މިހާރު ކުރިއަށްދާ ހިޔާކަޕް ހޭންޑްބޯޅަ މުބާރާތުގައި ރޭ ކުޅުނު ކުއާޓާ ފައިނަލް ތިންވަނަ މެޗުގައި ވާދަވެރި ކުޅުމަކަށްފަހު ފޭސް 2 ސްޕޯޓްސް ބަލިކޮށް ތުޅާދޫ ޖަންގް އީގަލްސް ސްޕޯޓްސް(ޓީވައިއީއެސް) މުބާރާތުގެ ސެމީފައިނަލުން ޖާގަ ހޯދައިފިއެވެ.

މުބާރާތުގެ ކުއާޓާ ފައިނަލުން ޓީވައިއީއެސް ޖާގަ ހޯދީ ގުރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވެ 12 ޕޮއިންޓާއެކު ގުރޫޕް ސީގެ އެއްވަނަ ޓީމުގެ ގޮތުގައެވެ. އަދި ފޭސް 2 ސްޕޯޓްސް ކުއާޓާ ފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ހަތަރު މެޗުން ހޯދި ހަ ޕޮއިންޓާއެކު ގުރޫޕް އޭގެ ތިންވަނަ ޓީމުގެ ގޮތުގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗު ޓީވައިއީއެސް އިން ކާމިޔާބުކުރީ ފޯރިގަދަ ކުޅުމަކަށް ފަހު 10-17 ގެ ނަތީޖާއަކުންނެވެ.

އެގޮތުން މިމެޗުގައި ޓީވައިއީއެސްގެ އައިޝަތު ހުޝާމާ ހުސެއިން ހަތް ލަނޑު ކާމިޔާބުކުރިއިރު، ސައުދާ ބިންތް އަބްދުﷲ ޝަފީގް ބިންތް ހަސަންގެ އިތުރުން ނޫރާ އަބްދުﷲ ހަމީދު އަދި އާމިނަތު އުލްޔާ ބިންތް މުހައްމަދު ވަސީމް މިއިން ކޮންމެ ކުޅުންތެރިއަކު ވަނީ މިމެޗުގައި ދެލަނޑު ކާމިޔާބުކޮށްފައެވެ. އަދި މީގެ އިތުރުން އެޓީމުގެ ފާތުމަތު ރިޔުޒު ޝަރީފް، ނަޒުމާ އަހުމަދު، އައިޝަތު މައިހާ އަދި އައިޝަތު ލީން މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ފޭސް 2 ސްޕޯޓްސްގެ ފާތުމަތު މުޒުނާ އަދި އައިޝަތު ލައިޒާ މިއިން ކޮންމެ ކުޅުންތެރިއަކު ތިން ލަނޑު ކާމިޔާބުކުރިއިރު، މަރިޔަމަ ސަމްމާ އަބްދުއް ސައްތާރު ވަނީ މިމެޗުގައި ދެލަނޑު ކާމިޔާބުކޮށްފައެވެ. އަދި މީގެ އިތުރުން މިމެޗުގައި އެޓީމުގެ އާމިނަތު ލީނާ އަދި ގުރައިޝާ އަބްދުﷲ މިއިން ކޮންމެ ކުޅުންތެރުއަކު އެއްލަނޑު ކާމިޔާބުކުރިއިރު، މެޗުގެ މޮޅު ކުޅުންތެރިއަކަށް ހޮވުނީ ޓީވައިއީއެސްގެ އައިޝަތު ހުޝާމާ ހުސެއިން އެވެ.

23 ސެޕްޓެމްބަރު 2026 އިން 28 ސެޕްޓެމްބަރު 2026 ގެ ނިޔަލަށް ހުޅުމާލޭގައި ކުރިއަށްދާ މިމުބާރާތުގައި މިއަހަރު ޖުމްލަ 15 ޓީމަކުން ވާދަކޮށްފައިވާއިރު، މުބާރާތް ކުރިއަށް ގެންގޮސްފައިވަނީ ބައިވެރި 15 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމުގެ އިތުރުން ތިންގުރޫޕުން ވެސް ތިންވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ޖާގަ ލިބިފައެވެ.