މޫސުން ގޯސްވާނެކަމަށް ލަފާކޮށް އުތުރުގެ އަތޮޅުތަކަށް ހުދު ސަމާލު ނެރެފި އެވެ.

މޫސުމާ ބެހޭ ގައުމީ އިދާރާ (މެޓް އޮފީސް) އިން ބުނީ މި ސަރަހައްދަށް މިއަދު ހެނދުނު 08:15 އިން ފެށިގެން 14:00 އަށް މޫސުން ގޯސްވާނެކަމަށެވެ.

މެޓުން ބުނީ މި ވަގުތުގައި މި ސަރަހައްދުތަކަށް ބޯކޮށް ވާރޭވެހުމާއެކު ގުގުރާނެކަމަށް ލަފާކުރެވޭ ކަމަށެވެ. އަދި ވިލާގަނޑުގައި ގަޑިއަކު 35 މޭލަށް ވައިގަދަވާނެކަމަށްވެސް މެޓުން ވަނީ ލަފާކޮށްފަ އެވެ.

މި ދުވަސްކޮޅު ރާއްޖޭގެ ހުރިހާ ހިސާބުތަކަށް މޫސުން ރަނގަޅު އެވެ. ނަމަވެސް ބައެއް ހިސާބުތަކަށް މޫސުން ގޯސްވާނެކަމަށް ލަފާކޮށް މެޓުން ދަނީ ބައެއް ދުވަސްތަކުގައި އެލާޓްތައް ނެރެމުންނެވެ.