ސްކޫލް ކުދިންނަށް ޚާއްސަ ބަސްތަކަކާއި ޓްރެފިކް ބާރުބޮޑުވާ ވަގުތުތަކަށް ޚާއްސަކޮށްގެން ދަތުރުކުރާނެ ބަސްތަކެއް، މާލެ ސަރަހައްދަށް ތަޢާރަފުކުރުމަށް މަސައްކަތް ކުރަމުންދާ ކަމަށް އިޤްތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.ވަޒީރު މިފަދައިން ވިދާޅުވީ، ދައުލަތުގެ އެކި ވުޒާރާތަކުގެ މަސައްކަތްތަކާ ގުޅިގެން ރައްޔިތުންގެ ހުރި ސުވާލުތަކަށް ޖަވާބު ދިނުމަށް ކުރިއަށްގެންދާ "އަހާ" ފޯރަމްގެ 8 ވަނަ ޕްރޮގްރާމުގައި މިރޭ ކުރިމަތި ކުރި ސުވާލަކަށް ޖަވާބުދެއްވަމުންނެވެ.

ވަޒީރު ވިދާޅުވީ، މާލޭގެ މަގުތަކުގެ 82 އިންސައްތަ މިހާރު އޮތީ ވެހިކަލްތަކުން ތޮއްޖެހި ފުރިފައި ކަމަށެވެ. އެގޮތުން މިހާތަނަށް މާލެ ސަރަހައްދުގައި ރަޖިސްޓްރީ ކޮށްފައިވާ ވެހިކަލްތަކުގެ ޖުމްލަ އަދަދު 130،806 އަށް އަރާއިރު، އޭގެ ތެރޭގައި 14،911 ކާރާއި 115،895 ސައިކަލު ހިމެނޭކަން ވަޒީރު ފާހަގަކުރެއްވިއެވެ.

ވާޒީރު ވިދާޅުވީ، މާލެއަކީ ޖާގަ އިތުރަށް ބޮޑުކުރެވެން ނެތް ތަނަކަށް ވުމާއެކު، ސަރުކާރުގެ މައިގަނޑު އަމާޒަކީ މާލެއަކީ ވެހިކަލް ރަޖިސްޓްރޭޝަން ކޮންޓްރޯލްޑް ޒޯނަކަށް ހަދައި، ވެހިކަލް މަދުކުރުމާއެކު މާސް ޓްރާންސްޕޯޓަށް ބަރޯސާވާ މިންވަރު އިތުރުކުރުން ކަމަށެވެ. އަދި މި މަސައްކަތްތައް ހަރުދަނާކޮށް ކުރިއަށް ގެންދިއުމުގެ ގޮތުން، ޓްރެފިކް މައްސަލަތައް ހައްލުކުރުމަށް ޚާއްސަ މިނިވަން އޮފީހެއް ޤާއިމްކޮށް މިހާރު އަމަލީ މަސައްކަތް ފަށާފައިވާ ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، ތޮށްޖެހުމުގެ މައްސަލައަށް ހައްލެއް ހޯދުމަށްޓަކައި ކުރިއަށްއޮތްތާނގައި ޓްރެފިކް ބާރުބޮޑުވާ ވަގުތުތަކަށް ޚާއްސަކޮށްގެން ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހިން މާލޭގެ އެކި ދަތުރުކުރާނެ ބަސްތަކެއް ތަޢާރަފްކުރުމުގެ މަސައްކަތްތައް ކުރަމުންދާ ކަމަށެވެ.

މާލޭގެ ބޭރު މަގު ބޭނުންކުރާ ފަރާތްތަކަށް ފަސޭހަކޮށްދިނުމުގެ ގޮތުން، މާލޭގެ ވަށައިގެންވާ ރިންގް ރޯޑުގެ މަސައްކަތްތައް މިހާރު ނިމުމަކާ ގާތްވެފައިވާ ކަމަށް ވަޒީރު ފާހަގަކުރެއްވިއެވެ. މީގެ އިތުރުން މަގުތަކުގައި ޓްރެފިކް ލައިޓްތައް ހަރުކުރުމާއި، މަގުމަތީގައި ފުލުހުންގެ ވިޒިބިލިޓީ އިތުރުކުރުމާއި، ވަކި ސީސީތަކަކުން ނަގާ ފީތަކާ ގުޅޭގޮތުންނާއި މާސް ޓްރާންސްޕޯޓް މޮބިލިޓީ ޕްލޭންގެ ދަށުން ގިނަ ފިޔަވަޅުތަކެއް އެޅުމަށް ރޭވިފައިވާ ކަމަށްވެސް ވަަޒީރު ވިދާޅުވިއެވެ.

ވަޒީރު ވިދާޅުވީ، މި ހުރިހާ މަސައްކަތްތަކަކީވެސް ރައްޔިތުން އެންމެ ރުހޭނެ ފަދަ ގޮތަކަށް، ރޭވުންތެރިކަމާއެކު ސަރުކާރުން ކުރިއަށް ގެންދާ ކަންކަން ކަމަށެވެ. އަދި މިހާރު މި ކުރެވިގެންދާ މަސައްކަތްތަކާއެެކު ކުރިއަށްއޮތް ތިން އަހަރުގެ ތެރޭގައި މާލޭގެ ޓްރެފިކް މައްސަލައަށް އެދެވޭ ހައްލެއް ލިބިގެންދާނެ ކަމަށް އުންމީދުކުރައްވާ ކަމަށްވެސް އިގުތިޞާދީ ތަރައްޤީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވިއެވެ.