ހުވަދޫ ސްވިމިންގް ކުލަބުން މިހާރު ކުރިއަށް ގެންދާ ފަތަން ދަސްކޮށްދިނުމުގެ ޕްރޮގްރާމުން ލިބޭ ފައިސާ، ބެޑެތި ބަލިތަކުގައި އެހީ ބޭނުންވާ 3 ފަރާތަކަށް ދިނުމަށް އެ ކްލަބުން ނިންމައިފި އެވެ.

އެ ޖަމިއްޔާއިން މިއަދު އާއްމުކުރި ޕޯސްޓެއްގައި ބުނީ، ހުވަދޫ ސްވިމިންގ ކްލަބުގެ މައިގަނޑު އެއް އަމާޒަކީ މުޖުތަމައަށް ފައިދާތަކެއް ކުރުވުން ކަމަށާއި އެ ލަނޑުދަނޑި ހާސިލް ކުރުމަށް އެ ޖަމިއްޔާއިން ފާއިތުވެދިޔަ އަހަރުގައި ގިނަ ހަރަކާތްތަކެއް ކުރިއަށް ގެންގޮސްފައި ވާނެ ކަމަށެވެ.

އެ ޖަމިއްޔާއިން ބުނީި، އެ މަގްސަދު ހާސިލް ކުރުމަށްޓަކައި މިހާރު ކުރިއަށްދާ ފަތަން ދަސްކޮށްދިނުމުގެ ޕްރޮގްރާމުން ލިބޭ ފައިސާ، ބޮޑެތި ބަލިތައް ތަހައްމަލް ކުރަމުންދާ ތިނަދޫގެ ރައްޔިތުންގެ ތެރެއިން އެހީއަށް ބޭނުންވެފައިވާ ތިން ފަރާތަކަށް ހަދިޔާ ކުރުމަށް ނިންމާފައި ވާކަމަށެވެ.

އެ ތިން ފަރާތަކީ:

ކިޑްނީ ބަލީގެ ވޭން ތަހައްމަލްކޮށް، ޓްރާންސްޕްލާންޓް ހެދުމަށް މަސައްކަތް ކުރަމުންދާ އަޙްމަދު ސާއިދު

 އުރަމަތީގެ ކެންސަރު ޖެހިގެން އިންޑިއާގައި ފަރުވާ ހޯދަމުންދާ، މަރިޔަމް ޝަމްރާ

 ލޭގެ ކެންސަރު ޖެހިގެން ފަރުވާ ހޯދުމަށް އެހީއަށް ބޭނުންވެފައިވާ ގްރޭޑް 10ގެ ދަރިވަރު އައިޝަތު ސުނޭނާ ރަޝީދު

ހުވަދޫ ސްވިމިންގ ކުލަބަކީ ހުވަދު އަތޮޅުގައި ފެތުމުގެ ރޫހު އާލާކޮށް ކުޑަކުދިންނާއި ޒުވާނުން ފެތުމުގެ ދާއިރާއިން ތަމްރީނު ކުރުމުގެ އިތުރުން މޫދު ހަރަކާތްތައް ކުރިއަށް ގެންދިޔުމުގެ ވިސްނުމުގައި 2020ވަނަ އަހަރު އުފެދުނު ޖަމިއްޔާއެކެވެ.