ދިވެހިރާއްޖޭގެ ކަނޑުގެ މުއްސަނދިކަން އެންމެ ފުރިހަމަ ގޮތުގައި ބޭނުންކުރުމަށާއި، މާކަނޑުގެ ފުން ސަރަޙައްދުތަކުގައި ދިރިއުޅޭ "ތުތި ބޯވަދިލަމަސް" (ޑައިމަންޑް ބެކް ސްކުއިޑް) ގެ މަސްވެރިކަން އާލާކުރުމަށްޓަކައި މިނިސްޓްރީން ކުރިއަށްގެންދިޔަ ޚާއްޞަ ތަމްރީނު ޕްރޮގްރާމެއް ގއ. ވިލިނގިލީގައި ކާމިޔާބުކަމާއެކު ކުރިއަށް ގެންގޮސްފިއެވެ.

މި މަހުގެ 3 އިން 4 އަށް ކުރިއަށް ގެންދިޔަ މި ތަމްރީނު ޕްރޮގްރާމަކީ މި ބާވަތުގެ މަސްވެރިކަން ދަސްކުރުމަށް ޝައުޤުވެރިވާ ފަރާތްތަކަށް ޚާއްޞަކޮށްގެން ހިންގި ޕްރޮގްރާމެކެވެ. މި ބުރުގައި ޖުމްލަ 8 ބައިވެރިން ވަނީ ބައިވެރިވެ، ޢަމަލީ އަދި ފަންނީ މަޢުލޫމާތު ހޯދާފައެވެ.

މި ތަމްރީނު ޕްރޮގްރާމްތައް ރާއްޖޭގެ އެކި ކަންކޮޅުތަކުގައި ބޭއްވުމުގެ މައިގަނޑު މަޤްޞަދަކީ ރާއްޖެއަށް މުޅިން އައު ބާވަތެއްގެ މަސްވެރިކަން ތަޢާރަފުކުރުމާއި، މަސްވެރިކަމުގެ ސިނާޢަތަށް ޒުވާނުން އަހުލުވެރިކުރުވައި، އިޤްތިޞާދީ އިތުރު ފުރުޞަތުތައް ފަހިކޮށްދިނުމެވެ.

މި ސިލްސިލާގެ ދަށުން އެންމެ ފުރަތަމަ ތަމްރީން ޕްރޮގްރާމް ބާއްވާފައިވަނީ މިދިޔަ ސެޕްޓެންބަރު މަހުގެ 15 ވަނަ ދުވަހު ފުވައްމުލައް ސިޓީގައެވެ. އެ ބުރުގައި 14 ބައިވެރިން ވަނީ ތަމްރީނު ފުރިހަމަކޮށްފައެވެ. މީގެއިތުރުން، މި ތަމްރީނުގެ ދެވަނަ ބުރު ގދ. ފިޔޯރީގައި ކުރިއަށް ގެންދިއުމަށް މިހާރު ވަނީ ހަމަޖެހިފައެވެ.