ކުރިއަށް އޮތް 2028 ވަނަ އަހަރުގެ ރިޔާސީ އިންތިޚާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރިޔާސީ ޓިކެޓް ހޯއްދެވުމަށްޓަކައި، އެ ޕާޓީގެ ޕްރައިމަރީގައި ވާދަކުރައްވާނެކަން ކުރީގެ ނައިބު ރައީސް ފައިސަލް ނަސީމް މިއަދު ރަސްމީކޮށް އިޢުލާން ކުރައްވައިފިއެވެ.

މިއަދު 'އެކްސް' (ކުރީގެ ޓްވިޓަރ) ގައި ކުރެއްވި ޕޯސްޓެއްގައިވެސް ފައިސަލް ވަނީ އެމްޑީޕީގެ ރިޔާސީ ޕްރައިމަރީގައި ވާދަކުރައްވަން ނިންމެވިކަން ހާމަކުރައްވައި، އެ ޕާޓީގެ ލޮބުވެތި ޢާންމު މެންބަރުންގެ އިޚްލާޞްތެރި ތާއީދަށް އެދިވަޑައިގެންފައެވެ.

އަދި މިއަދު ހެނދުނު ރާއްޖެ ޓީވީގެ "ފަށާއިރު" ޕްރޮގްރާމްގައި ބައިވެރިވެވަޑައިގެން ވާހަކަފުޅު ދައްކަވަމުން ފައިސަލް ނަސީމް ވިދާޅުވީ، ވޭތުވެދިޔަ ދުވަސްތަކުގައި އެމަނިކުފާނު ކުރެއްވި މައިގަނޑު ކަމަކީ ރާއްޖޭގެ ސިޔާސީ މަސްރަޙު ވަރަށް ގާތުން ދިރާސާ ކުރެއްވުން ކަމަށެވެ. އަދި އެމްޑީޕީގެ ރިޔާސީ ޕްރައިމަރީގައި ވާދަކުރައްވަން ނިންމެވީ ކުރީގެ ރައީސް އިބްރާހިމް މުޙައްމަދު ޞާލިޙާ (އިބޫ) ފުޅާ ދާއިރާއެއްގައި މަޝްވަރާ ކުރައްވައި، އެމަނިކުފާނުގެ "ވަރަށް ބޮޑު އެއްބާރުލުމެއް އޮވެގެން" ކަމަށްވެސް ފައިސަލް ހާމަކުރެއްވިއެވެ.

ރައީސް ޞާލިޙަށް ތަޢުރީފު ކުރައްވަމުން ފައިސަލް ވިދާޅުވީ، ރައީސް ޞާލިޙަކީ ނިމިދިޔަ ސަރުކާރުގައި ރައްޔިތުންނަށް ގިނަގުނަ ޚިދުމަތްތަކެއް ކޮށްދެއްވި ބޭފުޅެއް ކަމަށް ރައްޔިތުން ޤަބޫލުކުރާ ކަމަށާއި، މި މަސައްކަތުގައި އެމަނިކުފާނުގެ ތާއީދު އޮތުމަކީ ނުހަނު މުހިންމު ކަމެއް ކަމަށެވެ. މީގެއިތުރުން، މި ދަތުރަކީ އުނދަގޫ މަސައްކަތެއްކަން ފާހަގަކުރައްވައި، ބޭނުންވަނީ ރެޔާއި ދުވާލު ހުއްޓުމެއް ނެތި ސާބިތުކަމާއެކު މަސައްކަތް ކުރެވޭނެ ވަރުގަދަ ޓީމެއް ކަމަށް ވިދާޅުވިއެވެ. އެގޮތުން އެމަނިކުފާނުގެ ރަނިންމޭޓަކަށް ހަމަޖައްސަވަން ނިންމަވާފައިވަނީ މާލެ ސިޓީގެ މޭޔަރު އާދަމް ޢާޒިމް ކަމަށް ވަނީ ހާމަކުރައްވާފައެވެ.