ޓިކްޓޮކް ކޮމިއުނިޓީ ގުޅިގެން، ދޮންކަލޯ އަށް ރައްކާތެރި، ދާއިމީ ބޯހިޔާވަހިކަމެއް ހޯދައިދިނުމަށް އެހީތެރިވުމުގެ ގޮތުން މިރޭ ޚާއްޞަ ފަންޑްރައިޒިންގ އިވެންޓެއް ބޭއްވުމަށް ހަމަޖެހިއްޖެއެވެ.

މި ޚާއްޞަ ލައިވް އިވެންޓް ކުރިއަށްދާނީ މިރޭ 21:00 ގައި ދޮންކަލޯގެ ބައްޕަ، ފަޔާގެ ޓިކްޓޮކް އެކައުންޓް (@fayazhassan48) މެދުވެރިކޮށެވެ.

އެމް.ޓީ.ޕީ އާއި ސަމާ ގުޅިގެން ކުރިއަށްގެންދާ މި ބޮޑު ހަރަކާތުގައި ޓިކްޓޮކްގައި މަޝްހޫރު އެތައް ހޯސްޓުންނެއް ބައިވެރިވެއެވެ.

މި ފަންޑްރައިޒިންގގެ މައިގަނޑު މަޤްޞަދަކީ ކޮންމެ ކުއްޖަކަށްވެސް ޙައްޤުވާ ފަދަ އަމާން، ދާއިމީ ގެއެއް ދޮންކަލޯއަށް ބިނާކޮށްދިނުމަށް ބޭނުންވާ ފައިސާ ހޯދުމެވެ.

"ކުޑަ އަމަލަކުން، ބޮޑު ބަދަލެއް" ގެނެސްދެވޭނެ މި ހަރަކާތަށް އެހީތެރިވާން ބޭނުންވާ ފަރާތްތަކަށް ބޭންކް ޓްރާންސްފަރ އަދި ކިއުއާރް ކޯޑް މެދުވެރިކޮށް ފައިސާ ހަދިޔާކުރެވޭނެއެވެ. ދޮންކަލޯގެ ބައްޕަ ފަޔާގެ ބޭންކް އެކައުންޓް ލައިވް ފެށުމުން އާމުންނާ ހިއްސާ ކުރެވޭނެއެވެ.

މީގެ އިތުރުން، ނޫސްވެރިޔާ މަދަދާ ވަނީ މި ހަފްތާ ތެރޭގައި ދޮންކަލޯ ދިރިއުޅޭ ރަށަށް ޒިޔާރަތްކޮށް، ދޮންކަލޯގެ މިހާރުގެ ހާލަތާއި، އިމާރާތްކުރަން ފަށައި ހުއްޓިފައިވާ ގޭގެ މަންޒަރުތައް ވީޑިއޯއެއް މެދުވެރިކޮށް އާންމުންނަށް ދައްކާލާފައެވެ.

ދޮންކަލޯގެ ބައްޕަ އާއި މާމަ މި ވީޑިއޯގައި ބުނެފައިވާ ގޮތުގައި، ދިރިއުޅޭނެ ރަނގަޅު ތަނެއް ބިނާކުރެވި، ގުދުރަތީ މާހައުލެއްގެ ތެރޭގައި ވަގުތުތައް ހޭދަކުރަން ލިބިއްޖެނަމަ، ދޮންކަލޯގެ ދިރިއުޅުމަށް ވަރަށް ހެޔޮ ބަދަލުތަކެއް އަންނާނެ ކަމަށް އެމީހުން ގަބޫލުކުރެއެވެ.

މިރޭ ކުރިއަށްދާ މި ޚާއްޞަ ލައިވްގައި ވީހާވެސް ގިނަ ބޭފުޅުން ބައިވެރިވެ، ދޮންކަލޯގެ އުފާވެރި މުސްތަޤުބަލަށް އެހީތެރިކަމުގެ އަތެއް ދިއްކޮށްލުމަކީ މި ހަރަކާތް އިންތިޒާމުކުރާ ފަރާތްތަކުގެ ވަރަށް ބޮޑު އެދުމެކެވެ. ހަދިޔާކުރާ ކިތަންމެ ކުޑަ އެހީއަކީވެސް، ދޮންކަލޯއަށް ރައްކާތެރި ބޯހިޔާވަހިކަމެއް ހޯދައިދިނުމަށް އެޅޭ ވަރަށް މުހިންމު ފިޔަވަޅެކެވެ.

މި ފަންޑްރެއިސިންގ އާއި ގުޅޭ އިތުރު މައުލޫމާތު އިން ލިބެންހުންނާނެއެވެ.