ތިލަފުށީގެ އާ ބައިނަލްއަޤުވާމީ ބަނދަރުގެ ކާގޯ ޓާމިނަލަށް ހުއްދަ ދޫކޮށްފި އެވެ.

އިގުތިސޯދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވުޒާރާއިން ބުނީ ތިލަފުށީގެ އާ ބައިނަލްއަޤުވާމީ ބަނދަރުގައި ހުންނަ ކާގޯ ޓާމިނަލުން ކޮންޓެއިނަރު ކްލިއަރެންސްގެ މަސައްކަތްތައް ކުރިއަށްގެންދާއިރު، އެ ތަނަށް ވަދެނިކުމެ އުޅުމާއި ސަލާމަތީ ކަންކަން ބެލެހެއްޓުމަށް ހަމަޖެހިފައިވާ އުސޫލުތައް ވުޒާރާގެ އޮޑިޓް ޓީމުން އިންސްޕެކްޓްކޮށްފައިވާ ކަމަށެވެ.

މި އެސެސްމަންޓަށްފަހު، ޓާމިނަލް ހިންގުމުގެ ހުއްދަ މިނިސްޓްރީން ދޫކޮށްފައިވާ ކަމަށް ވުޒާރާއިން ބުންޏެވެ. ނަމަވެސް ހުއްދައިގެ ޝަރުތުތައް ފުރިހަމަކުރުމަށްޓަކައި އިތުރަށް ރަނގަޅުކުރަންޖެހޭ ކަންކަން ފާހަގަކޮށް، އެ ކަންކަން އިސްލާހުކުރުމަށް އިރުޝާދު ދީފައިވާކަމަށްވެސް ވުޒާރާއިން ބުންޏެވެ.