ދިވެހިރާއްޖޭގެ ޚާއްޞަ އިޤްތިޞާދީ ސަރަޙައްދު ގައި ޤާނޫނާ ޚިލާފަށް ހަރަކާތްތެރިވަމުންދިޔަ ބޭރުގެ މަސްބޯޓެއް، އެމްއެންޑީއެފް ކޯސްޓްގާޑުން ހިންގި ޚާއްޞަ އޮޕަރޭޝަނެއްގައި އަތުލައިގެންފިއެވެ.

މި އޮޕަރޭޝަން ހިންގާފައިވަނީ އެމްއެންޑީއެފް ކޯސްޓްގާޑް ޝިޕް (ސީޖީއެސް) ޢިމާދުއްދީނުންނެވެ. އެމްއެންޑީއެފުން މަޢުލޫމާތު ދެއްވި ގޮތުގައި، ޖުމްލަ 7 މީހުންނާއެކު ހަރަކާތްތެރިވަމުންދިޔަ މި ބޯޓު ކޯސްޓްގާޑުގެ ބެލުމުގެ ދަށަށް ގެނެސްފައިވަނީ ހއ. ތުރާކުނުގެ ހުޅަނގުއުތުރުން ގާތްގަނޑަކަށް 46 ނޯޓިކަލް މޭލު ބޭރުންނެވެ.

މި ބޯޓު ހިފަހައްޓާފައިވަނީ ސެޕްޓެންބަރު މަހުގެ 30 ވަނަ ދުވަހުގެ އިރުއޮއްސި 18:34 ހާއިރުއެވެ.

އެމްއެންޑީއެފުން އިތުރަށް ވިދާޅުވީ، ކޯސްޓްގާޑުގެ ބެލުމުގެ ދަށަށް ގެނެވުނު މި ބޭރުގެ މަސްބޯޓު، އިތުރަށް ބަލައި ފާސްކުރުމަށާއި ޤާނޫނީ ފިޔަވަޅު އެޅުމަށްޓަކައި ހދ. ކުޅުދުއްފުށްޓަށް ގެންދިއުމުގެ މަސައްކަތް މިހާރު ދަނީ ކުރަމުންނެވެ.