ދިވެހިރާއްޖޭގެ އިޤްތިޞާދީ ތާރީޚުގައި ހިންގާ އެންމެ ބޮޑު މަޝްރޫޢު ކަމުގައިވާ ރަސްމާލެ ތަރައްޤީކުރުމުގެ މަޝްރޫޢުގައި ދިވެހި ސަރުކާރާއި އަބޫދާބީގެ އީގަލް ހިލްސް ކުންފުންޏާ ދެމެދު ވެފައިވާ އެއްބަސްވުމުގެ ޞައްޙަކަމާމެދު ސުވާލު އުފައްދައި، އެ އެއްބަސްވުން ބާޠިލުކުރުމަށް އެދި ޢާންމު މަޞްލަޙަތާ ގުޅުންހުރި ދުސްތޫރީ މައްސަލައެއްގެ ގޮތުގައި ދިވެހިރާއްޖޭގެ ސުޕްރީމް ކޯޓަށް ހުށަހަޅައިފިއެވެ.

މި މައްސަލަ ސުޕްރީމް ކޯޓަށް މިއަދު ހުށަހަޅުއްވާފައިވަނީ ޤާނޫނީ ވަކީލު ޢަލީ ޙުސައިނެވެ.

ޖުމްލަ 20 ބިލިއަން ޑޮލަރުގެ ބޮޑު މި މަޝްރޫޢުގައި އީގަލް ހިލްސް ކުންފުންޏާއެކު މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އާބަން ޑިވެލޮޕްމަންޓުން އެއްބަސްވުމުގައި ސޮއިކޮށްފައިވަނީ މި ސެޕްޓެމްބަރު މަހުގެ 21 ވަނަ ދުވަހުއެވެ.

ކޯޓަށް ހުށަހެޅި މައްސަލައިގައި ފާހަގަކޮށްފައިވާ ގޮތުގައި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 250 ވަނަ މާއްދާގައި ދައުލަތުގެ މުދަލެއް ނުވަތަ ފައިސާއެއް ދޫކޮށްލަންވާނީ ނުވަތަ ކުއްޔަށް ދޭންވާނީ ޤާނޫނާ އެއްގޮތްވާ ގޮތުގެ މަތިން ކަމަށް ބަޔާންކޮށްފައި އޮތް ނަމަވެސް، ދައުލަތުގެ މުދަލެއް ބޭރުގެ ފަރާތަކަށް 99 އަހަރުގެ މުއްދަތަށް އެއްފަހަރާ ކުއްޔަށް ދިނުމުގެ އެއްވެސް ޤާނޫނީ ބާރެއް ދައުލަތަށް ލިބިދޭ ޤާނޫނީ އޮނިގަނޑެއް ރާއްޖޭގައި ނެތެވެ. އެހެންކަމުން ޤާނޫނީ ބާރެއް ނެތި ވެފައިވާ މި އެއްބަސްވުމަކީ ޤާނޫނުއަސާސީގެ 250 ވަނަ މާއްދާއާއި، ބޭރުގެ ފަރާތްތަކަށް ރާއްޖޭގެ ބިން މިލްކުކުރުން މަނާކުރާ 251 ވަނަ މާއްދާއާ ސީދާ ޚިލާފު، ބާޠިލު އެއްބަސްވުމެއް ކަމަށް ކަނޑައަޅައިދިނުމަށް ވަނީ އެދިފައެވެ.

މީގެއިތުރުން، އެ ބިމުގައި ތަރައްޤީކުރާ ތަންތަނާ ގުޅޭގޮތުން ތިންވަނަ ފަރާތްތަކަށް ދާއިމީކޮށް އާވަމުންދާ (ރޯލިންގ) ލީސް އެގްރީމަންޓްތައް ހެދުމުގެ ޙައްޤު އީގަލް ހިލްސްއަށް ދީފައިވާތީ، މިއީ ރާއްޖޭގެ ބިމުގެ މައްޗަށް ބޭރުގެ ފަރާތްތަކަށް ދާއިމީ މިލްކުވެރިކަމުގެ މަޞްލަޙަތުތައް ނުސީދާކޮށް ލިބިގެންދާނެ މަގެއް ކަމަށްވެސް މައްސަލައިގައި ބަޔާންކޮށްފައިވެއެވެ. ރަސްމާލެއިން ހިއްކާފައިވާ 500 ހެކްޓަރަށްވުރެ ބޮޑު ބިން، އެއްވެސް އިކުއިޒިޝަން ކޮސްޓެއް ނުވަތަ ކުއްޔެއް ދެއްކުމަކާ ނުލައި 99 އަހަރަށް ދީފައިވާ ކަމަށްވެސް ފާހަގަކޮށްފައިވެއެވެ.

ސުޕްރީމް ކޯޓުން މި މައްސަލައިގައި ވަކި ގޮތެއް ނިންމަންދެން، މި އެއްބަސްވުމަށް ޢަމަލުކުރުން ވަގުތީގޮތުން ފަސްކުރުމުގެ އަމުރަކަށްވެސް ވަނީ އެދިފައެވެ. މިގޮތަށް އެދިފައިވަނީ ބިމުގެ މައްޗަށް ތިންވަނަ ފަރާތްތަކުގެ ޙައްޤުތަކެއް އުފެދިއްޖެނަމަ، ފަހުން ޙުކުމް ތަންފީޛުކުރުމަށް ހުރަސްއެޅި، ދައުލަތަށް އުފުލަންޖެހިދާނެ ބޮޑެތި މާލީ ބުރަތަކުންނާއި އިއާދަނުކުރެވޭނެ ބޮޑެތި ގެއްލުންތަކުން ސަލާމަތްވުމަށްޓަކައެވެ.

ރަސްމާލެ ތަރައްޤީކުރުމަށް އީގަލް ހިލްސްއާއެކު ސޮއިކުރުމާ ގުޅިގެން ޢާންމުންގެ ބޮޑެތި ކަންބޮޑުވުންތަކެއް އުފެދިފައިވަނިކޮށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދިފަހުން ވިދާޅުވެފައިވަނީ، ރަސްމާލެ މަޝްރޫޢުގެ ބިން ހިއްކުމުގެ 60 އާއި 70 އިންސައްތައާ ދެމެދުގެ މަސައްކަތް މިހާރު ނިމިފައިވާ ކަމަށާއި، ބޭރުގެ އިންވެސްޓަރުންނަށް ބިން ދޫކުރާނީ ހަމައެކަނި ކުއްޔަށް ކަމަށެވެ. ނަމަވެސް މި އެއްބަސްވުމުގެ ފުރިހަމަ ތަފްޞީލު ހާމަކުރުމަށް ސަރުކާރުން އަދިވެސް އަންނަނީ ދެކޮޅު ހަދަމުންނެވެ.