މިއަހަރުގެ މިނިވަން 61 ވަނަ އަހަރުގެ މުނާސަބަތާ ގުޅިގެން ބަސް ރޫޓުތަކަށް ބަދަލުތަކެއް ގެންނަން ނިންމާފައިވާ ކަމަށް އެމްޓީސީސީން ބުނެފި އެވެ.

އެމްޓީސީސީން ބުނީ މާދަމާ މިނިވަން ދުވަހުގެ ހަރަކާތްތައް ކުރިއަށްދާ ވަގުތު، ހެނދުނު 6 އިން އިރުއޮއްސި 6 ޖެހުމާހަަމައަށް އިވެންޓް ނިމެންދެން ބަހުގެ ހިދުމަތް މެދުކަނޑާލާނެ ކަމަށެވެ.

މި ވަގުތުތަކުގައި ބަހުގެ ރޫޓުގެ ހިދުމަތް މެދުކަނޑާލާނީ އޯކިޑް ރޫޓް (ރޫޓް 10) އަދި އަމީނީ ރޫޓް (ރޫޓް 11) ކަމަށް އެމްޓީސީސީން ބުންޏެވެ.

މީގެއިތުރުން އެމްޓީސީސީން ބުނީ މާދަމާ އިރުއޮއްސި 6 އިން ފެށިގެން އިވެންޓް ނިމެންދެން ރޫޓް 2 އަދި ރޫޓް 8 ގެ ބަސް ކާނިވަލަށް ދަތުރުނުކުރާނެ ކަމަށެވެ. އެހެންކަމުން ކާނިވަލް ބަހުގެ ރޫޓް 2 އަދި ރޫޓް 8 ގެ ބަހުގެ ދަތުރުތައް މާފަންނު ބަސް ޓާމިނަލަށް ނިންމާލިނަމަވެސް، މި ރޫޓްތަކުން ކުރާ ދަތުރުގައި ރޫޓް 1 ގެ ބަސް ހުއްޓިތަކަށްވެސް މަޑުކުރާނެ ކަމަށެވެ.

އިތުރު މައުލޫމާތު ހޯދުމަށް އެ ކުންފުނީގެ ހޮޓްލައިން 1650 އަށް ގުޅުއްވައިގެން މައުލޫމާތު ސާފުކުރުމަށް އެމްޓީސީސީން ބުންޏެވެ.