ރޭވަން ބަލިކޮށް ފްލައިންގ އީގަލްސް މުބާރާތް ނިންމާލީ މޮޅަކާއެކު

7 ވަނަ ވެމްކޯ ހޭންޑްބޯޅަ މޯލްޑިވްސް ޗެންޕިއަންޝިޕް 2024 ގެ ފިރިހެން ޑިވިޝަން ގުރޫޕް ބީގައި މިރޭ ފުލައިންގ އީގަލްސް އާއި ރޭވަނަ ސްޕޯޓްސް ކުލަބު ވާދަކުރި މެޗު ވާދަވެރި ކުޅުމަކަށް ފަހު 21-23 ގެ ނަތީޖާއަކުން ކާމިޔާބުކޮށް ފުލައިންގ އީގަލްސް އިން މުބާރާތް ނިންމާލީ މޮޅަކާއެކު އެވެ.

މުބާރާތުގައި ފުލައިންގ އީގަލްސް ކުޅުނު ފުރަތަމަ މެޗުގައި ވެލިދޫ ޔުނައިޓެޑު އަތުން 50-31 ގެ ނަތީޖާއަކުން ބަލިވިއިރު، ދެވަނަ މެޗުގައި 14-41 ގެ ނަތީޖާއަކުން ޖީބީ ސްޕޯޓްސް ކުލަބު އަތުން އެޓީމު ވަނީ ބަލިވެފައެވެ. ނަމަވެސް، ތިންވަނަ މެޗުގައި އެޓީމުން ވަނީ ޕޮލިސް ކުލަބާއި ވާދަކޮށް 29-29 ގެ ނަތީޖައަކުން އެއްވަރުކޮށްފައެވެ. އަދި މުބާރާތުގައި ރޭވަން ސްޕޯޓްސް ކުލަބުން ކުޅުނު ފުރަތަމަ މެޗުގައި ވެލިދޫ ޔުނައިޓެޑު އަތުން 17-37 ގެ ނަތީޖާއަކުން އެޓީމު ބަލިވިއިރު، ދެވަނަ މެޗުގައި ޕޮލިސް އަތުން އެޓީމު ބަލިވީ 23-29 ގެ ނަތީޖާއަކުންނެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގެ ފުރަތަމަ ހާފު ނިމުނީ 11-13 ގެ ނަތީޖާއަކުން ފުލައިންގ އީގަލްސް ކުރީގައި އޮވެގެންނެވެ. އަދި ދެވަނަ ހާފުގައިވެސް ދެޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، މިހާފުގައި ދެޓީމުންކުރެ ކޮންމެ ޓީމެއް ވެސް ވަނީ އިތުރު 10 ލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކީ ފްލައިންގ އީގަލްސްގެ ލަހުފާން އަހުމަދު ޝަހީމް އެވެ. އޭނާ ވަނީ މިމެޗުގައި އެޓީމަށް އަށް ލަނޑު ކާމިޔާބުކޮށްދީފައެވެ.

މިމެޗުން ލިބުނު ތިން ޕޮއިންޓާއެކު މުބާރާތުގައި ކުޅުނު ހަތަރު މެޗުން ފްލައިންގ އީގަލްސް އަށް ހަތަރު ޕޮއިންޓް ލިބިފައިވާއިރު، އެޓީމުން މުބާރާތް ނިންމާލީ ގުރޫޕްގެ ހަތަރުވަނައިގައެވެ. އަދި މިމެޗުން ބަލިވި ރޭވަން ސްޕޯޓްސް ކުލަބުން މުބާރާތުގައި ކުޅުނު ތިން މެޗުން ވެސް އެޓީމު ބަލިވެފައި ވާއިރު، ބާކީ އެއްމެޗު އޮއްވައި އެޓީމު ވަނީ މުބާރާތުން ކަޓާފައެވެ.

މިއަހަރުގެ ހޭންޑްބޯލް މޯލްޑިވްސް ޗެންޕިއަންޝިޕްގެ ފިރިހެން ޑިވިޝަނުގައި 10 ޓީމު ބައިވެރިވެފައިވާއިރު، މުބާރާތް ކުރިއަށް ދަނީ ބައިވެރިވި 10 ޓީމު ދެ ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު މުބާރާތުގެ ސެމީ ފައިނަލަށް ހޮވޭއިރު، ސެމީ ފައިނަލް ދެމެޗު ކުޅުމަށްތާވަލުކުރެވިފައި ވަނީ ޖޫން މަހުގެ ހަތްވަނަ ދުވަހުގެ ރޭ އެވެ. އަދި މުބާރާތުގެ ފައިނަލް މެޗު ކުޅުމަށް މިހާރު ތާވަލު ކުރެވިފައިވަނީ ޖޫން މަހުގެ ނުވަވަނަ ދުވަހުގެ ރޭ އެވެ.