ރާއްޖޭގައި ފުޅާ ދާއިރާއެއްގައި ހިންގަމުންދާ 24 ޑްރަގް ނެޓްވޯކެއްގެ މައްސަލަ ބަލަމުންދާކަމަށް ދާޚިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު އަލީ އިޙުސާން ވިދާޅުވެއްޖެއެވެ.އެމަނިކުފާނު މިކަން ހާމަކުރައްވާފައިވަނީ، ވަޒީރުންނަށް އާންމުންގެ ސުވާލު ހުށަހެޅުމަށް ކުރިއަށްގެންދާ، ވަޒީރުންގެ "އަހާ" ފޯރަމްގެ ސިލްސިލާގައި އާދީއްތަ ދުވަހުގެ ރޭ ޕީއެސްއެމްގައި ވާހަކަދައްކަވަމުންނެވެ.

ވަޒީރު ވިދާޅުވި ގޮތުގައި، މަސްތުވާތަކެތީގެ ވިޔަފާރިކުރާ 24 ޑްރަގް ނެޓްވޯކެއް ދެނެގަނެ، އެ ނެޓްވޯކްތަކާ ގުޅޭ މައްސަލަތައް ދިވެހި ފުލުހުންގެ ޚިދުމަތުން ދަނީ ބަލަމުންނެވެ. ވަޒީރު ވިދާޅުވީ ސަރުކާރުގެ އަމާޒަކީ، މަސްތުވާތަކެތި ބޭނުންކުރާ ފަރާތްތަކަށް ފަރުވާދިނުމާއި، މަސްތުވާތަކެތީގެ ސަޕްލައި ހުއްޓުވުންކަމަށެވެ. އެގޮތުން ކުރި މަސައްކަތުން މިދިޔަ ދެ އަހަރާ ބައިގެ ތެރޭގައި މަގުމަތީ އަގު 1.5 ބިލިއަން ދިވެހި ރުފިޔާއަށް އަރާ، 1.3 ޓަނުގެ މަސްތުވާތަކެތި އަތުލައިގަނެފައިވާ ކަމަށް ވަޒީރު ވިދާޅުވިއެވެ.

މިއީ ކުރީ ސަރުކާތުތަކުގެ ފުރަތަމަ 3 އަހަރާއި އަޅާ ބަލާއިރު މަސްތުވާތަކެތި އަތުލައިގަތުމުގައި ރެކޯޑް އަދަދަދެއްކަމަށް ވަޒީރު ފާހަގަކުރެއްވިއެވެ.ވަޒީރު ވިދާޅުވި ގޮތުގައި، ޑްރަގް ވިއްކައިގެން ރައްޔިތުން ހާލުގައި ޖައްސާފައިކުރާނެ ވިޔަފާރި އެއް ދެން ރާއްޖެއަކު ނޯންނާނެއެވެ.

"ޑްރަގްގެ ވިޔަފާރިކުރާ މައްސަލަތަކާއި ގުންހުރި 3.6 މިލިއަން ދިވެހި ރުފިޔާ އާއި 48000 ޑޮލަރު ކޭޝް ނެގިފައި ހުރި މައްސަލަތައް ހިމެނޭ. އެތައް ހާސް ޑޮލަރަކާއި ރުފިޔާއެއްގެ މުދާ ބެލުމުގެ ދަށަށް ގެނެވުނު." ދާޙިލީ ވަޒީރު އިޙުސާން ވިދާޅުވިއެވެ.މީގެ އިތުރުން މަސްތުވާތަކެތީގެ ވިޔަފާރިކުރާ ނެޓްވޯކްތައް ހުއްޓުވުމަށް އަމާޒުކޮށްގެން ހިންގާފައިވާ އޮޕަރޭޝަންތަކުގެ ނަތީޖާ ރަނގަޅުކަމަށް ވަޒީރުވަނީ ފާހަގަކުރައްވާފައެވެ.

ޑްރަގް ކެފޭއެއްގެ ގޮތުގައި ތަންތަން ހިންގުމަކީ ދިމާވާ ވަރަށް ބޮޑު ގޮންޖެހުމެއްކަމަށް ވަޒީރު ވިދާޅުވިއެވެ. ޑްރަގްގެ ޚިދުމަތްދޭ ތަންތަން ބަންދުކުރުމުން، ޖެހިގެން އަންނަ ދުވަހު އެތަން ހުޅުވައިގެން ވިޔަފާރިކުރަމުންދާކަމަށާ، އެކަން ހައްލުކުރުމަށް އެއް ތަނަކަށް ތަކުރާރުކޮށް ރެއިޑްކޮށްފައިވާނެކަމަށް ވަޒީރު ވިދާޅުވިއެވެ.