ރާއްޖެއިން ބޭރުގެ އީ-ކޮމާސް ޕްލެޓްފޯމްތަކުގައި ބޭންކް އޮފް މޯލްޑިވްސް (ބީއެމްއެލް) ގެ ދިވެހި ރުފިޔާ ކާޑުތައް ބޭނުންކޮށްގެން ކުރާ މުއާމަލާތްތަކަށް ދެމެހެއްޓެނިވި އަދި ދެފުށް ފެންނަ އުސޫލަކުން ވަކި ލިމިޓްތަކެއް ކަނޑައަޅައި، އެކަން ތަންފީޒުކުރުމަށް ބޭންކުން ނިންމައިފިއެވެ.

މި އައު އުސޫލަށް އަމަލުކުރަން ފެށުމަށް ހަމަޖެހިފައިވަނީ 13 ސެޕްޓެންބަރު 2026 އިން ފެށިގެންނެވެ.

މި ބަދަލު ގެންނަން ނިންމާފައިވަނީ ރާއްޖޭގެ ބޭރު ފައިސާގެ ރިޒާވް ޒިންމާދާރުކަމާއެކު ބެލެހެއްޓުމަށާއި، ގައުމަށް އެންމެ ބޭނުންތެރި ޒަރޫރީ މުދަލާއި ޚިދުމަތްތައް މެދުނުކެނޑި ލިބޭނެ މަގު ފަހިކޮށްދިނުމުގެ ގޮތުންނެވެ.

ބީއެމްއެލް އިން ހާމަކުރި ގޮތުގައި، ދުނިޔޭގެ އެކި ކަންކޮޅުތަކުގައިވާ 40،000 އަށްވުރެ ގިނަ އީ-ކޮމާސް ޕްލެޓްފޯމްތަކުން ރުފިޔާ ކާޑު ބޭނުންކޮށްގެން ކަސްޓަމަރުން މުދަލާއި ޚިދުމަތް ހޯދަމުންދާއިރު، އެވްރެޖްކޮށް ދުވާލަކު 20،000 އަށްވުރެ ގިނަ މުއާމަލާތް ކުރެވެއެވެ. މި އަހަރު މިފަދަ މުއާމަލާތްތައް ވަރަށް ބޮޑަށް އިތުރުވެ، އެކަމަށް ބޭނުންވާ ޑޮލަރުގެ މިންވަރު ބޭންކަށް އެކި ވަސީލަތްތަކުން ލިބެން ހުރި މިންވަރަށްވުރެ އިތުރުވުމުގެ ސަބަބުން، ޒަރޫރީ ޚިދުމަތްތަކަށާއި ޓެލެގްރަފިކް ޓްރާންސްފަރ (ޓީޓީ) ހެދުމަށް ވަނީ ދަތިތަކާ ކުރިމަތިވެފައެވެ.

އައު އުސޫލުގެ ދަށުން، ރާއްޖެއިން ބޭރުގެ އީ-ކޮމާސް މުއާމަލާތްތަކަށް ބީއެމްއެލްގެ ރުފިޔާ ކާޑުތަކުން މަހަކު ޖުމްލަ 16 މިލިއަން ޑޮލަރާ ހަމައަށް ހޭދަކުރެވޭނެ ގޮތް ހަމަޖައްސައި، ވަކިވަކި ދާއިރާތަކަށް ދުވާލަކު ބޭނުންކުރެވޭނެ ލިމިޓްތަކެއް ވަނީ ކަނޑައަޅާފައެވެ. ދުވާލުގެ ލިމިޓް ހަމަވެއްޖެނަމަ ޖެހިގެން އަންނަ ދުވަހު ނުވަތަ ޑޮލަރު ކާޑެއް މެދުވެރިކޮށް މުއާމަލާތް ފުރިހަމަކުރެވޭނެއެވެ. އަދި ދުވާލުގެ ލިމިޓް ކޮންމެ ދުވަހެއްގެވެސް ހެނދުނު 7:00 ގައި ރީސެޓްވާނެއެވެ.

ކަނޑައެޅިފައިވާ ދާއިރާތަކާއި ލިމިޓްތަކުގެ ތަފްސީލު:

1. އެންމެ ގިނައިން ވިޔަފާރިކުރާ އީ-ކޮމާސް ޕްލެޓްފޯމްތައް (ޓީމޫ، އަލީބާބާ، އެޕަލް، އެމެޒޯން ފަދަ 150 ޕްލެޓްފޯމް): މަހަކު ޖުމްލަ 3 މިލިއަން ޑޮލަރު (ދުވާލަކަށް 100،000 ޑޮލަރު).
2. ސޯޝަލް މީޑިއާ ޕްލެޓްފޯމްތައް (މެޓާ، ޓިކްޓޮކް ފަދަ): މަހަކު 1.5 މިލިއަން ޑޮލަރު (ދުވާލަކަށް 50،000 ޑޮލަރު).
3. ދަތުރުފަތުރާއި ހޮޓެލް ބުކިން: މަހަކު 6 މިލިއަން ޑޮލަރު (ދުވާލަކަށް 200،000 ޑޮލަރު). މީގެއިތުރުން، އަމިއްލަ ބޭނުންތަކަށް ފައިސާ ކަށަވަރުކުރުމަށްޓަކައި، ކޮންމެ ކަސްޓަމަރަކަށް ތިން މަސް ދުވަހުގެ ތެރޭގައި ކުރެވޭނީ ގިނަވެގެން ތިން މުއާމަލާތެވެ.
4. ޒަރޫރީ ސަބްސްކްރިޕްޝަންތަކާއި މުހިންމު ޚިދުމަތްތައް: މަހަކު 3 މިލިއަން ޑޮލަރު (ދުވާލަކަށް 100،000 ޑޮލަރު).
5. އެހެނިހެން ހުރިހާ ވިޔަފާރިތައް: މަހަކު 1.8 މިލިއަން ޑޮލަރު (ދުވާލަކަށް 60،000 ޑޮލަރު).
6. ސިއްހަތާއި ތައުލީމު: މި ދާއިރާތަކަށް އެއްވެސް މާޗަންޓް ނުވަތަ ކެޓެގަރީ ލިމިޓެއް ކަނޑައަޅާފައެއް ނުވެއެވެ. އަދި މި ޚިދުމަތްތައް މެދުނުކެނޑި ފޯރުކޮށްދިނުމަށްޓަކައި ވަކިން ޚާއްސަ ބަފަރއެއް (އިތުރު މިންވަރެއް) ބޭންކުން ދަމަހައްޓާނެއެވެ

ބީއެމްއެލް އިން ވިދާޅުވީ، މުއާމަލާތްތައް ކުރާ މިންވަރާއި ބޭންކުގައި ބޭރު ފައިސާ ހުރި މިންވަރަށް ބަލައި، ކަނޑައެޅިފައިވާ އަދަދުތަކަށް ދޭތެރެ ދޭތެރެއިން މުރާޖައާކޮށް އެކަށީގެންވާ ބަދަލުތައް ގެންނަމުންދާނެ ކަމަށެވެ.