މިހާރު ކުރިއަށްދާ ހިޔާކަޕް ހޭންޑްބޯޅަ މުބާރާތުގައި ރޭ ކުޅުނު ކުއާޓާ ފައިނަލް ފުރަތަމަ މެޗުގައި ފަސޭހަކަމާއެކު ޒެފިއާސް ބަލިކޮށް މުބާރާތުގެ ސެމީފައިނަލުގެ ފުރަތަމަ ޖާގަ ހިޔާ ސްޕޯޓްސް ކުލަބުން ހޯދައިފިއެވެ.

މުބާރާތުގެ ކުއާޓާ ފައިނަލުން ހިޔާ ސްޕޯޓްސް ކުލަބު ޖާގަ ހޯދީ ގުރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވެ 12 ޕޮއިންޓާއެކު ގުރޫޕް އޭގެ އެއްވަނަ ޓީމުގެ ގޮތުގައެވެ. އަދި ޒެފިއާސް ކުއާޓާ ފައިނަލުން ޖާގަ ހޯދީ ގުރޫޕް ސްޓޭޖުގައި ކުޅުނު ހަތަރު މެޗުން ހޯދި ހަ ޕޮއިންޓާއެކު ގުރޫޕް ސީގެ ތިންވަނަ ޓީމުގެ ގޮތުގައެވެ.

މުޅި މެޗުގައި ވެސް މޮޅަށް ކުޅެ ހިޔާ ސްޕޯޓްސް ކުލަބުން މެޗު ޑޮމިނޭޓްކުރިއިރު، އެޓީމުން މެޗު ކާމިޔާބުކުރީ ފަސޭހަކަމާއެކު 06-17 ގެ ތަފާތުބޮޑު ނަތީޖާއަކުންނެވެ.

އެގޮތުން މިމެޗުގައި ހިޔާ ސްޕޯޓްސް ކުލަބުގެ ސާޖިދާ އަލީ ހަ ލަނޑު ކާމިޔާބުކުރިއިރު، ފާތިމަތު އަހުމަދު ވަނީ ތިން ލަނޑު ކާމިޔާބުކޮށްފައެވެ. އަދި އެޓީމުގެ މަރިޔަމް ޝަރީފާ ހުސެއިން، މަރިޔަމް އަރީޝާ އަދި ފާތުމަތު ނިހާޔަތު މިއިން ކޮންމެ ކުޅުންތެރިއަކު ދެލަނޑު ކާމިޔާބުކުރިއިރު، ހައްވާ ޒާހިރާ އަދި އާލާ އަލީ އިބްރާހިމް މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މީގެ އިތުރުން މިމެޗުގައި ޒެފިއާސްގެ މަރިޔަމް ނާއިޝާ މަންސޫރު ތިން ލަނޑު ކާމިޔާބުކުރިއިރު، އެޓީމުގެ ޝަބާ ޔޫސުފް، ޒުހާ ރަޝީދު އަދި ޝާމާ މުހައްމަދު އަމްޖަދު މިއިން ކޮންމެ ކުޅުންތެރިއަކު ވަނީ އެއްލަނޑު ކާމިޔާބުކޮށްފައެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ހިޔާ ސްޕޯޓްސް ކުލަބުގެ ސާޖިދާ އަލީ އެވެ.

23 ސެޕްޓެމްބަރު 2026 އިން 28 ސެޕްޓެމްބަރު 2026 ގެ ނިޔަލަށް ހުޅުމާލޭގައި ކުރިއަށްދާ މިމުބާރާތުގައި މިއަހަރު ޖުމްލަ 15 ޓީމަކުން ވާދަކޮށްފައިވާއިރު، މުބާރާތް ކުރިއަށް ގެންގޮސްފައިވަނީ ބައިވެރި 15 ޓީމު ތިން ގުރޫޕަކަށް ބަހާލައިގެންނެވެ.

އެގޮތުން ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދި ދެޓީމުގެ އިތުރުން ތިންގުރޫޕުން ވެސް ތިންވަނަ ހޯދި ޓީމުތަކުގެ ތެރެއިން އެންމެ ނަތީޖާ ރަނގަޅު ދެޓީމަށް ވެސް މުބާރާތުގެ ކުއާޓާ ފައިނަލުން ވަނީ ޖާގަ ލިބިފައެވެ.