓް ކުރެވޭ މުދަލާއި ޚިދުމަތުގެ އަގު ހިމެނެއެވެ. މީގެ އިތުރުން، ބޭރު ފައިސާއިން އާމްދަނީ ލިބޭ ވިޔަފާރިތަކަށް ވަކި ޝަރުޠުތަކެއްގެ ދަށުން ބޭރު ފައިސާއިން މުޢާމަލާތް ކުރުމުގެ ހުއްދަ ދެވިފައިވެއެވެ.

ބޭންކުތަކަށް މާރުކުރާ ފައިސާގެ ތެރެއިން ކޮންމެ ހަފުތާއަކު ލިބޭ ބޭރު ފައިސާގެ 60 ޕަސެންޓު އެ ހަފުތާއެއްގެ ބުދަ ދުވަހުގެ ކުރިން އެ އޮތޯރިޓީ އަށް ވިއްކަން ޖެހޭނެ ކަމަށްވެސް ބުނެފައިވެ އެވެ.

މި ގަވާއިދުގައި ބުނާ ގޮތަށް ބޭރު ފައިސާ މާރުނުކޮށްފި ނަމަ އެ ފަރާތެއް 5،000ރ. އާއި 1 މިލިއަން ރުފިޔާއާ ދެމެދުގެ އަދަދުން ޖޫރިމަނާ ކުރެވޭނެ އެވެ.