ރާއްޖެއަށް ބޮޑެތި އިންވެސްޓްމަންޓްތައް ގެނައުމަކީ ތަރައްޤީއަށް ކޮންމެހެން މުހިންމު ކަމެއް ނަމަވެސް، ރަސްމާލެ މަޝްރޫޢާ ގުޅިގެން ރައްޔިތުންގެ މެދުގައި ހުރި ޙައްސާސް އަދި ބޮޑެތި ކަންބޮޑުވުންތަކަށް ސަރުކާރުން ސާފު ޖަވާބުތަކެއް ދޭންޖެހޭ ކަމަށް، މި ސަރުކާރުގެ ކުރީގެ ފޮރިން މިނިސްޓަރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައި ޑރ. ޚަލީލް ވިދާޅުވީ، ރާއްޖޭގެ ތަރައްޤީގެ ދުވެލި ކުރިއެރުވުމަށްޓަކައި ބޮޑެތި އިންވެސްޓްމަންޓްތައް ބޭނުންވާ ކަމަށާއި، ޢާންމުވެފައިވާ މަޢުލޫމާތުތަކަށް ބަލާއިރު ރަސްމާލެ މަޝްރޫޢަކީ އާދަޔާ ޚިލާފަށް ބޮޑު މަޝްރޫޢެއް ކަމަށެވެ. އަދި އެފަދަ މަޝްރޫޢުތައް ރައްޔިތުން އެދޭ ފަދައިން ހާމަކަން ބޮޑު ގޮތެއްގައި ތަންފީޒުވުމަކީ ކޮރަޕްޝަނާއި ފަސާދައިން ދުރުވެ، މަޝްރޫޢު ކާމިޔާބުވުމަށް އެޅޭނެ އެންމެ މުހިންމު ފިޔަވަޅު ކަމަށް އެމަނިކުފާނު ފާހަގަކުރެއްވިއެވެ.

ޑރ. ޚަލީލް ދެކެވަޑައިގަންނަވާ ގޮތުގައި، ޤައުމާއި ރައްޔިތުންގެ ޙައްޤުތައް ޙިމާޔަތްކުރުމުގެ މަސްއޫލިއްޔަތު އޮތް ވެރިންގެ ޙައިސިއްޔަތުން ސަރުކާރުން ކުރަންވީ ކަމަކީ، ރައްޔިތުންގެ ހިތްތަކުގައި އުފެދިފައިވާ ސުވާލުތަކަށް އީޖާބީ އަދި ސާފު ޖަވާބުތަކެއް ދިނުމެވެ.

މިގޮތުން، ރަސްމާލެ މަޝްރޫޢާ ގުޅޭގޮތުން ސަރުކާރުން ސާފުކޮށްދިނުމަށް އެދި ޑރ. ޚަލީލް ވަނީ މުހިންމު 7 ނުކުތާއެއް ފާހަގަކުރައްވާފައެވެ:

1. ރަސްމާލެ ހިއްކުމަށް މިހާތަނަށް ދައުލަތުގެ ބަޖެޓުން ޚަރަދުކޮށްފައިވަނީ ކިހާ މިންވަރެއްތޯ؟
2. ރަސްމާލޭގެ ބިމާއި އެތަނުގެ ވަށައިގެންވާ ފަޅުގެ އަގުމަގު (ވެލުއޭޝަން) ހަދާފައިވޭތޯ، އަދި އެއީ ކިހާވަރެއްތޯ؟
3. މި އިންވެސްޓްމަންޓުން ދައުލަތަށް އަޕްފްރަންޓް ޕޭމަންޓެއްގެ ގޮތުގައި އެއްވެސް މިންވަރެއް ލިބޭތޯ، އަދި ލިބޭނަމަ އެއީ ކިހާވަރެއްތޯ؟
4. އިންވެސްޓް ކުރާ ފަރާތާއި ސަރުކާރުގެ ބައެއް ވެރިން ދައްކަވާ ޢަދަދުތަކުގައި ބޮޑެތި ފަރަގުތަކެއް ހުރުމުން، ޤާނޫނީ އޮނިގަނޑުގެ ތެރެއިން ޓެކްސްގެ ގޮތުގައި ދައުލަތަށް ލިބޭނެ ކަމަށް ލަފާކުރާ އާމްދަނީއަކީ ކޮބައިތޯ؟ އަދި ވިޔަފާރި ޓެކްސް ނުހިމަނައި، މަޝްރޫޢުގެ ތެރެއިން ދައުލަތަށާއި ރައްޔިތުންނަށް ލިބެނީ ކޮން މަންފާއެއްތޯ އަދި ކިހާ މުއްދަތެއްގެ ތެރޭގައިތޯ؟
5. ބިމުގެ މިލްކުވެރިކަން ދޫކުރަނީ ދާއިމަށްތޯ، އަދި ބިމުގެ މިލްކުވެރިކަން ބަދަލުވާ ކޮންމެ ފަހަރަކު 99 އަހަރުގެ މުއްދަތު އަލުން ފެށޭތޯ؟
6. މި މަޝްރޫޢުގެ ދަށުން އަޅާ 5,000 ހައުސިންގ ޔުނިޓް ބިނާކުރަނީ ދައުލަތަށް ލިބޭ ފައިސާއިންތޯ ނުވަތަ ނޫންތޯ؟
7. މި އިންވެސްޓްމަންޓުގެ ސަބަބުން ދައުލަތުގެ ނުވަތަ ރައްޔިތުންގެ އެއްވެސް އަސާސީ ޙައްޤަކަށް އުނިކަމެއް އާދޭތޯ؟

މީގެއިތުރުންވެސް، ރައްޔިތުންގެ ފަރާތުން ސާފުކުރަން ބޭނުންވާ މިފަދަ އެންމެހައި މުހިންމު ކަންކަމަށް ސަރުކާރުން ދެފުށް ފެންނަ ގޮތެއްގައި ޖަވާބުދާރީވުމަކީ ލާޒިމު ކަމެއް ކަމަށް ކުރީގެ ވަޒީރު ވަނީ ވިދާޅުވެފައެވެ.